Наместо сарма и подварок, грицкајте кисел зеленчук

Се разбира дека е сега време за сарми и за подварок и веројатно се тие омилени јадења на многумина, ама подобро е ако многу почесто , наместо тоа, консумирате ферментиран зеленчук кој е докажан чувар на нашето здравје

0
257

Веројатно многу пати сте чуле колку е здраво да се консумираат ферментирани намирници настанати со природно вриење. Тие содржат пробиотички култури кои ги сочинуваат многубројни видови бактерии. Овие добри бактерии природно ги населуваат нашите црева и ја сочинуваат цревната микрофлора.

Сите овие микроорганизми се особено важни за здравјето на дигестивниот систем, но и на целиот организам.

Ферментираните намирници и пробиотички култури можат да бидат од голема корист во лекувањето на болести предизвикани од штетни микроорганизми. Со векови, разновидни намирници се ферментираат во различни делови на светот – соја, ориз, кокосово млеко, печурки, овошје и зеленчук, разни видови кравјо млеко.

Киселењето на зеленчукот е многу стар и испробан начин за правење на здрава зимница.

Многу видови созреваат на есен и со неколку основни правила можете успешно и лесно сами да ги подготвите за зимница.

Најчесто се користи тврд зеленчук како моркови, корен од целер, цвекло, зелка, репа, келераба, пиперки, краставици, карфиол, зелени домати, тиквички, кромид.

Зеленчукот природно содржи бактерии на млечно кисело вриење. Во поволни услови на влажност, температура и без пристап до воздух, разните шеќери од намирниците се претвораат во млечна киселина. Така, тие се здобиваат со својствен кисел вкус. Исто така, млечната киселина спречува раст на бактерии кои предизвикуваат расипување.

Ферментираната храна ќе ги зачува своите основни хранливи вредности. Тие ќе бидат дополнително збогатени со вредните витамини К и Б-комплекс и со ензими, додека некои влакна ќе станат помеки. Овие намирници се и полесни за варење.

Придобивки од ферментираниот зеленчук

Закиселениот зеленчук му носи многу придобивки на нашето тело и делува на повеќе нивоа:

1. Одржува здрава цревна микрофлора.

2. Ја обновува слузницата на цревата.

3. Го стимулира метаболизмот и варењето.

4. Го ублажува синдромот на иритабилно дебело црево.

5. Го подобрува имунитетот.

6. Може да спречи развој на рак, особено на дебелото црево.

7. Го регулира крвниот притисок.

8. Ги намалува покачените нивоа на холестерол.

9. Ублажува алергии и проблеми со кожата.

10. Го подобрува расположението.

11. Погоден е за дијабетичари бидејќи шеќерот и скробот од оваа храна се претвораат во млечна киселина. Ова истовремено ја намалува количината на шеќер, што ја прави храната соодветна за дијабетичари.

Три важни напомени

1. Цревата понекогаш се опишуваат како „втор мозок“. Се верува дека најголемиот дел од серотонинот, хормонот на среќата, се произведува токму во цревата. Хроничниот стрес негативно влијае на цревната микрофлора. Затоа, пробајте да избегнувате стрес и да го заштитите здравјето на цревата јадејќи ферментирана храна.

2. Не ја гответе ферментираната храна, бидејќи ќе ги изгуби корисните микроорганизми. Затоа, наместо сарма и подварок, почесто консумирајте салата од кисела зелка.

3. Можете дополнително да го зголемите бројот на корисни микроорганизми ако пиете расолница – многу здрава солено-кисела течност во која се наоѓа ферментираниот зеленчук.