Со храна богата со влакна против карцином и срцеви болести

0
491

Научниците и организациите кои се занимаваат со здравјето веќе долго потсетуваат на повеќекратната корист од консумирањето на храна богата со влакна, но колку модерниот човек навистина ја внесува во организмот?

Ова е прашањето кое ја потикнало Светската здравствена организација да основа екипа која ги анализирала резултатите и ги објавила во списанието Lancet.

Целта на анкетата била да се развијат нови смерници во консумирањето на храната богата со влакна и да се утврди кои јаглени хидрати најмногу штитат од незаразни болести и спречуваат зголемување на телесната тежина.

Користа од внесувањето во организмот на влакнести намирници е поголема отколку што мислевме порано“, рекол Џим Ман, коавтор на истражувањето и професор по нутриционизам на Медицинскиот факултет Отаго.

Водителот на студијата професор Ендрју Рејнолдс од истиот универзитет рекол дека тој и колегите проучиле 185 опсервациски и 58 клинички студии спроведени во последните 40 години врз 4.600 луѓе.

Ја проучувале инциденцијата на некои хронични болести, како и стапката на прерани смртни случаи како нивна последица.

Станувало збор за коронарни болести на срцето, кардиоваскуларни болести, мозочни удари, дијабетес тип 2, рак на дебело црево и цела низа карциноми поврзани со дебелината, како рак на дојка, рак на ендометриумот, рак на хранопроводот и рак на простатата.

Научниците утврдиле дека опасноста од прерана смрт како последица од било која наведена причина била за 15 до 30 проценти помала кај луѓето во чија исхрана влакнестата храна била најзастапена, во однос на лицата кои консумирале намирници со помалку влакна.

Ризикот од заболување од коронарни срцеви болести, мозочен удар, дијабетес тип 2 и карцином на дебелото црево биле за 16 до 24 отсто пониски кај оние кои редовно јаделе храна богата со влакна.

Заклучиле дека кнсумирањето на 25 до 30 грама влакна дневно имаат заштитно влијание на организмот, а секои 8 грама дневно повеќе ја намалуваат вкупната смртност, како и инциденцијата на срцеви болести, дијабетес тип 2 и рак на дебело црево за пет до 27 отсто.

Треба да се истакне и дека телесната тежина на лицата кои консумираат голема количина на храна богата со влакна е помала отколку кај останатите, имаат понизок притисок, шеќер и вредности на холестеролот, како и помал ризик од развој на мозочен удар или карцином на дојка.

Научниците потсетуваат дека влакната го чистат дебелото црево делувајќи како четкање. Ова придонесува за чистење на бактериите и останатите наслаги во цревата што истовремено го намалува и ризикот од рак на дебело црево.

Ако планирате во исхраната да воведете повеќе храна со влакна, водете сметка и за тоа дека храната треба добро да ја изџвакате и дека треба да пиете повеќе вода во текот на денот. На системот за варење му е потребно време за да се прилагоди на новиот начин на исхрана затоа што ненадејното покачување на количината на влакнести намирници првин би можело да резултира со непријатна надуеност, гасови, грчеви и намален апетит.

Водете сметка и за тоа да не консумирате премногу влакнеста храна, а тоа е 70 грама или повеќе. Иако ретко, таквата исхрана може да доведе и до сериозни здравствени проблеми како што се недостаток на хранливи материи во организмот или проблеми со варењето.

Не е лошо да се спомене дека една кришка леб од цели житарки содржи два грама влакна, шолја варена брокула – пет грама, еден портокал – три грама. Понатаму, во една шолја грашок има дури 16,3 грама влакна (најдобро би било да се јадат сушени млади зрна), потоа во 100 грама чиа семе има 34,4 грама влакна, во 100 грама ленено семе -27 грама, а во сто грама малини – 6,5 грама. Висока количина влакна има и во авокадото, артичоките, во гравот, бадемите, овесните снегулки, леќата, наутот, крушите, јабоката, морковите и цвеклото.

Фото: Pixabey