Што е првото нешто што ви паѓа на ум кога ќе видите гумени бонбони?

Веројатно детството и деновите кога плачевте и ги влечевте родителите за ракав да ви ги купат. Дури и денес, многумина од нас можат лесно да изедат цела кесичка со слатки и шарени гумени животни.

Но, дали знаете од што навистина се направени?

Некои од вас можеби ја прочитале етикетата и составот испишани со ситни букви на задната страна на пакувањето, но веројатно не сте свесни за состојките и како се подготвуваат.

Генерално, гумените бонбони се состојат од шеќер, желатин, скроб, гликозен сируп, на кои се додадени разни засилувачи на вкус и разни вештачки бои.

Благодарение на шеќерот, тие се екстремно калорични и без никаква корисна хранлива вредност. Значи, со нивното конзумирање, само се полните со куп празни калории.
Посебно место зазема желатинот, состојката што ги прави толку сочни, гумени, меки и уште повеќе ве поттикнува да ги јадете.

Сепак, ако знаете од што всушност се прави овој желатин, веројатно ќе ви се смачи од помислата колку остатоци од кожа, животински нокти и рогови сте изеле досега јадејќи гумени бонбони.

Имено, желатинот се добива од остатоци од кожа, копита и коски на животни, најчесто свињи.

Така е, отпадот од месната индустрија е всушност една од главните состојки во вкусните гумени бонбони.

Животинскиот отпад преку посебен процес се претвора во желатин, кој освен за гумени бонбони, се користи и за подготовка на многу други слатки.

Желатинот се добива и со готвење на животински тетиви, коски, отпадни масти и делови од телото и сѐ што се смета за отпад во преработката на месото.

Но, гумените бонбони, како и другите производи за деца, привлекуваат со своите светли бои, вештачки вкусови и разни интересни форми. Затоа, разговарајте со вашето дете и објаснете му дека тоа што се крие во неговата омилена бонбона не е воопшто убаво или здраво, а како алтернатива понудете му суво овошје.

На почетокот, разбирливо ќе наидете на целосно отфрлање и неодобрување, но не се откажувајте. Овде не станува збор за целосно елиминирање на пристапот на вашето дете до бонбони, туку за одржување на нивното купување на минимум и секогаш прво нудење на поздрава варијанта на слатки.

Друг недостаток на гумените бонбони и преработената храна воопшто е додавањето на бројни вештачки вкусови, бои и други адитиви, така што еден вид гумени бонбони може да има дури дванаесет различни адитиви. Можеме да најдеме и различни восоци во гумените бонбони.

На пример, карнауба восокот не е штетен додаток, но е несварлива супстанца која вообичаено се користи за полирање на автомобили.

Ако пак одберете гумени бонбони без шеќер, како поздрава варијанта, никогаш не јадете голема количина одеднаш. Најчестиот избор на вештачки засладувачи во слатките без шеќер се шеќерните алкохоли, кои во поголеми количини предизвикуваат привремени, но тешки дигестивни нарушувања, надуеност и дијареа.

Денес постојат и гумени бонбони во кој наместо желатин се употребува веганска замена, односно агар во прав кој се добива од морски алги.

Значи, ако сакате да знаете што јадете, сепак ќе морате внимателно да го прочитате составот и да научите што се крие зад сите оние додатоци со ознаката Е.

Ако некој вегетаријанец некогаш ве одбил кога сте му понудиле гумени мечиња, тркалца со вкус на праска, гумени црви или шолја желе, веројатно знаете дека тоа е затоа што многу од овие производи се направени од желатин. Желатинот пак е направен од животинска кожа и коски.

Белгиската режисерка Алина Книпкенс создаде краток хорор филм со детали за начинот на производство на гумени бонбони. Видеото почнува од готова бонбона, за постепено да се открие неговиот крвав почеток.

Овој филм е еден од серијата кратки документарни филмови кои го превртуваат желудникот, документирајќи го начинот на кој се подготвува нашата храна. Филмовите од истата авторка за типичното белгиско јадење – зајачко со сливи и црн пудинг не се за оние со слаб желудник.

Ако гумените мечиња, тркалцата со вкус на праска или гумените црви се некои од вашите омилени задоволства, ве покануваме да престанете да читате сега. Начинот на кој се прават повеќето бонбони на база на гума може да ве вознемири, пишува Huffpost.

Секако, постојат вегански замени за желатин, а со нив се прават и некои слатки. Агар (исто така наречен агар-агар) е популарна замена за желатин добиена од алги.

Затоа, не очајувајте – има неколку вегански опции во продавниците што можете да ги пробате.