Потребно е малку повеќе време за да се подготви домашен квасец отколку што би потрошиле за подготовка на леб, но конечниот резултат ќе ве воодушеви. Лебот од кисело тесто, како што се правеше порано, е многу поздрав и повкусен од оној што го јадеме денес, единствено што неговото правење бара малку повеќе време. Влезете во авантура – напорот ќе се исплати.

Еве 3 начини на кои можете да подготвите домашен квасец:

Со брашно и вода

Во сад измешајте неколку лажици интегрално брашно и млака вода во ретко тесто. Во текот на следните 4 дена, зголемувајте ја количината на смесата, повремено мешајќи. Ќе видите дека габите од брашното и воздухот си го направиле своето – ќе се појават меурчиња и тестото почнува да расте. Околу 250 гр се доволни за еден леб.

Додадете во остатокот уште брашно и вода, оставете го процесот да продолжи до следниот ден, потоа покријте го садот и чувајте го во фрижидер до следната употреба.

Со јаболка

Изрендајте го јаболкото и измешајте го со 500 гр брашно и млака вода, за да добиете многу меко тесто. Покријте го со чиста крпа и по 3-4 дена ќе видите дека тестото нараснало. Искористете половина, а остатокот ставете го во фрижидер до следната употреба.

Со кефир

Ако имате домашен кефир, измешајте една чаша со 100 гр брашно и оставете да ферментира еден ден. Оваа количина е доволна за да направите еден здрав и вкусен домашен леб.

Колку пати ви се случило да откриете дека дома немате квасец, а веќе сте ги извадиле сите останати продукти за да ја направите својата омилена погача или некое друго задоволство?

За да не ви се случува ова никогаш повеќе, квасецот можете да го направите и сами и секогаш да бидете подготвени за вашите омилени рецепти. Она што е важно е да се измешаат состојките во стаклен сад и да се чува квасецот во него. Не е пожелно да биде од пластика.

Состојки:

1 шолја брашно
1 шолја млака вода
1 лажица шеќер

Приготвување:

Измешајте ги сите состојки во мазна маса, покријте со газа или фолија и оставете на топло, само внимавајте да не е на директна топлина, бидејќи тоа го убива квасецот. Процесот на ферментација трае 3-7 дена, во зависност од тоа кое брашно сте го користеле и дали сте додале шеќер. Готово е кога ќе се појават меурчиња и кога ќе го почувствувате познатиот мирис на вриење.

За еден килограм брашно ќе ви требаат околу две лажици домашен квасец. Доколку сакате секој ден да имате при рака квасец, во теглата со домашен квасец можете секој ден да додадете по половина шолја млака вода и брашно. Така ќе го „храните“ секој ден и ќе имате постојано производство. По додавањето треба да ја измешате смесата со дрвена лажица.