Рецепт за класичен сладолед од ванила

Состојки:

200 мл млеко

200 мл слатка павлака

50 г шеќер

3 жолчки

неколку мешунки од ванила

Подготовка:

Изматете ги жолчките со шеќерот додека не се добие пенаста смеса. Загрејте го млекото со павлаката и мешунките од ванила. Пред да зоврие, извадете ја мешунката од ванила, префрлете во садот со јајцата, мешајќи. Ставете ја смесата да се вари на пареа и мешајте додека не се згусне, внимавајќи да не зоврие. Оставете да се олади, а потоа ставете ја во замрзнувач еден до два часа. Кога кремот ќе се стегне, извадете го од садот, блендирајте на ниска брзина неколку минути. Вратете го во замрзнувачот и повторете го процесот два или три пати во интервали од еден час. Сервирајте украсено со чоколадо и шлаг.

Рецепт за лесен сладолед од кокос
Состојки:

275 мл полномасно кокосово млеко

350 мл свежа павлака

2 јајца

2 жолчки

5 мл / 1 лажичка екстракт од ванила

50 г шеќер

сол

За декорација:

50 г кокосово брашно, пржено додека не добие златно-кафеава боја

гранче нане

Подготовка:

Варете ги полека кокосовото млеко и павлаката на средна температура 5 минути. Изматете ги јајцата, жолчките, ванилата, шеќерот и солта. Ставете длабок сад врз поголем сад со врела вода. Истурете ја смесата од јајца во длабокиот сад и полека додадете ја и топлата смеса од кокосово млеко и павлака. Промешајте и гответе на пареа додека смесата не се згусне доволно за да не паѓа од лажицата. Тргнете од оган. Мешајте повремено додека смесата се лади. Кога доволно ќе се олади, ставете ја во замрзнувач 1 час. Извадете од замрзнувачот, блендирајте додека не добиете кремаста смеса и вратете ја во замрзнувачот додека не се стврдне. Сервирајте во чинии, наросено со пржено кокосово брашно и со гранче нане.

Кога ви се јаде нешто слатко, а не сакате да јадете купечки сладоледи полни со шеќер и калории, решението лежи во здрав домашен сладолед кој е толку вкусен што ќе го јадат дури и најпребирливите, па дури и децата. Освен тоа, нема да ѝ наштети на вашата става.

Здрав сладолед

Ако сакате сладолед, но сакате поздрава верзија, имаме две различни верзии на рецептот – чоколадна и розова! Со овој рецепт, можете да уживате во сладолед без грижа на совест. Се подготвуваат многу брзо, а вкусот е совршен!

Состојки за сладолед од чоколадо:

замрзнати банани
грчки јогурт
крем сирење
какао
мед
екстракт од ванила
Приготвување:

Првиот чекор пред да започнете со рецептот е да ја исечете бананата на помали парчиња и да ја замрзнете. Ставете ги замрзнатите банани во блендер и добро изблендирајте. Додадете грчки јогурт, една или две лажици какао, крем сирење, екстракт од ванила, мед и блендирајте сè заедно во блендер додека не се соединат сите состојки. Истурете во сад и по желба наросете со помали парчиња чоколадо одозгора. Ставете во замрзнувач. Нашиот чоколаден сладолед е готов!

Состојки за розов сладолед:

грчки јогурт
крем сирење
замрзнати јагоди
мед
екстракт од ванила
Приготвување:

Ставете ги замрзнатите јагоди во блендер и добро изблендирајте. Додадете грчки јогурт, екстракт од ванила и мед и повторно добро измешајте сè. Ставете во сад и оставете во замрзнувач.

Во текст на Радмила Гајиќ Ѓорѓевиќ, прехранбен технолог од Србија, која долго работела во фабрика за сладолед во поранешна Југославија, таа зборува за некогашниот сладолед и она што денес се нарекува така, но нема врска со вистинскиот сладолед. Имено, како што вели таа, „некогаш се земаше здраво за готово дека сладоледот се прави од млеко, јајца и путер, но денес, на мое жалење, се случија големи промени во тој дел, како и во останатите и во сите други делови од индустријата. Денес, сладолед може да се направи од сè и сешто“.

Меѓудругото, таа на крајот дава и два одлични рецепти за оние кои сакаат да се потсетат на вкусот на вистинскиот сладолед.

Сладолед од млеко

Состојки:

4 жолчки
2 лажици шеќер во прав
1 лажиче пченкарен скроб
570 мл свежо млеко
50 г путер
Неколку капки екстракт од ванила

Приготвување:

Жолчките се матат со шеќерот, па се додава скробот. За тоа време загрејте го млекото во кое сте го додале и путерот додека не зоврие и тргнете го од шпоретот. Додадете го млекото во жолчките со постојано мешање. Целата смеса вратете ја во тенџере и варете ја на тивок оган со постојано мешање со дрвена лажица додека не стане кремаста. На тој крем можете да додадете стопено чоколадо, мешани јагоди, малини, што сакате.

Ставете ја смесата во замрзнувач и кога ќе биде полузамрзната, извадете ја од замрзнувачот, добро измешајте ја, па повторно вратете ја во замрзнувач. Можете да го повторите ова уште неколку пати ако не ви е тешко. Така добивате убава, мазна маса за сладолед, без замрзнати иглички.

Крем сладолед
Состојки:

4 жолчки
4 лажици шеќер во прав
1/2 л слатка павлака (две пакувања од по 250 мл)
50-100 гр чоколадо
Неколку капки екстракт од ванила

Приготвување:

Матете ги подолго жолчките со шеќерот, па додадете ја неизматената павлака и варете ја смесата на пареа со постојано мешање додека не се згусне како крем. По желба во оваа смеса можете да додадете и растопено чоколадо. Тргнете ја од оган и мешајте ја смесата додека не се излади. Оваа смеса ставете ја во замрзнувач и оставете добро да се стегне. Ќе добиете убав замрзнат крем, без оние ледени иглички. Не мора да ја вадите и да го повторувате мешањето со миксер.