Госпоѓа Катица Луетиќ, инаку, свекрва на сестра ми и баба на внук ми, која одамна од својата родна Славонија се преселила во Загреб, сѐ уште се сеќава на своето омилено јадење – кнедлите со сливи. Секогаш кога ги подготвувала дома за најблиските, тие ѝ ги враќале познатите вкусови и мириси од детството. За нас е интересно тоа што таа овие кнедли не ги подготвуваше како десерт, туку како омилен сладок дел од ручекот.

Останува како анегдота да се прераскажува денот кога нашиот помал брат кој беше во војска во Загреб (онаа старата војска, ЈНА), дошол на ручек кај семејството Луетиќ, а тие на маса најпрвин ги извадиле кнедлите со сливи, како посебен специјалитет за драгиот гостин. За среќа, не биле само кнедлите со сливи и шеќер, ама сите убаво се изнасмеале кога го здогледале изразот на лицето на нашиов скопјанец кој желен за вкусна домашна храна, не можел да го скрие разочарувањето кога ги видел слатките кнедли.

Бидејќи се сега актуелни сливите, се потсетивме на вкусот на оние славонските, од кујната на баба Катица и го обезбедивме за вас нејзиниот рецепт со кој нема шанси да згрешите.

За 50 кнедли ќе ви требаат:

1.100 гр пире од компири (ви требаат за ова околу 1.300 грама компири)
450 гр бело брашно
2 јајца
50 сливи со извадени семки
3 лажици свинска маст
300 гр лебни трошки
100 гр шеќер

Приготвување:
Во изладеното пире од компири додадете две јајца и убаво измешајте. Додадете брашно и замесете го тестото. Ако тестото ви е многу лепливо, слободно додадете 1-2 лажици брашно или набрашнете ги рацете и така направете топчиња за да бидат меки кога ќе ги сварите.

Имате две опции кога станува збор за формирање на кнедлата. Првата е да се расука тестото на работната површина, да се исечат квадрати колку да може сливата да се вклопи внатре (зависи какви сливи имате), да ја ставите сливата на средина, па да ја свиткате во топка, односно, кнедла. Друга опција, а токму оваа е таа која ја применуваше госпоѓа Катица, е да од тестото со лажица и да го раширите на набрашнетата рака, да ставите слива, да ја завиткате и да ја обликувате тркалајќи ја меѓу двете набрашнети раце.

Ставете ги кнедлите на лесно набрашнета хартија за печење. Кога ќе ги формирате сите кнедли, ставете ги во тенџере со зовриена вода. Секогаш избирајте поголемо и поплитко тенџере и наполнете го до половина со вода. Посолете малку и кога водата ќе зоврие, полека и нежно ставете ги кнедлите и варете ги додека не излезат на површина, околу 7-10 минути.

Додека се варат, подгответе ја смесата за валкање на кнедлите. Во длабока тава растопете ја свинската маст и во неа пропржете ги презлите. Доволни се неколку минути, само малку да потемнат. Сварената кнедла исцедете ја и веднаш ставете ја во тавата со трошките и нежно извалкајте ја! При послужување, поросете ја со шеќер.

Ако ви се многу, дел од кнедлите оставете несварени и замрзнете ги. Наредете ги на плех обложен со хартија за печење и ставете сè заедно во замрзнувач на 1 час за да се стегнат и да не се лепат една со друга, а потоа спакувајте ги во кесички и вратете ги во замрзнувач. Слободно гответе ги замрзнати, само ќе потрае малку повеќе.

Има многу нијанси во приготвувањето на кнедлите, но она со што се согласуваат речиси сите, е видот на компирите од кои се прават. Најдобри компири за кнедли се старите. Некои ги јадат со павлака и со шеќер, а други со цимет и ванилин шеќер.

Рецептите за традиционалните кнедли се пренесуваат од генерација на генерација, па така некои домаќинки пирето од компири и брашно го месат со маргарин, некои со зејтин, некои со свинска маст, а некои со путер.

Ако користите густин наместо брашно, на 500 г компири одат околу 35 грама густин, 2 јајца и 25 грама растопен путер. За да не ви се лепи тестото за раце при обликувањето на кнедлите, можете да ги набрашните, да ги натопите со вода или да ги намрсите.

За да бидат совршени, ставете ги компирите пред да ги згмечите во пире, во загреана рерна на 160°C а потоа исклучете ја. Оставете ги компирите внатре околу 15 минути, за да се извлече вишокот вода.

Еве кои се најчестите грешки при правењето на кнедли:

Употребувате погрешно брашно

За да бидете сигурни дека кнедлите нема да бидат како гума, правете ги со остро брашно, наместо со меко.

Не го месите доволно тестото

Тестото од компири добро измесете го на подлога поросена со брашно.

Ги правите со количини „од око“

Тоа е во ред ако веќе безброј пати сте правеле кнедли и го имате рецептот во малиот прст, но за да не ви излегуваат секогаш различно, најдобра варијанта е да ги измерите состојките и да се придржувате до рецептот.

Зелените сливи или кајсии нема да пуштат доволно сок и арома па треба да им се даде доволно време да созреат.

Не додавате сол

За да не биде тестото без вкус, додадете и прстофат сол кој ќе ја нагласи блажината на соковите од сливите.

Ги варите премногу долго или премногу кратко

Ставете ги кнедлите во зовриена вода и варете ги додека не испливаат на површината, па потоа уште 2 минути.

Правите преголеми кнедли

Преголемите кнедли лесно се распаѓаат, а истото важи и во случај да користите големи сливи во комбинација со премало тесто. Пред ставањето во вода погледнете дали секоја слива е добро опфатена со тестото.

Оставате грутчиња во пирето

Компирите за пире згмечете ги низ преса, а ако ја немате, иситнете го секој компир посебно со гмечалка. Пирето мора да биде добро испасирано.

Месите топло пире

Пред да почнете да го месите тестото, оставете го пирето добро да се олади. Некои домаќинки го оставаат тестото да се одмори и неколку часа.