Почнавте да го подготвувате вашиот омилен колач и на средина од мешањето на состојките сфативте дека немате прашок за пециво? Не грижете се, оваа леста незгода не мора да ги уништи вашите десерти.

Решението веројатно е веќе во вашиот фрижидер или во кујнските фиоки. Со помош на основни состојки и едноставни хемиски реакции што секој може лесно да ги примени, вашите колачи ќе бидат меки, лесни и воздушести како и обично.

Прашокот за пециво за нараснување тесто содржи сода бикарбона (база) и кисела компонента (како винска киселина). Кога ќе дојде во контакт со течност, се јавува хемиска реакција што ослободува меурчиња на јаглерод диоксид. Овие меурчиња се задржуваат во структурата на тестото, создавајќи лесна и воздушеста текстура. Од друга страна, содата бикарбона делува исклучиво како база и не е доволна сама по себе – за да се предизвика истиот ефект, потребно е додавање на кисела состојка, пишува Real Simple.

Сода бикарбона и сок од лимон
Една од најбрзите и најефикасните замени за прашок за пециво е комбинацијата од сода бикарбона и свеж сок од лимон. Лимонската киселина од сокот веднаш реагира со содата, создавајќи ги потребните меурчиња. За секоја лажичка прашок за пециво што е наведена во рецептот, користете четвртина лажичка сода бикарбона и половина лажичка сок од лимон.

Клучот за успех е брзината. Измешајте ја содата бикарбона со сувите состојки, а сокот од лимон со влажните состојки. Штом ќе ги споите двете смеси, реакцијата започнува. Затоа е клучно веднаш да го ставите тестото во загреаната рерна. Овој метод е идеален за рецепти каде што благата, освежителна цитрусна нота нема да смета на вкусот, како што се пандишпан колачи со лимон или едноставни мафини.

Сода бикарбона и јогурт
Друг сигурен метод вклучува употреба на јогурт. Млечната киселина во обичниот, незасладен јогурт делува како совршен активатор за сода бикарбона.

За да замените една лажичка прашок за пециво, измешајте четвртина лажичка сода бикарбона со сувите состојки и додадете околу 120 мл јогурт во влажните состојки. Бидејќи додавате значителна количина течност, ќе треба да го прилагодите рецептот со намалување на другата течност (како млеко или вода) за истата таа количина.

Како и со сокот од лимон, тестото треба да се испече веднаш по мешањето. Јогуртот не само што помага при нараснувањето, туку му дава и богата, влажна текстура, што го прави одличен избор за палачинки, вафли и разни видови брзи лебови.

Доколку одлучивте да им дадете приоритет на природните состојки, сувото и свежото овошје оваа празнична сезона, тогаш пробајте ги рецептите кои ви ги претставуваме подолу.

Исто така, нутритивно побогатите верзии на колачи нема да предизвикаат толкава желба за слатки, дигестивни проблеми и пад на енергијата.

Колач со урми и јаболка

За овој едноставен колач ќе ви требаат само неколку состојки, а голема е веројатноста веќе да ги имате дома.

Покрај јаболката и урмите, додаваме цимет и ореви, што не враќа во традиционалната зимска рапсодија на вкусови за која вообичаено се грижеле нашите мајки и баби.

Состојки:
200 гр урми
2 рендани јаболка
100 гр интегрално брашно
2 јајца
100 мл масло
1 лажичка прашок за пециво
половина лажичка цејлонски цимет
половина шолја сечкани ореви
прстофат сол.

Подготовка:
Урмите потопете ги во млака вода 10 минути за да омекнат, а потоа исцедете ги, извадете ги семките и измелете ги во блендер до текстура што може да се мачка.
Потоа во сад измешајте ги изблендираните урми, две јајца, ренданите јаболка и маслото во изедначена смеса.
На претходните состојки додадете ги сувите состојки – брашното, циметот, солта и прашокот за пециво и соединете ја смесата.
Во смесата измешајте сечкани ореви, а потоа истурете ја во сад за печење обложен со хартија за печење.
Печете го колачот во рерна на 180 °C до 40 минути и проверете со чепкалка дали е печен.
Пред сервирање оставете го колачот малку да се излади.

Зимски куглоф од урми и јаболка
Најубавото нешто на празничната трпеза е да видите куглоф украсен со шеќер во прав.

Овој куглоф е посебен и поради многуте зимски зачини од кои ќе мириса целата куќа.

Состојки:
200 гр урми
2 рендани јаболка
100 гр шеќер од кокосов цвет
100 мл стопено кокосово масло
200 гр спелтино брашно
3 јајца
1 лажичка прашок за пециво
половина лажичка сода бикарбона
1 лажичка цејлонски цимет
половина лажичка ѓумбир во прав
1/4 лажичка морско оревче
1/4 лажичка мелено каранфилче
100 мл цеден сок од портокал
половина шолја сечкани бадеми
50 гр суви брусници.

Подготовка:

Урмите потопете ги во млака вода 10 минути, а потоа исцедете ги, извадете ги семките и исечкајте ги во блендер.
Во еден сад мешајте ги јајцата и шеќерот додека не се запенат, а потоа додадете го кокосовото масло, ренданите јаболка, урмите и сокот од портокал и мешајте додека не се изедначи.
Во друг сад измешајте ги сувите состојки – зачините, брашното, прашокот за пециво и содата бикарбона.
Постепено додавајте ги сувите состојки.
Во смесата измешајте ги сечканите бадеми и сувите брусници.
Подмачкајте го калапот за куглоф и истурете ја смесата во него.
Печете го куглофот во загреана рерна на 180 °C до 50 минути и со чепкалка проверете дали е готов.
Пред послужување оставете го куглофот да се излади и украсете го со шеќер во прав.

Ако во фрижидерот имате павлака, тогаш имате речиси сѐ што ви треба за овој вкусен колач со кремаст фил од павлака.

Под претпоставка дека другите состојки се основни намирници кои вообичаено сите ги имаме дома.

Едноставен, кремаст и толку уникатен – овој колач со фил од павлака ќе ви стане омилен.

Состојки за тестото:

2 жолчки
80 гр путер
70 гр шеќер
1 рендан лимон
200 гр брашно
1 лажичка прашок за пециво

Состојки за кремот:

2 белки
80 гр шеќер
400 гр павлака

3 лажици брашно

Приготвување:

Ставете ги јајцата во поголем сад, а потоа додадете шеќер и изматете ги рачна маталка.

Додадете го стопениот путер, а потоа продолжете да мешате додека не се соединат состојките. Додадете брашно, лимон и прашок за пециво, па рачно месете го тестото додека не добиете компактна смеса.

Од тестото направете две топчиња со иста големина, па завиткајте ги со проѕирна фолија и оставете ги во фрижидер околу 30 минути.

Изматете ги белките со шеќерот додека не добиете цврст снег, а потоа додадете павлака, па брашно. Мешајте додека не добиете соединет и фин крем.

Подмачкајте го огноотпорниот сад со путер и брашно, а потоа развлечете едно топче тесто по целата површина на садот, така што ќе се распредели рамномерно.

Истурете го филот врз тестото и раширете го рамномерно со лажица.

Изрендајте го другото топче тесто врз филот.

Ставете го во рерна и печете околу 35 минути на 180 степени Целзиусови.

Кога колачот е печен, поросете го со шеќер во прав и исечете го на коцки.

Подолу е и видеото во кое можете да го видите начинот на приготвување на овој вкусен колач.

Може да се каже дека овој десерт според формата е на некој начин „пита без дно“ – се подготвува со овошје како сливи, праски или вишни, но она што го разликува од пита е тестото, кое кога станува збор за коблер, не е тесто за пита, туку смеса за кекси.

Коблер потсетува и на крамбл и двата десерта се подготвуваат од овошје и во сличен формат, но разликата е во смесата што го покрива овошјето.

Во случај на крамбл, тоа е ронлива мешавина од кафеав шеќер, брашно и путер, на која се додаваат цимет, овес или јаткасти плодови за да се добие ронлива текстура, додека овошјето во коблерот се покрива со смеса за кекси со помош на лажица, што ја прави текстурата помазна и послична на бисквит.

Се верува дека коблерот се развил во 19 век од традиционалните британски пудинзи, кои се подготвувале од брашно и маснотии, можеле да бидат солени (најчесто исполнети со месо во сос) и слатки, а најпознат пример е британскиот божиќен пудинг (Christmas suet pudding).

Овој десерт традиционално се полнел со сушено овошје како суво грозје, а подоцна британските доселеници во Америка импровизирале со подготовката, па ги користеле состојките што ги имале при рака.

Овошјето станало подостапно, а се претпоставува дека рецептот за бисквитната смеса што се користела за покривање на овошјето во коблерот се должи на влијанието на Американците.

Како се подготвува

Со изборот на овошје не можете да погрешите, а можете да комбинирате и неколку компатибилни видови, на пример комбинација од кисело и слатко овошје.

Важно е да се подготви доволна количина бидејќи за да подготвите калап со просечна големина за неколку луѓе ќе ви требаат од 500 до 800 грама, во зависност од големината на садот за печење.

Најдобро е да подготвите овална, огноотпорна или керамичка чинија.

Овошјето исчистете го, исечете го, додајте шеќер, цимет, скроб во количина во зависност од сочноста на овошјето (малку повеќе ако работите со бобинки или сливи) и сè убаво измешајте.

Смесата со која ќе го премачкате овошјето треба одвнатре да биде лесна и мазна, за да може да ги впие соковите од овошјето, а по печењето да има златна боја и цврста текстура.

За оваа смеса можете да го искористите и омилениот рецепт за колачиња, а доколку немате, измешајте брашно, прашок за пециво, полномасна слатка павлака и мешајте додека не добиете цврста смеса.

Покријте го овошјето со смесата и земајте поголеми количини со лажица, идеално со лажица за сладолед.

Не грижете се ако не сте прекриле рамномерно со смесата, бидејќи коблерот се препознава по овошјето кое испушта меурчиња кои излегуваат на површина при печењето, па не треба се да покривате, ниту пак треба да биде уредно.

Поради изобилството на овошје, овој десерт се пече доста долго, помеѓу 45 и 55 минути на 180°C, додека овошјето не почне да пушта меурчиња, а горниот слој не добие златна боја и не се зарумени.

Традиционално се служи додека е уште топол, со сладолед од ванила.

Кое овошје е најдобро да се избере?
Праските традиционално се добар избор, тие се сочни и слатки, а доколку немате време да подготвите свежи праски, овој десерт можете да го подготвите и со праски од компот.

Комбинацијата од шумско овошје, боровинки, капини, малини, рибизли и јагоди е исто така популарен избор.

Се вели дека јаболката испуштаат најмалку течност, додека сливите и бобинките ќе испуштат најмногу, така што ќе треба малку подолго да го печете коблерот со такви плодови.

Слично е и со користењето на замрзнато овошје, а доколку го користите, имајте на ум дека ќе ослободи повеќе течност и на тој начин десертот ќе бара подолго печење.

Еден од најпопуларните летни рецепти со овошје е рецептот за коблер кој го развиле Британците во САД кон крајот на 19 век, а денес е популарен и во двете земји, но и во светот.

Брзо, лесно за подготовка и сочно, а можете да го подготвите со секое овошје по ваш избор – праски (и компот од праски), цреши, шумски плодови, малини, боровинки, јаболка или караница.

Еве што ви треба а да го направите овој лесен овошен колач

За тестото:
250 грама обично брашно
2 лажици шеќер
1 прашок за пециво
1 лажичка сол
350 мл слатка павлака
1 прстофат сол

За филот:
500 г овошје
2 лажици густин
1 лажичка цимет
1 кесичка ванилин шеќер
75 г шеќер

Наместо јогурт или млеко, употребете кефир. Иако кефирот како и јогуртот содржи млечни ферменти и пробиотици, ќе му даде на колачот сосема поинаков вкус и оригиналност.

Состојки:

250 гр сливи
315 гр брашно
3 лажички прашок за пециво
90 гр кафеав шеќер (+ 2 лажици за крај)
60 гр путер стопен на собна температура
250 гр кефир
2 јајца
морско оревче по вкус
рендана кора од 1/2 лимон

Приготвување:

Загрејте ја рерната на 180°. Во сад просејте го брашното заедно со прашокот за пециво.

Додадете малку морско оревче, изрендано по вкус.

Во друг сад изматете ги јајцата и кафеавиот шеќер со миксер.

Измешајте ги кефирот, растопениот путер на собна температура и ренданата кора од лимон, па додадете ги брашното и прашокот за пециво и измешајте го тестото со лажица да се изедначи.

Сè ставете во калап со дијаметар од 22 цм, претходно премачкан со путер и поросен со брашно и внимателно израмнете го.

Сливите исечкајте ги на коцки и распоредете ги по површината на тестото.

Поросете ги со преостанатите 2 лажици шеќер и печете околу 30-35 минути.

Оставете да се излади на решетката, а потоа префрлете го колачот на чинија и послужете.

Она што е најдобро во овој колач е брашното од наут кое е одлична и многу поздрава замена за белото брашно, бидејќи содржи повеќе нутриенти – витамини, минерали, влакна и протеини. Тоа е исто така помалку калорично и содржи помалку јаглехидрати. Исто така, ова брашно не содржи глутен, па е прифатливо за луѓето со интолерантност кон овој протеин. Некои истражувања покажуваат дека и само делумна замена на брашното од пченица со брашно од наут, кај лица кои немаат проблем со глутенот, може значително да ја подобри нутритивноста на јадењата.

И на крајот, брашното од наут содржи и повеќе протеини, дури и од интегралното пченично брашно. 

Еве го и рецептот:

Состојки:
2/3 шолја стопен путер
1/2 шолја темно чоколадо
3 јајца
3/4 шолја шеќер
1/2 лажичка сол
4 лажици какао во прав
3/4 шолја брашно од наут
1 лажичка инстант кафе

Приготвување:
Загрејте ја рерната на 175°C. Подмачкајте ја тепсијата за печење.

Растопете ги путерот и чоколадото и убаво измешајте. Во сад се ставаат јајцата и шеќерот и се мешаат со миксер 2 до 3 минути. Додадете ја смесата од темно чоколадо и путер, солта, какаото, брашното и кафето. Добро измешајте и истурете ја смесата во тепсијата за печење.

Печете 30 до 35 минути, извадете ја од рерната и оставете да се излади целосно пред послужување.

Овој колач е празнична класика, но овојпат во интересна, многу ароматична и здрава варијанта. Исклучително лесно и брзо се подготвува, а можете да го послужите за појадок или ужина за целото семејство.

Смесата подготвена по овој рецепт може да се подели и на мали калапи за мафини и на тој начин да се подготви здрава ужина која децата ќе можат полесно да ја изедат или да ја понесат со себе.

Состојки: (за 8 лица)

300 г свежи моркови

180 г брашно

60 г мелени бадеми

140 г путер од кикирики

3 јајца

150 г шеќер

1 пакетче прашок за пециво

рендана кора од еден портокал

прстофат сол

шеќер во прав

Приготвување:

Морковите се мелат во блендер, па се додаваат путерот и жолчките и се продолжува со мешање додека не се добие портокалов крем. Во посебен сад се матат белките и шеќерот, се додаваат ренданата кора од портокал и портокаловиот крем од моркови и се меша уште еднаш.

Во смесата се додаваат мелените бадеми и брашното измешано со прашокот за пециво и уште еднаш убаво се мешаат сите состојки.

Калап во форма на венец или калап за куглоф со дијаметар од 24 цм се премачкува со путер и се поросува со брашно. Истурете ја смесата во калапот и печете во рерна загреана на 175 степени 35 до 40 минути.

Проверете со чепкалка дали тестото е печено пред да го извадите колачот. Ако чепкалката излезе сува, тоа значи дека колачот е испечен и можете да го извадите.

Оставете го малку да се излади и потоа извадете го на плех. Поросете со шеќер во прав и послужете.

Можете да го премачкате и со чоколадо. На пареа растопете 140 грама чоколадо за готвење, една лажичка мед и 80 грама путер. Прелијте го венецот и ставете го во фрижидер да се стегне. На собна температура, оваа торта може да трае една недела.

Ако ја изгубивте инспирацијата за готвење посни оброци, еве неколку рецепти за посно мени кои ќе ви ја разбудат фантазијата и ќе го зголемат бројот на јадења кои ќе ги вклучите во вашата исхрана. За оние привремени вегани, кои постат за време на божикниот пост, но и за оние кои се вегани врз основа на други причини, здравствени, етички или еколошки. А овие рецепти се само доказ дека може да се направат многу вкусни оброци и без месо, но и генерално, без никакви животински производи.

Нашите предлози содржат паштета од ореви, ќофтиња од грав и овошен колач со тофу. Се надеваме дека сите рецепти ќе ви послужат како инспирација и дека ќе уживате во нив.

Паштета од ореви
Состојки:

200 г мелени ореви
зачин од мешан сув зеленчук
сол

црн пипер

лук
сенф
вода

Приготвување:

Попарете ги со малку врела вода оревите, зачинот од зеленчук и солта, за да добиете густа паста, додадете црн пипер, пасиран лук, малку сенф и сè добро измешајте.
Паштетата најдобро одговара со домашно лепче или со двопек.

Ќофтиња од грав:
Состојки:
грав
масло
праз
сусам

сол
црн пипер

Приготвување:
Гравот исцедете го и добро изгмечете го со раце или со гмечалка за пире. Посолете и направете топчиња (ќофтиња).
Исечкајте го и пропржете го празот на масло, додадете црн пипер и лук и распоредете го во тепсијата за печење.
Одозгора наредете ги ќофтињата од грав, по желба пороете со сусам, поклопете и печете.
За време на печењето проверувајте да не изгорат ќофтињата.

Овошен колач со тофу сирење
Состојки:
400 г тофу сирење
75 г кафеав шеќер
половина лажичка екстракт од ванила
125 г маргарин
рендана кора од лимон
40 г пченкарен скроб (густин)
100 г замрзнати бобинки

Приготвување:
Омекнете го маргаринот на собна температура.
Во сад за матење ставете парчиња тофу сирење, додадете кафеав шеќер, рендана кора од лимон, пченкарен скроб, маргарин, екстракт од ванила и измешајте со миксер.
Кога смесата ќе стане подеднакво кремаста, истурете ја во калап (со дијаметар од 20 сантиметри) обложен со мрсна хартија и израмнете ја со шпатула.
Замрзнатите бобинки одмрзнете ги, добро исцедете ги, распоредете ги врз колачот и печете во рерна загреана на 180 степени околу 50 минути.
Изладете го колачот, исечете го на парчиња и послужете.

Денеска ви носиме рецепт за фантастичен колач со леблебија – без брашно, со какао и сок од портокал. Овој рецепт е за сите оние кои го исклучиле глутенот од исхраната, бидејќи сите состојки се без глутен. Тортата е прекрасна и сочна и сама се топи во устата. А вкусот на чоколадото и портокалот обично е неповторлив…

Сочен колач со наут, чоколадо и портокал
Состојки:

1 шолја (250 мл)
60 дкг исчистен наут
сок од 2 портокали
120 мл вода
8 јајца
2 шолји шеќер
2 лажички прашок за пециво
1 шолјичка какао во прав
рендана кора од 2 портокали
4 лажици масло
15 дкг црно чоколадо за прелив

Приготвување:

Наутот истресете го од конзервата и исчистете го од лушпите под благ млаз вода. Овој процес е малку потежок бидејќи треба да се ослободите од сите лушпички. Наутот избришете го со кујнска хартија од остатокот од водата.
Наутот, цедениот сок од портокал и водата се ставаат во блендер. Измешајте сè за да добиете убава, густа смеса.

Во сад се мешаат јајцата, се додава кашата од наут, шеќерот, прашокот за пециво, маслото, какаото и на крај ренданата кора од портокал. Сè добро измешајте.

Истурете ја смесата во калап за колачи со дијаметар од 24 цм и малку потчукнете го калапот на работната плоча за да се ослободат воздушните меури во тестото. Потоа ставете да се пече во загреана рерна на 180 C 50-60 минути. Проверете со чепкалка дали е печено.

Во помал сад направете ганаш од црно чоколадо и слатка павлака, па прелијте го оладениот колач.

Нашата редовна читателка и соработничка кога станува збор за споделување на нејзините рецепти, Лихнида Дамовска која инаку, живее отаде големата бара каде што ги провоцира сетилата на соседите со замамните мириси од нејзината кујна, ни испрати уште еден рецепт. Само кога ќе го погледнете, ќе ви отвори апетит. Иако звучи обично, односно, станува збор за куглоф, секако не е баш обичен куглоф. „Тестото е топ, фантазија, најдобро до сега“, вели Лихнида во описот, а бидејќи е голема гурманка, во потполност ѝ веруваме дека е така.

Според неа, тајната е во долгото матење на јајцата и шеќерот, барем 10-15 минути со миксер. Додека сѐ друго потоа се меша исклучиво со лажица. Исто така, вели дека може да се прави и со друго овошје, по ваша желба, но никако со замрзнато.

Додека таа го направила со 700 г свежи боровинки и малини, нејзината ќерка Сташа имала успешен колач по овој рецепт со 5 јаболки и цимет и малку ореви.

Состојки:

(Мерките се со шолја за кафе од 100 мл)

3 ипол шолји брашно

1 прашок за пециво

2 шолји шеќер

4 јајца

1,5 шолја павлака

1 лажица екстракт од ванила

3/4 шолја масло

700 г боровинки, малини или јагоди

Приготвување:

Јајцата и шеќерот се матат со миксер околу 10-15 минути. Потоа се додаваат другите состојки, малку по малку, а се меша со лажица.

На крајот се додава овошјето и се става смесата во подмачкан калап за куглоф или во обично тавче со размер од 22 цм.

Печете во загреана рерна на 180 степени околу 50 минути. Проверувајте со чепкалка дали е печен, а времето за печење може да е различно во зависност од рерната, но отприлика од 40 до 60 минути.

Не го сечете додека не се олади.