Колку пати сте слушнале за овие 4 правила кои би требало да ги почитувате ако сакате да сте здрави?
1. Не јадете црвено месо, тоа е канцерогено
2. Јадете само сирова храна
3. Користете Б17 против ракот
4. Вакцините се опасни
Д-р Зоран Вујчиќ, редовен професор на Хемискиот факултет во Белград има свој блог кој го отворил со цел да се разбијат митовите за „лековитите препарати“, „епохалните“ откритија, сите дилеми во врска со правилната исхрана, „чудотворните“ лекови, здравите и штетните навики. Тој се фаќа во костец со сите оние неаргументирани и неточни информации кои со години наназад се појавуваат во медиумите и на социјалните мрежи.
Идејата да пишува на оваа тема ја добил од интеракцијата со неговите студенти кои, како што вели тој, му доаѓале со заблуда дека, на пример, жолтиот шеќер е поздрав од белиот, дека млекото со варење може да се претвори во сулфурна киселина, дека петролејот може да излекува рак. Сепак, главна причина бил коњскиот шампон, кој почнал да се продава како чудесен шампон од кој на ќелавите ќе им порасне коса. Неговата сопруга тогаш му рекла дека би морал да напише нешто за луѓето да не им веруваат на тие глупости. Така се родила идејата за неговиот блог, иако, како што вели, Фејсбук е уште поефикасен во вистинската борба против разни измамници кои продаваат Б17, петролеј, сомнителни капсули од сѐ и сешто против рак, шеќерна болест и други здравствени проблеми.

Дали постои здрава исхрана?

Според Вујчиќ, не постои здрава исхрана туку таа може да е само помалку или повеќе нездрава.

„Човечкото незнаење е чудо. Ајде да видиме како млекото, шеќерот, солта, маснотиите, брашното можат да предизвикаат смрт. Како? Па, постои можност човек да се удави во млеко, да му се залепи шеќер во грлото, да се лизне на маснотии и да ја удри главата на некој раб.

Сите овие намирници се исто толку смртоносни како и сите други. Да беа толку опасни, немаше да бидеме тука. Што јадеше народот? Житарки, месо, масти. Но, ако некој претера со солење на храната, ќе му се зголеми крвниот притисок. Ако јаде постојано и многу масти, холестеролот ќе му се покачи. Но, ако јаде сѐ што е масно на масло, тоа може да предизвика воспалителни реакции. Како и секогаш, тајната е толку едноставна, што е едноставно неверојатно. Умереност, разновидност и ако воопшто е можно, физичка активност. Мене многу повеќе ме плашат оние што јадат сиров храна, оние кои пијат супа од масни бадеми што некој по грешка ја нарече бадемово млеко, шетаат боси, применуваат уринарна терапија, се лекуваат хомеопатски и не ги вакцинираат децата. Ни се насмевнува средниот век“, вели тој и додава: „Замислете кога ќе купите од оние кокосови ореви кои веќе буѓосале на рафтовите од маркетите, или сте купиле зеленчук на кој му се симнува слој по слој додека скапува на тезгата. Сега, замислете сето тоа да го изматите и да направите смути кое ќе му го дадете на детето да го испие како здрав напиток. Се знае што може да се јаде сирово (на пример, бананите, но никако спанаќ). Со варење многу хранливи состојки стануваат подостапни, а се убиваат и многу патогени бактерии. Месото не е ништо поздраво, ниту понездраво од зеленчукот. Месото е полно со хормони, антибиотици и можни микотоксини. Зеленчукот е значително побогат со микотоксини, тешки метали, хербициди и пестициди. Токму како што сме и ние полни со сите тие хемикалии.
Црвеното месо вели тој е штетно доколку е тоа единствена храна. Претерувањето е клучот за генерирање на повеќето проблеми. Месните преработки се индустриска храна полна со адитиви, непотребни додатоци, палмино масло, стабилизатори, згуснувачи, вештачки бои и слично. Секако дека не е сѐ канцерогено, но некои супстанции едноставно се. Еве што им е заедничко на сировиот спанаќ (и на варениот но во помала мерка) и на колбасите, кренвишлите и паштетите – натриум нитрит. Дали е канцероген? Без сомнение. Сѐ е секогаш во дозата, а колку повеќе се внесува, ризикот е сѐ поголем“.

Дали едно јаболко на ден станува причина за одење на лекар и како да ги миеме намирниците?

Според д-р Вујчиќ, онаа максима дека едно јаболко на ден не чува од одење на лекар, повеќе не важи.

„Миењето на намирниците кои се прскани со разни хемикалии, не помага. Некогаш постоеше верзијата дека едно јаболко на ден и нема потреба за доктор. Сега сум сигурен дека е обратно. Едно јаболко дневно (се прска 26 пати во текот на производството) и сигурно ќе морате на лекар. Миењето треба да е кратко и овошјето треба веднаш да се изеде или зеленчукот веднаш да се обработи. Нашите стари не биле толку глупави кога го прскале овошјето со препарати од креч, а овошјето пред обработка го потопувале во креч. И јаделе варено слатко или пекмез. Водата најчесто не ги раствора тие соединенија кои се на површината од овошјето и кои се дел од општиот здравствен ризик. Ако производителот не ја почитува дозата, ете ги проблемите. И тука главен виновник е профитот. Многу сорти кои биле отпорни на болести не опстанале затоа што имале значајно помал принос. Здравствената исправност никому не му е важна. Ниту на производителите ниту на консументите. Што мислите, од каде толку болести: Пред сѐ, заради неадекватното хранење. Има ли крај на тоа? Секако. Секако, тоа ќе биде крај на цивилизацијата“, вели тој.
Според Вујчиќ, најдобро овошје е она кое полека се јаде и се џвака, па и соковниците се тука само заради профит.

„Обичните соковници се сосема во ред и нема потреба да се фрлаат пари на најнови модели. Иако, најдобри се оние соковници кои ги даваат одвоено сокот и пулпата. Таа пулпа е одличен концентриран извор на влакна. Сокот од јаболки (оние кои се прскани 26 пати) е секогаш одличен“, вели Вујчиќ.
И на крајот, за комбинирањето на намирниците за кое се зборува, како и за приказната за базни и кисели намирници, доктор Вујчиќ вели дека се мит.
„Мит, маркетинг религија. Киселината и базата се ноторни глупости, кои ги лансирале публицистите со измислената приказна дека уште во 1934 година научниците го тврделе тоа. Не го тврделе. Ако pH вредноста на крвта се промени за повеќе од 0,1 pH единица (нормална е 7,3-7,4), се јавуваат сериозни здравствени проблеми. Замислете како човек пие лимонада и веднаш му се менува pH вредноста. Ако тоа е вистина, тој би умрел побрзо отколку да е во прашање анафилактичка реакција“.

За ракот и за чудотворните лекови

Според д-р Вујчиќ, ракот е болест со многу лица. И постојат многу начини на настанување. Од хемиските агенси, на пример, чадот од цигари како збир од цела шума соединенија, до многуте адитиви во храната и ризичните соединенија во водата и пијалаците. Тука се и онковирусите, пиралените и илјада други ризици. Суштината е во полудените клетки кои се множат без контрола. Значи дека организмот ги изгубил особините за контрола и елиминација. Нема никаква врска со фејсбук хистеријата за базните и киселите намирници. Според него, неосновани се оние режими кои ги воведуваат некои нутриционисти за регулација на pH вредноста на телото, свесно мамејќи ги пациентите. Да не ги заборавиме и наследните фактори. Покрај тоа, реално, колку пати сте виделе трудница во поодмината бременост како страсно пуши. А токсините влегуваат во крвта, напаѓајќи ги клетките и молекулите на ДНК. Тоа е голем ризик, за организам кој сѐ уште не е формиран.

Што се однесува до препаратите за борба против ракот, д-р Вујчиќ вели:
„B17 е токсичен гликозид, на кои аптеките заработуваат илјадници евра. Во суштина, не е пријавен ниту еден официјален и документиран случај на излекување од рак, па затоа ги измислија Хунзите и ете ги низ цел свет отровните семки. Би рекол дека има барем 300 милиони Хунзи со оглед на тоа колку производи има на пазарот.
Сода бикарбоната е одлична за смирување на киселините и за чистење на протезите. И не постои фармацевтска сода без алуминиум. Во содата никогаш и го немало. Го имало во некои стари верзии на прашак за пециво но повеќе не. Петролејот пак е гориво за петролејки, отров за луѓето. Еден мој колега блогер пиеше петролеј затоа што беше во терминална фаза на рак. Петролејот му го уништи желудникот и направи непоправлива штета на неговите внатрешни органи. Кој нормален може да даде совет да се пие нафта или бензин. А петролејот е само една фракција на нафтата.
Печурките се добра храна и го зајакнуваат имунитетот. Но нема чудесни печурки. Има само такви кои предизвикуваат смрт или имаат халуциногени ефекти.
Маслото од коноп може да олесни некои тегоби, но не е лек. Не треба да се заборави дека постои и вистинско масло кое се добива од семките на коноп, но тоа е само храна, без физиолошко дејство“.

Суплементи и витамини

Во однос на суплементите и витамините др. Вујчиќ смета дека суплементите мора да ги одобри лекар. Според него, витаминот Д и каротените можат да предизвикаат рак ако се внесуваат на сопствена проценка дека на нашиот организам му требаат тие витамини. Не заборавајте, вели тој, „дека до пред еден век не се ни знаело за витамини. Дури ни најстарата заблуда дека зголемената доза на витамин Ц ја спречува настинката, не е точна. Но, згодно е да се шират ваки приказни затоа што на тој начин се богатат одредени гранки кои немаат врска ниту со хемијата ниту со фармацијата.
Во однос на дилемите за исхраната пак, д-р Вујчиќ смета на пример дека пржената храна е навистина поштетна и покалорична, но дека доколку повремено ја консумираме, нема да не убие. За маслата вели дека се подеднакво штетни колку што се и корисни.

„Постојано има разни теории кои напаѓаат или бранат одреден вид на маст или масло. Затоа, најпаметно решение е промената и на видовите на масло и на замената на маслото со свинска маст. Кокосовото масло е најопасно, а сега се прокламира како еликсир на младоста. На пример, маслиновото масло не е за пржење, но е за сите останати начини на приготвување на храна, а секако дека е најдобро во салатите. Но никако во големи количини. Нема масло кое е кардиопротективно, па ете уште една заблуда врзана за омегол и маслиново масло.

За приказните за штетноста на млекото, месото и јајцата се виновн агресивните вегетаријанци – помодари. Забавно ми е кога ќе тргнат во напад на кравите затоа што го загадуваат воздухот поради продукцијата на метан, а притоа пушат, возат автомобил и јадат зеленчук кој се произведува на нивите кои ги обработуваат мултитонски трактори, „ждерачи“ на нафта. Докторот смета дека проблемот е што со светот владее профитот, а не образованието, квалитетот, знаењето или љубовта. За жал, вели тој, одиме кон дното на цивилизацијата, а денешните генерации кои со своите андроид телефони се претвораат во зомби, ќе се манипулираат уште полесно.

За вакцините

Докторот ја поддржува вакцинацијата на децата, задолжителна и по препорака на Светската здравствена организација.

„Вакцините се многу побезбедни од родителите кои пушат во станот во кој живее и детето. Викаат, се караат и ги фрустрираат децата. Според светските истражувања, аутизам не предизвикуваат вакцините. Ако не веруваме во наука, тогаш е време голи и боси да се вратиме во пештерите, да се храниме со корења и со бобинки.
Според д-р Вујчиќ, најголемо загадување и најголемо влијание врз човековото здравје е она духовното. И сиромаштијата.

„Кога земјата е богата и општеството е поздраво. Не треба секое дете на тато (или на мама) да земе џип и да дивее низ градот за да знаеме дека е жив. Итно ни треба духовно и научно воздигнување. Или ќе пропаднеме како луѓе“, вели Вујчиќ.

Текстот е компилација од интервју со д-р Вујчиќ и содржина од неговиот блог.

Кога станува збор за исхраната, вистината е дека секој има свое мислење за тоа. За жал, информациите врз основа на кои ги формираме нашите мислења доаѓаат и од компании кои финансираат истражувања во областа на исхраната. Информациите честопати се контрадикторни. Храната која до вчера беше извор на здравје сега е извор на болести и обратно. Факт е дека информациите повторени илјада пати ги прифаќаме како вистина, но не дозволувајте да се залажувате!

Јаглехидратите дебелеат!
Иако многу луѓе губат тежина кога ги намалуваат јаглехидратите и ги зголемуваат протеините во нивната исхрана, тоа не значи дека сите јаглехидрати се лоши и автоматски дебелеат. Сигурно е дека повеќе преработени јаглехидрати и пијалаци со додаден шеќер ни прават проблеми во одржувањето на витката линија. Меѓутоа, мешунките, интегралните житарки, овошјето и зеленчукот се многу покорисни како дел од секојдневната исхрана отколку ако се исфрлат од неа.

Замрзнатите производи имаат помалку хранливи материи!
Има луѓе кои во недостиг на свежо овошје и зеленчук нема да изберат замрзнато бидејќи веруваат дека тоа е дефицитарно со хранливи материи. Тоа секако не е така, бидејќи овошјето и зеленчукот се берат непосредно пред самиот процес на замрзнување. Имајте на ум дека витамините и минералите во овошјето и зеленчукот се губат побрзо на температури над нула степени.

Ако имате избор помеѓу замрзнато овошје од локален производител и свежо овошје од друг континент, одберете го замрзнатото, сигурно ќе биде побогато со хранливи материи.

Немасните производи се секогаш подобра опција од полномасните
Многу луѓе се плашат од мастите и секогаш избираат производи со малку маснотии затоа што мислат дека се поздрави. Честопати производите кои не содржат масти содржат поголеми количини на додаден шеќер и сол, а бидејќи се чувствуваме лесно кога ги јадеме, всушност јадеме повеќе.

Дефинитивно е подобро да се јаде полномасна храна во помала количина и да се задоволат потребите за хранливи материи, но и вкус.

Негативни калории во стебленцата од целер!
Целерот спаѓа во групата на намирници со ниска калорична содржина. Многу лесно се вклопува во исхраната на оние кои строго го следат својот внес на калории. Здравата и крцкава намирница одлично оди со различни сосови, како сирење или хумус.

Идејата дека целерот содржи негативни калории се заснова на фактот дека поради долго џвакање ќе се согорат повеќе калории отколку што има самата намирница. Сепак, немојте да се залажувате, кога станува збор за слабеење или одржување на витка линија, сè се врти околу внесот на калории и начинот на потрошувачка.

Моркови за подобар вид!
Мајките ширум светот ги убедуваат своите деца дека ќе имаат совршен вид ако јадат моркови. Колку и да се здрави, тие сè уште немаат магични својства кога е во прашање видот.

Овој мит потекнува од времето на Втората светска војна, кога се верувало дека морковите им помагаат на пилотите да го изострат видот. Сепак, во тоа им помогнала, пред сѐ, новата напредна технологија.

Вегетаријанската и веганската исхрана се најздравиот избор!
Вистина е дека на современата исхрана ѝ недостасува храна од растителна основа. Затоа е совршена идеја да додадете порција или две порции зеленчук плус во вашата секојдневна исхрана. Сепак, идејата дека „тревојадите“ се автоматски поздрави од „сештојадите“, не е точна. Многумина кои се придржуваат до веганска или вегетаријанска исхрана ја засноваат својата исхрана на тесто или повеќе преработени растителни производи кои ќе имитираат месо и месни производи и разни деликатеси кои во оригиналната верзија се подготвуваат со храна од животинско потекло.

Без разлика дали сте љубител на храна од животинско потекло или не, најважно е исхраната да биде умерена и да се заснова на храна која е најблиска до нејзината оригинална форма.

Гранолата е совршен избор за почеток на денот!
Во гранолата има многу здрави состојки, како што се овес, јаткасти плодови и семки. Иако овој факт нè тера да мислиме дека ова е совршен појадок, на гранолата треба да ѝ се пристапи со претпазливост. Гранолата често има голема количина на додаден шеќер, а семките и јаткастите плодови често се препечени на масло и им се додава сол.

Иако е поздрава опција кога сами ја подготвувате гранолата бидејќи ги контролирате состојките, начинот на подготовка и додатоците, сепак треба да ја земете предвид и големината на порцијата.

Спанаќот е богат со железо!
Иако сите сакаме да веруваме во оваа приказна, таа е далеку од вистината. Пред многу, многу години била направена едноставна печатна грешка.

Вистина е дека 100 грама спанаќ содржат само 3,4 мг железо.

Зачинетата храна создава чирови!
Ако избегнувавте зачини за да спречите чир, можеби конечно е време да престанете! Она што ќе го еродира ѕидот на желудникот и ќе создаде чир се бактериите и можеби земањето одредени лекови. Замислете само колку луѓе во Индија би имале чир на желудникот, со оглед на количината и видот на зачините што ги користат во секојдневната исхрана.

Зачинетата храна има многу добри својства за нашиот организам, само ако претераме може да имаме помали проблеми со одењето во тоалет.

Текстот е од ТУКА.

Јаглехидратите се лоши, пилешкото е секогаш поздраво кога е без кожа, се само дел од старите тврдења кои се поврзани со здравата исхрана. Што е точно, а што е само мит, ќе дознаете во продолжение.

Целерот ги согорува калориите. Комплетна лага е дека целерот има негативни калории, односно дека со неговата консумација согоруваме повеќе калории отколку што внесуваме. Вистината е дека целерот има само 10 калории по порција и дека затоа е совршена намирница која треба да ја вклучите во вашата диета ако сакате да изгубите на тежина.

Мешунките и житарките мора да се јадат во исто време за целосни протеини. Јадете мешавина на аминокиселини во текот на денот и ќе ги добиете сите хранливи состојки што ви се потребни. До некаде е вистина дека мешавината на мешунки и житни култури е нутритивно многу моќна, богата со протеини, растителни влакна, витамин Б, железо, калиум и други минерали, додека е сиромашна со масти.

Сировите моркови се поздрави од зготвените. Верувале или не, термичката обработка ја зголемува хранливата вредност на морковите. Самиот процес на готвење ги разградува силните клеточни sидови кои потоа ослободуваат бета-каротен.

Секогаш отстранувајте ја кожата од пилешкото за помал внес на масти. Печењето, готвењето или динстањето на пилешко со кожа ги зачувува сите оние природни сокови што му даваат вкус. Пилешкото задолжително гответе го со кожата заради зачувување на вкусот, а отстранете ја подоцна.

Треба да се избегнуваат јајцата поради холестеролот што го содржат. Јајцата се на лош глас и некои истражувања покажаа дека тие го поттикнуваат високиот холестерол во крвта. Точно е дека јајцата се достапен извор на многу хранливи материи, вклучувајќи цинк, железо, антиоксиданти лутеин и циксантин, витамин Д, како и на хемикалија која ја поттикнува работата на мозокот, наречена колин. Држете го вашиот холестерол под контрола со тоа што ќе го намалите внесувањето на заситени масти.

Помалку јаглени хидрати – поздрава исхрана. Изборот на соодветни житни култури е од големо значење за општата здравствена состојба. На вашето мени секогаш нека има целовити житарки затоа што бројни истражувања покажале дека луѓето кои редовно земаат цели зрна, имаат 20-30 проценти помалку шанси да добијат срцеви заболувања, а тие се во просек и послаби.

Ако користиме маргарин наместо путер внесуваме помалку калории. Путерот и маргаринот имаат приближно ист број калории со тоа што маргаринот е направен од растителни масла како поздрава алтернатива на путерот кој содржи холестерол и заситени масти. Но, маргаринот може да биде далеку понездрав од путерот затоа што содржи транс масти кои влијаат на развојот на срцеви заболувања и високиот холестерол. Кога купувате маргарин, побарајте го оној што не содржи транс масти.

Јаткастите плодови се лоши како и брзата храна. Јаткастите плодови се одличен извор на протеини и други хранливи материи, ако не земате повеќе од една полна рака наеднаш. Истражувањата на Харвард покажале дека ако јадете пет вакви порции во текот на неделата, го намалувате ризикот од развој на дијабетес тип 2 за 20 проценти.

Алкохолот ни помага да спиеме подобро. Дури и кај здрави возрасни лица, алкохолот може да го наруши добриот сон. Можеби ќе може да ве натера да заспиете брзо, но голема е веројатноста дека ќе се разбудите среде ноќ побудни од кога било.

Дијабетичарите треба целосно да се откажат од шеќерот. Лекарите не се согласуваат со оваа изјава и тврдат дека повременото почестување со нешто слатко е добро. Клучот за одржување на добро ниво на гликоза во крвта се избалансирани оброци кои содржат мешавина на јаглени хидрати, масти и протеини.

Не треба да пиете млеко кога сте настинати. Дали мајките и бабите некогаш ве предупредувале за ова? Ако е така, треба да знаете дека нема докази дека млекото ја поттикнува продукцијата на секрет и затоа нема потреба да се откажувате од него кога сте настинати.

Зачинетата храна предизвикува чир на желудникот. Зачините не се причина за чир на желудник, знаеме дека главниот виновник за оваа бактерија е хеликобактер пилори. Единствената работа што може да ја направат зачините е да ги иритираат цревата, што луѓето обично го мешаат со чир.

Намалете ја храната кога имате температура. Нема медицински докази ниту за ова тврдење. Вашиот апетит може да се намали сам по себе ако имате треска, но треба да јадете сé што можете, затоа што за време на болест вашите нутритивни потреби растат.

Производите со малку маснотии или без маснотии секогаш се подобри од полномасните. Кога станува збор за месото и одредени млечни производи, има вистина дека храната без маснотии е подобра за вашето здравје, но тоа не е случај со сите индустриски преработени производи. Кога производителите, на пример, отстрануваат масти од кексите за да добијат вкус додаваат други, не толку здрави состојки, како што е шеќерот. Експертите советуваат да избегнувате индустриска храна без маснотии и да ја замените со природни производи кои содржат здрави масти како што се јаткастите плодови.

Замрзнатото или конзервираното овошје и зеленчук се посиромашни со нутриенти. Свежото овошје и зеленчук имаат повеќе хранливи материи од замрзнатата или конзервирана храна, но само во истиот момент кога ќе се наберат. Бидејќи свежото овошје и зеленчук генерално имаат долг пат пред да стигнат до полиците на маркетите или пазарите, нивната хранлива вредност е изгубена. Храната што е набрана свежа и брзо се замрзнува, зачувува многу повеќе хранливи материи.