Божиќниот пост започна денес (28-ми ноември) и ќе трае до Божиќ, 7 јануари 2025 година. Многумина постот го поврзуваат исклучиво со воздржување од храна и мислат дека суштината на постењето е само да се замени уживањето во мрсна храна со уживање во посна храна.

Многумина го користат почетокот на големите пости за да почнат со диета чија цел е да ослабнат некој килограм, многумина пак само сакаат да бидат во тренд, а има и такви кои постат не само со храна, туку нивниот пост е комплетен.

Имено, постењето за христијанските празници за верниците не треба да биде само некаков аскетизам, тренинг и диета, туку треба да е придружено со духовен пост, а духовниот пост е чин на милосрдие, љубов, простување, трпение, согледување на себеси и на светот околу себе на подобар начин.

Ова значи согледување на сопствените гревови, а не на туѓите.

Накусо, она што е многу важно е постот да биде истовремено и физички и духовен и ментален.  

Инаку, Божиќните пости не се толку строги како Велигденските, па освен во понеделник, среда и во петок кога се пости без масло, во другите денови е дозволена посна храна која може да се приготви со масло, а дозволено е и вино.

Во останатите денови – вторник, четврток, сабота и недела разрешена е храна со растително масло. Рибата за време на Божикниот пост може да се јаде, односно, како што вели Црквата, се разрешува во саботните и неделните денови, како и на големите празници, но само доколку тие празници се паднат во вторник или четврток. Доколку празникот се падне во среда или петок се разрешува само на вино и масло. Од 2 до 6 јануари постот е построг и во тие денови, дури и во сабота и недела рибата не е благословена.

Јасно е дека во времето на постот се избегнуваат месото, путерот, млекото, јајцата, сирењето. Освен тоа, Уставот вели дека во понеделник, среда и петок во Божикниот пост не се јадат риба, масло и вино и дозволена е само храна без масло.

Оние кои постат за Божиќните пости треба да се подготват на Нова година без прасечко и какво било друго месо и руска салата.

Божиќниот пост кој трае 40 дена, односно до Божиќ, 7 јануари, започна денес, впрочем, како и секоја година. Имено, со оглед на тоа што и датумот на Божиќ не се менува, постот секоја година почнува на 28 ноември, а завршува заклучно со Бадник, 6 јануари.

Божиќниот пост е втор по должина на траење, веднаш по Велигденскиот, а во однос на тежината е полесен од него, односно, се дозволува користење на масло, риба и вино.

Во Православната црква практика е во текот на Божиќниот пост верниците да се исповедаат и по можност да се причестат за да бидат што подостојни во подготовката за празнување на Христовото раѓање – Божиќ. Целта на постот е да се „исчистат” духот и телото, што се постигнува не само со воздржување од мрсна храна, туку и од лоши мисли, зборови и дела. За време на божикниот пост, посни се и сите славски трпези.

Е сега, за оние што се по благото, еве го и најубавиот рецепт што може да си го прават за време на постите, рецептот за домашна алва од гриз, позната и како 1, 2, 3, 4… Бројките се однесуваат на количината на основните состојки што одат во неа.

Еве го и рецептот:

Рецепт за алва… 1, 2, 3, 4

1 шолјичка зејтин

2 шолјички гриз

3 шолјички шеќер

4 шолјички вода

Приготвување:

Зејтинот и гризот се ставаат во тавче и се пржат додека не се зарумени гризот, односно, додека не почне да ја менува бојата, но не смее да стане кафеава. Се додаваат шеќерот и водата и се вари додека да се впие водата. Потоа се вади со голема лажица и се става во чинија за послужување.

Е сега, освен овие основни состојки кои одат во тој сооднос од 1, 2, 3 и 4 шолјички, можете да си додадете по желба и други состојки. На пример, ако ставате ореви како ние, тогаш ставете ги да се пропржат заедно со гризот, а кога ќе биде готова алвата поросете ја со мелени ореви.

Исто така, можете шеќерот да го замените и со нешто друго. На пример, ни ставивме пола од количината шеќер, а пола сируп од слатко од тикви. Секако, можете да ставите и некоја поздрава замена како сируп од урми, мед или јаворов шеќер. Ама искрено, највкусна е во оваа варијанта како што ја правеа нашите баби и дедовци.