Рецепт за класичен сладолед од ванила

Состојки:

200 мл млеко

200 мл слатка павлака

50 г шеќер

3 жолчки

неколку мешунки од ванила

Подготовка:

Изматете ги жолчките со шеќерот додека не се добие пенаста смеса. Загрејте го млекото со павлаката и мешунките од ванила. Пред да зоврие, извадете ја мешунката од ванила, префрлете во садот со јајцата, мешајќи. Ставете ја смесата да се вари на пареа и мешајте додека не се згусне, внимавајќи да не зоврие. Оставете да се олади, а потоа ставете ја во замрзнувач еден до два часа. Кога кремот ќе се стегне, извадете го од садот, блендирајте на ниска брзина неколку минути. Вратете го во замрзнувачот и повторете го процесот два или три пати во интервали од еден час. Сервирајте украсено со чоколадо и шлаг.

Рецепт за лесен сладолед од кокос
Состојки:

275 мл полномасно кокосово млеко

350 мл свежа павлака

2 јајца

2 жолчки

5 мл / 1 лажичка екстракт од ванила

50 г шеќер

сол

За декорација:

50 г кокосово брашно, пржено додека не добие златно-кафеава боја

гранче нане

Подготовка:

Варете ги полека кокосовото млеко и павлаката на средна температура 5 минути. Изматете ги јајцата, жолчките, ванилата, шеќерот и солта. Ставете длабок сад врз поголем сад со врела вода. Истурете ја смесата од јајца во длабокиот сад и полека додадете ја и топлата смеса од кокосово млеко и павлака. Промешајте и гответе на пареа додека смесата не се згусне доволно за да не паѓа од лажицата. Тргнете од оган. Мешајте повремено додека смесата се лади. Кога доволно ќе се олади, ставете ја во замрзнувач 1 час. Извадете од замрзнувачот, блендирајте додека не добиете кремаста смеса и вратете ја во замрзнувачот додека не се стврдне. Сервирајте во чинии, наросено со пржено кокосово брашно и со гранче нане.

Нападите од глад можат да нè фатат во најнеочекуваните моменти и може да бидат доста тешки за игнорирање. Наместо да се прејадувате со нездрава храна, размислете за модри патлиџани, особено ако се обидувате да ослабнете.

Овој зеленчук е вистинска нутритивна бомба која помага и при слабеење. Богат е со растителни влакна, витамини и минерали кои помагаат да се создаде долготрајно чувство на ситост и да се забрза метаболизмот.

Рецептите што ги предлагаме ќе го задоволат вашето непце и ќе ви помогнат да ја постигнете идеалната фигура.

Дали навистина помага при слабеење?

Модриот патлиџан може да биде вреден додаток на програмата за слабеење благодарение на неговиот нутритивен профил. Неговата висока содржина на растителни влакна игра важна улога во неговиот позитивен ефект врз слабеењето, според студија објавена во Iranian Journal of Basic Medical Sciences.

Влакната ви помагаат да се чувствувате посити и посреќни подолго време, што ви помага да консумирате помалку калории со намалување на желбата за храна и спречување на прејадување. Покрај тоа, влакната во модриот патлиџан го подобруваат варењето и го поттикнуваат здравјето на цревата, што може да помогне во одржувањето на здрава тежина.

Се прашувате како да подготвите модри патлиџани?

Еве неколку вкусни рецепти што истовремено ќе ви го олеснат и побрзото слабеење.

Модар патлиџан на скара

Состојки:

1 голем модар патлиџан, 2 лажици маслиново масло, 1 лимон (сок и кора), 1 лажица сечкани свежи билки (оригано, мајчина душица и магдонос), сол и бибер по вкус

Подготовка:

Исечете го модриот патлиџан на парчиња со дебелина од околу 1 см.

Премачкајте го со маслиново масло и сок од лимон, потоа зачинете го со сол и црн пипер.

Печете на скара на средна температура 5 до 7 минути од секоја страна, или додека не омекне и лесно не порумени.

Посипете со сечкана кора од лимон и свежи билки непосредно пред сервирање.

Печен модар патлиџан

Состојки: 1 голем модар патлиџан 2 лажици маслиново масло, 2 лажици таан (паста од сусам), 1 лажица сок од лимон, 1 чешне лук (згмечено), 2 лажици вода, сол и црн пипер по вкус

Подготовка:

Загрејте ја рерната на 200°C.

Исечете го модриот патлиџан на половина по должина и засечете го месото за да создадете решеткаста шема.

Премачкајте со маслиново масло, зачинете со сол и црн пипер.

Печете 30 до 40 минути или додека не омекне.

Додека модриот патлиџан се пече, измешајте ги таанот, сокот од лимон, лукот, водата, солта и црниот пипер за да направите сос. Ако е премногу густ, додадете уште малку вода.

Прелијте го подготвениот сос врз печениот модар патлиџан пред сервирање.

Модар патлиџан, домат и кари

Состојки: 1 голем модар патлиџан (исечен на коцки), 1 кромид (исечкан), 2 ситно сечкани чешниња лук, 1 прстофат рендан ѓумбир, 1 конзерва доматно пире, 1 лажичка кари во прав, 1/2 лажичка куркума во прав, 1/4 лажичка кајенски пипер (по желба), 1 лажица маслиново масло, сол и црн пипер по вкус, свеж коријандер за декорација

Подготовка:

Загрејте го маслиновото масло во голем тава, додадете го кромидот и пржете додека не омекне.

Додадете ги лукот и ѓумбирот и пржете уште 1 минута.

Додадете кари во прав, куркумата и кајенскиот пипер (доколку користите), пржете уште 30 секунди.

Додадете ги доматите и модриот патлиџан, сол и црн пипер по вкус.

Покријте и гответе 20-25 минути или додека модриот патлиџан не омекне.

Декорирајте со свеж коријандер пред сервирање.

Модар патлиџан печен во рерна

Состојки: 1 голем модар патлиџан, 1 белка од јајце, 1/2 чаша презла (по можност интегрално), 1/4 чаша рендан пармезан (по желба), 1 лажица маслиново масло, сол и бибер по вкус

Подготовка:

Загрејте ја рерната на 200 °C

Излупете го модриот патлиџан и исечете го на стапчиња како помфрит.

Изматете ја белката во сад.

Во друг сад, измешајте ги презлата, пармезанот (доколку користите), солта и биберот.

Потопете ги стапчињата модар патлиџан во белката, а потоа извалкајте ги во смесата од презла.

Ставете ги на плех за печење и попрскајте ги со маслиново масло.

Печете 20-25 минути или додека стапчињата не поруменат и не станат крцкави.

Модар патлиџан со наут

Состојки: 1 голем модар патлиџан (исечен на коцки), 1 конзерва наут (исцедете го и исплакнете го), 1 сечкан кромид, 2 сечкани чешниња лук, 1 конзерва сечкана доматна пулпа, 1 чаша зеленчукова супа, 1 лажичка ким, 1/2 лажичка кајенски пипер, 1/4 лажичка прав од црвен пипер (по желба), 1 лажица маслиново масло, сол и бибер по вкус

Подготовка:

Загрејте го маслото во голем тава, додадете го кромидот и пржете додека не омекне.

Додадете лук и пржете уште 1 минута.

Додадете ким, чили пиперка и слатка црвена пиперка (доколку користите) и пржете уште 30 секунди.

Додадете домати, зеленчукова супа, модар патлиџан и наут. Зачинете со сол и црн пипер по вкус.

Откако ќе зоврие, намалете ја температурата и варете на тивок оган 25 до 30 минути, или додека модриот патлиџан не омекне.

Полнет модар патлиџан со киноа и зеленчук

Состојки: 2 средни модри патлиџани, 1 чаша варена киноа, 1/2 чаша сечкан зеленчук (пиперки, тиквички, кромид), 1/4 чаша доматно пире, 1/4 чаша рендана моцарела (по желба), 1 лажица маслиново масло, сол и црн пипер по вкус

Подготовка:

Загрејте ја рерната на 190°.

Исечете го модриот патлиџан на половина по должина, извадете го месото оставајќи раб дебел 1 сантиметар.

Исечкајте го „месото“ кога ќе го извадите.

Загрејте го маслото во тава, додадете го сечканиот модар патлиџан, зеленчукот и доматното пире и гответе додека не омекне.

Додадете ја варената киноа, додадете сол и црн пипер по вкус.

Наполнете ги половините од модар патлиџан со подготвената смеса од киноа.

Поросете со моцарела (доколку користите).

Печете 20-25 минути или додека сирењето не се стопи.

Медените колачи содржат едноставни состојки кои најчесто ги имаме дома. Можат да се направат со помош на модли со различни форми, но и со помош на обична чаша. Можат да се декорираат по желба со шарени трошки, чоколадо или пак со кралска глазура.

Доколку ве интересира како да направите новогодишни медени колачи, во продолжение се нашите едноставни рецепти.

Рецепт од третратката на мама/баба

Овие старомодни медени колачиња содржат брашно, шеќер и мед како основа, додека мешавината од зачини им го дава тој посебен печат поради кој ги нарекуваме „медено колачи“.

Иако можете да користите одделни топли зачини, готовите мешавини за зачини веќе ги имаат поединечните зачини во правилни пропорции.

Обидете се да го замените обичниот шеќер со кокосов, што ќе им даде уште подобра текстура.

Состојки:

350 гр брашно
150 гр мед
150 гр шеќер или кокосов шеќер
половина кесичка прашок за пециво
2 јајца
150 гр путер или кокосово масло
2 лажички микс зачини за медени колачи
прстофат сода бикарбона.

Подготовка:
Измешајте ги брашното, прашокот за пециво и путерот.
Потоа додадете шеќер, јајца, зачини и другите состојки и направете го тестото.
Оставете го да отстои околу два часа на ладно место.
Обликувајте го тестото во топчиња или развлечете го тестото и вадете форми со помош на модли за колачи.
Печете ги на 200 °C околу 10 минути.

Медени колачи со мерка на шолји
Овие едноставнимедени колачи содржат малку ванила или екстракт од ванила.

Состојки за тестото:
2 шолји обично брашно
3 шолји спелтино брашно
1 шолји омекнат путер
1 шолји кафеав шеќер
1 јајце
1 шолји меласа
1 лажичка јаболков оцет
2 лажички екстракт од ванила
1 лажичка сода бикарбона
половина лажичка сол.
Зачини:
1 лажичка цимет
1 лажичка ѓумбир
половина лажичка пимент
половина лажичка каранфилче
1/4 лажичка морско оревче.

Подготовка:
Во еден сад измешајте ги шеќерот и путерот додека не се соединат.
Додадете ги меласата, јајцето, екстрактот од ванила и оцетот и мешајте додека смесата не се соедини.
Измешајте ги зачините во мала чинија.
Измешајте ги сите состојки и оставете го тестото да се излади, по можност преку ноќ.
Загрејте ја рерната на 175 °C.
Тестото поделете го на два дела, а потоа едната половина развлечете ја на набрашнета површина.
Исечете го на саканите форми со помош на модли.
Наредете ги на плех обложен со хартија за печење.
Печете 8-10 минути.
Оставете да се изладат пред да ги декорирате.

Едноставни медени колачи во поздрава варијанта
Направете колачи во поздрава верзија во форма на колачиња од овесни снегулки.

Ова е рецепт за оние кои сакаат похранливи медени колачи.

Состојки:
100 гр овесни снегулки
90 гр спелтино брашно
половина лажичка прашок за пециво
1 лажичка ѓумбир
1/4 лажичка цејлонски цимет
1/8 лажичка морско оревче
1/8 лажичка мелено каранфилче
1/4 лажичка сол
2 лажички стопен путер или кокосово масло
1 јајце (собна температура)
1 лажичка екстракт од ванила
1/4 чаша јаворов сируп
1/4 чаша меласа.

Подготовка:
Измешајте ги овесните снегулки, брашното, прашокот за пециво, зачините и солта.
Во друг сад изматете ги јајцето, маслото или путерот и екстрактот од ванила додека не станат пенливи. Додадете јаворов сируп и мед.
Соединете ги овие две смеси и оставете го тестото да се олади околу 30 минути.
Загрејте ја рерната на 250 °C и обложете ја тепсијата со хартија за печење.
Обликувајте медени колачи, ставете ги на плехот и печете околу 10 минути.

Ако имате повеќе домати, не дозволувајте да пропаднат. Особено кога станува збор за шери доматчиња кои на овој начин можете да ги зачувате за во зима кога нема свеж.

Точното потекло на овој деликатес не е познато, но најверојатно потекнува од Италија, каде што ги сушеле на летното сонце, на ќерамидите.

Во продолжение на текстот можете да прочитате како се прават суви домати, која е најдобрата постапка за сушење домати и рецепти за суви домати во масло.

Сушени домати: употреба и калориска вредност

Дехидрираните или сушените домати во масло се вистинска мала ризница на хранливи материи!

Важно е да се знае дека сувите домати ја задржуваат својата хранлива вредност и се богати со ликопен, кој е неопходен за здравјето на коските и кардиоваскуларниот систем, антиоксиданtи, витамин Ц, витамин А, К, ниацин, тиамин, рибофлавин, железо, магнезиум, калиум, како и влакна.

Сувите домати ја задржуваат својата сладост и добиваат интензивен, концентриран вкус на домати. Една чаша сушени домати содржи 140 калории.

Овој медитерански специјалитет стана многу популарен во другите делови на светот во осумдесеттите и деведесетите години на минатиот век, а можностите за негово користење во исхраната се бесконечни.

Често се служи со мезе, се става во салати, сендвичи, омлети, тестенини, рижото, ќофтиња, песто…

Од него може да се направат различни намази и сосови, додека на пирето, на пример, му дава многу специфичен вкус.

За да се добие еден килограм од овој гастрономски деликатес, потребни се и до десет килограми свежи плодови, бидејќи при преработката доматите губат вода, дури 93% од тежината.

Доматите кои сами ги сушиме се поевтини и веројатно повкусни. Уште повеќе и ако сте си ги одгледале сами.

Како што знаеме, доматите доаѓаат во различни големини, форми и бои и сите може да се сушат, со тоа што сортите што имаат повеќе месо и помалку вода, даваат пополн и помесест сушен производ.

Без разлика дали претпочитате обично масло или сушени домати во маслиново масло – рецептот за медитеранскиот специјалитет се наоѓа во следните редови.

Сушени домати – рецепт за сушење домати на сонце

Доматите за сушење мора да бидат зрели.

Се избираат и плодовите со слична големина така што времето на сушење е исто за сите. Пред процесот на сушење, плодовите се мијат и се сечат на половини.

Половините од доматот се редат на мрежа (сечената страна на доматот се става нагоре) која е развлечена во рамка. Се поставува врз некоја потпора или врз цигли или блокови, така што воздухот може слободно да циркулира.

Пред да започнете со процесот на сушење, доматите малку се посолуваат и по желба се посипуваат со суви билки.

Многу е важно да не се пресолат (бидејќи кога ќе се исушат ќе станат многу солени), односно само малку да се посипат со сол (процентот на сол може да биде од 2 до 6 проценти).

Сушењето домати на сонце е техника која се користи со векови, но може да биде непредвидлива, бидејќи времето зависи од природата, па може да се примени таму каде што времето е топло и предвидливо, а температурите се релативно константни – на места кои се сончеви и суви.

Во влажни области, речиси е невозможно да се добијат сушени домати. Во секој случај, доматите мора да се внесуваат ноќе и да се покриваат со газа преку ден поради инсекти.

Во зависност од температурата, сушењето може да трае од неколку дена до две недели.

Сушење домати во рерна – како до совршени сушени домати во рерна?

Доматите може да се сушат и во рерна.

Овој процес е многу полесен, бидејќи го контролираме „времето“, ја прилагодуваме температурата, нема страв од инсекти, а доматите се сушат за неколку часа.

Подготовката за овој тип на сушење е иста како и за сушење на сонце. Половините се редат во поголем, плиток плех обложен со хартија за печење.

Рерната треба да се загрее на 110 степени Целзиусови.

Околу два и пол часа од почетокот на сушењето, доматите треба нежно да се притиснат со шпатула за да се исцедат преостанатите сокови. Треба да се остават во рерна минимум 2 часа.

Потоа може да се попрскаат со маслиново масло и да се остават во рерна со подотворена врата.

Можете исто така да додадете лук во прав и други зачини по вкус.

Доматите обично се сушат додека не се збрчкаат, но сепак се еластични, како да се пластични.

Ако се ронат значи дека се премногу суви, а ако не се доволно исушени брзо се буѓосуваат и потоа мора да се фрлат.

Сушењето во рерна е поедноставно и побрзо отколку на сонце, но целиот процес сепак бара цело попладне.

Сушените и оладени плодови се ставаат во добро затворени кутии и може да се чуваат неколку месеци во фрижидер.

Пред употреба, потребно е да се потопат во вода околу 30 минути, по што се сушат со крпа.

Сувите домати може да се стават и во тегли; при редењето секој слој се попрскува со суви билки и лук, а потоа целосно се прелива со маслиново масло.

Вака подготвени може да се чуваат на собна температура, а кога ќе се отворат теглите мора да се чуваат во фрижидер.

Вака подготвените суви домати не треба да се натопуваат во вода пред употреба. За дополнително да се спречи растот на бактерии и габи, доматите може да се потопат во оцет или сок од лимон пред да почнете да ги ставате во теглата.

Рецепти кои ќе ги заскокоткаат сите ваши сетила

Конечно, време е да се зафатиме со готвење и да ги споделиме со вас нашите најомилени гастрономски јадења кои можете да ги подготвите за ваше задоволство.

Ролни од тиквички со сушени домати

Дали сте љубител на медитерански гастрономски јадења?

Ако е така, следниот специјалитет е непогрешлив избор за вкусна вечера или предјадење, бидејќи вклучува едноставни состојки и, се разбира, „тајната состојка“ која ќе го направи јадењето совршено.

Имајте на ум дека овој вид домати е многу концентриран и има посилен вкус, па затоа се користи во помали количини за да му даде на јадењето ароматичен шмек.

Состојки:

2 големи тиквички исечени на листови, кои треба да се попрскаат со маслиново масло
100 гр суви домати исечени на поголеми парчиња
150 гр постаро козјо сирење
чепкалки за заби
Од оваа количина можете да добиете 6 порции, а целиот процес нема да ви одземе повеќе од 30 минути.

Подготовка:

Исечете ги листовите тиквички во рерна.

Потоа ставете врз нив намаз направен со мешање на сувите домати и сирењето.

Завиткајте ги листовите тиквички и секоја ролна прицврстете ја со чепкалка за заби.

И вашето јадење е подготвено за сервирање и дегустација!

Салата со рукола и сушени домати

Ова јадење лесно се подготвува, а повеќето состојки веројатно ги имате во вашиот фрижидер.

Тоа е одличен избор доколку сакате да прифатите здрава исхрана и да го збогатите вашето мени со витамини и минерали.
Состојки:

3 до 4 грста свежа рукола
50 гр суви домати
Половина свежа краставица
1 рака свежи шери домати
Маслинки по ваш избор
150 гр моцарела
3 лажици пињоли, индиски оревчиња или потпечени семки од сончоглед и тиква (по ваш избор)
4 супени лажици маслиново масло
4 лажици балсамико оцет
Сол и бибер по вкус

Начин на подготовка:

Во длабок сад се ставаат руколата, пињолите, сечканата краставица, сечканите доматчиња, маслинките без семки и моцарелата (претходно исцедена и исечена на парчиња).

Измешајте ги состојките, додадете маслиново масло, балсамико и зачините, па повторно измешајте. Додадете суви домати при крај и послужете со чаша од вашето омилено вино.

Толку често ги слушаме оние реченици од типот на: мајка ми правеше најдобра торта со вишни, најдобра баклава, руска салата, кифли, пици, мици,….

Мајка ми, мајка ми, мајка ми, евентуално, баба ми, баба ми…

Што е работава? Навистина ли токму вашата мајка или баба правеле најдобро нешто што инаку го прават речиси сите?

Па, ако не друго, сигурно е дека вам ви било најдобро.

Мајка ми го имаше оној вечен страв, дека некој ќе остане гладен, па секогаш готвеше големи количини.

„Подобро да остане, отколку да нема“.

И многу сакаше да објаснува како ги направила оние вкусни крофнички со белки, оние кои многу ги сакав. Исто како и овошниот ролат, питата со праз и со ориз, кифличките, цецините колачи и секако, тортата со вишни.

Кога бев мала, бидејќи ме фалеа дека ракописот ми е вистински краснопис (што патем, одамна веќе се претвори во ногопис), многу сакав да ги препишувам рецептите во нови тетратки.

Ме нервираше тоа што никогаш не ги знаеше точните мерки и кај неа сѐ беше „отприлика“ или, „дојди да гледаш како ги правам па ќе знаеш“.

Арно ама, немав трпение за гледање. Преферирав дегустација на крајот.

Потоа ќе изедев толку многу што веќе не ми беше гајле за рецептот, не планирав да ги јадам до крајот на животот.

Ама кога мајка ми ќе почнеше да опишува колку биле вкусни крофничките со белки, крцкави однадвор, а меки внатре, или пак колку биле убави палачинките филувани со лук и со ореви, или пак оној нејзин вкусен милиброд со мак и питата со дебели витки, веднаш добивав апетит.

Повторно не сакав да гледам како ги прави бидејќи ми се чинеше дека сето тоа предолго трае.

Искрено, не бев баш многу по готвењето, тоа ми дојде малку подоцна, кога почнав наместо за политика, да пишувам за кујна.

Ама мајка ми сѐ уште готвеше, а јас мислев дека вечно ќе биде тука.

Сега, тетратките затурени наваму-натаму, сите освен една-две во кои, како за белја, ги нема нејзините најдобри рецепти.

Тие си ги имаше во малиот прст, а ги запишувала само туѓите, па до секој рецепт пишува и од кого е.

На пример, ванилици од Ана, плетенка од Хилда, полнети модри патлиџани од Живка,… итн.

А кога почна да заборава, престана да готви.

Е дури тогаш ми текна дека требало со време да си ги запишам рецептите.

Значи, грлово ми се стегна кога деновиве, за мојот роденден, пак ја утнав тортата со вишни.
Нашата јунска торта со вишни, која беше омилена кај нас дома, а мајка ми ја правеше традиционално, за секој мој роденден.

И не беше секогаш баш со вишни. Некогаш беше со јагоди, некогаш со рибизли, но секогаш со свежи плодови.

И беше превкусна.

Кога почна да заборава и престана да готви, немаше веќе ни торта со вишни.

Не е баш тешка за правење. Другарка ми Бети која цел живот живее во куќата отспротива, за разлика од мене, успеала да го запише рецептот кој, за жал, не е баш толку прецизен, па така и неколкуте мои обиди да ја направам сама, имаа за резултат торта која беше или полоша на изглед или полоша на вкус.

Годинава, беше полоша и на изглед и на вкус.

Сепак, ја изедовме бидејќи сега веќе не е најважното тоа што е тоа тортата направена за мојот роденден, туку тоа што сите не потсетува на мајка ми.

А мајка ми, она можеше да ја направи и со затворени очи.

Дури последниве години разбрав колку е убаво кога имате некој кому можете да му кажете: Уф, ми се јаде торта со вишни, одамна не сме јаделе’, а тој, односно, таа, веднаш тргнува во акција.

Последните години, откако се разболе од Алцхајмер, мајка ми не ја правеше ниту тортата со вишни, ниту пак нешто друго, едноставно заборави сѐ.

Освен еднаш, кога во терапевтски цели, ѝ дадовме материјал за пита. Малку ја потсетувавме што би требало да додаде уште малку, ама сепак ја направи.

Беше тоа вистинскиот вкус, баш оној на нејзината пита.

Иако многу се измори, се чувствуваше добро, како царица во кујната, речиси како порано.

Ништо по неа, го нема истиот вкус.

Ако имате сѐ уште мајки кои ги помнат своите рецепти, наговорете ги барем еднаш неделно да правите заедно по некое од нивните најдобри јадења.

Запишете ги, ќе видите, еден ден ќе сакате да повторите некое од нив и да се потсетите на вкусот.

Еве го рецептот за тортата со вишни на мама Кита (на фотографијата е онаа не баш успешна од пред 2-3 години во која наместо вишни има јагоди и воопшто не изгледа како нејзината и тоа не поради јагодите).

Состојки:

За пандишпан:

8 јајца

8 рамни лажици шеќер

8 лажици брашно

1/2 лажичка прашок за пециво

За кремот:

750 мл млеко + 50 мл за разматување на брашното и густинот

2 рамни лажици брашно

2 лажици густин

200 г шеќер

250 г омекнат путер

1 ванилин шеќер

За украсување:

1 кг вишни (јагоди, малини, рибизли…)

Приготвување:

Изматете ги белките во цврст снег. А потоа полека додавајте го брашното помешано со прашокот за пециво.

Во друг сад изматете ги жолчките со шеќерот во густа смеса. На крајот, соединете ги полека смесите и ставете да се пече во подмачкан и набрашнет калап за торта. Можете да ставите и хартија за печење, а и не мора.

Печете го пандишпанот околу 30 минути во загреана рерна на 180 степени.

За кремот, ставете ги млекото и шеќерот во тенџере на тивок оган и почекајте да зоврие, а потоа полека, додавајте ги брашното и густинот кои претходно ќе ги разматите во малку ладно млеко. Постојано мешајте со рачна мешалка.

Кога кремот ќе се згусне, тргнете го тенџерето од ринглата и оставете го да се олади.

Кога е кремот изладен, не треба да е сосема изладен, доволно е да не е жежок, додадете го изматениот путер со ванилин шеќер. Измешајте убаво со миксер за да нема грутчиња.

Пандишпанот, откако ќе се олади исечете го полека на два дела, како и за секоја друга торта.

Намачкајте ја едната половина со крем, наредете густо од овошјето, па ставете го вториот дел од тестото и премачкајте го со останатиот дел од кремот. Наредете ги одозгора останатите вишни или што и да имате од шумски плодови и ставете ја тортата во фрижидер.

Најдобро е да се прави навечер и да се јаде следниот ден.

Во последните неколку години на интернет редовно се појавуваат апликации кои се рекламираат како спас за домашниот буџет, бидејќи лесно ги комбинираат достапните состојки во јадења што можеме да ги подготвиме. Меѓутоа, доколку ги отвориме и „загребеме“ малку подлабоко, брзо ќе сфатиме дека се работи за половични решенија, кои – или не ги вклучуваат сите намирници, или не нудат рецепти за она што го имаме на располагање…

Но, тоа не е случај со SuperCook. Оваа апликација која ја користат повеќе од милион луѓе ширум светот и има висока оценка од 4,6 на Google Play Store, воодушевила многумина.

Со нејзина помош можете лесно да ги искористите остатоците од фрижидерот.

Не е важно дали имате само две или повеќе од десет состојки што сакате да ги вклучите во вашиот оброк, SuperCook ги организира рецептите така што ќе го искористите оптимално она што го имате, се разбира, за да фрлате што е можно помалку храна.

И сè функционира многу едноставно. Ги избирате намирниците што ги имате, а тие се поделени во категории: од зачини, до месо, риба, зеленчук, овошје, млечни производи, јаткасти плодови, масло и маснотии, вино итн., а потоа апликацијата ви предлага изводливи рецепти за што е можно помалку фрлање на храна.

Бидејќи сме едни од оние кои мислат дека е проблем што го фрламе вишокот храна, ова решение изгледа идеално за сите вас кои се борат со истиот проблем.

Имено, оваа апликација, која е достапна и во десктоп верзија, функционира дури и ако внесете само една намирница. Единствените намирници на кои апликацијата смета дека би морале да ги имате се: сол, црн пипер и вода.

Така, без разлика дали имате една или десет различни намирници дома, SuperCook составува рецепти за оптимално да го користите она што го имате во фрижидер, замрзнувач или во плакарот, сѐ со цел да фрлате што помалку храна. Кога ќе изберете што ви е достапно, можете точно да одредите што сакате од оброкот, дали тоа треба да биде појадок, ручек, десерт, ужина.

Затоа, доколку имате проблем со фрлањето на вишокот храна, бидејќи понекогаш едноставно немате идеја што да готвите со она што го имате во кујната во тој момент, задолжително означете ја оваа страница. Достапен е на англиски јазик, но веруваме дека ќе ви биде лесно, бидејќи вреди да се потрудите – освен што ќе ви заштеди пари со користење на сè што веќе сте го платиле, исто така ќе ве спречи да одите на ново купување кога ќе можете веќе со вашите постоечки намирници да подготвите хранлив оброк.

Рецептот за подготовка на домашен квасец е многу едноставен, а единствената „маана“ е што подготовката трае неколку дена, но штом вашиот квасец ќе биде подготвен за употреба, со секојдневно „хранење“ ќе можете да го користите во неограничени количини. Внимателно следете ги рецептите и нема да згрешите.

Древните египетски цивилизации користеле квасец и процес на ферментација за дигање на тестото уште пред 5.000 години, без да го знаат хемиското дејство на квасецот.

Пекарскиот квасец бил и останува незаменлива состојка во правењето леб ширум светот.

Квасецот е овална или тркалезна едноклеточна габа, невидлива со голо око, која спаѓа во групата на микроорганизми.

Постојат неколку видови квасец од кои е можно да се произведе леб, пиво, вино, жестоки пијалаци или гориво на база на етанол. Научното име на најпознатиот вид на квасец е Saccharomyces cerevisiae. Овој вид е многу силен и способен за ферментација. Почесто се нарекува пивски квасец и пекарски квасец.

За да се репродуцираат и растат клетките на квасецот, потребна им е енергија, која ја добиваат од разни шеќери. Квасците ферментираат шеќери во процес наречен алкохолна ферментација, чии крајни производи се јаглерод диоксид и алкохолот етанол, кои клетките на квасецот го ослободуваат во околната течност.

Во печењето, кога квасецот го ферментира шеќерот од брашното и додадениот шеќер, јаглерод диоксидот не може да избега бидејќи тестото е еластично и растегливо, а добиениот гас предизвикува тестото да нарасне. Така се родил терминот „квасен леб“.

Пекарскиот квасец е жив и активен. Постои во различни форми кои можат да ги задоволат различните потреби на пекарската индустрија: свеж, сув или течен.

Пивскиот квасец се нарекува и прехранбен квасец и се користи како додаток во исхраната.

Овошен квасец
Состојки:

1 јаболко
750 грама остро брашно
520 мл вода

Приготвување:

Јаболкото исечете го на половина, извадете го јадрото и изрендајте го во сад.

Измешајте половина кг брашно со 350 мл вода, додадете го ренданото јаболко и сè добро затворете во тегла.

По три дена смесата ќе нарасне и ќе се појават меурчиња.

Половина од смесата фрлете ја, а другата половина измешајте ја во сад со 250 грама брашно и 170 мл вода. Добро затворете ја смесата во тегла и оставете ја неколку дена на собна температура.

Кога ќе се појават меурчиња, вашиот квасец е подготвен за употреба.

За совршен леб потребни ви се 250 грама квасец, а остатокот од смесата продолжете да го одржувате со додавање брашно и вода потребни за смесата да биде ретка.

Квасец од житарки
Првиот ден измешајте 20 гр брашно и 20 мл вода за да добиете хомогена смеса.

Вториот ден измешајте уште 20 грама брашно и 20 мл вода и убаво измешајте ја смесата уште два пати во текот на денот.

Третиот ден додадете уште 30 грама брашно и 30 мл вода и измешајте уште два до три пати во текот на денот.

Четвртиот ден извадете половина од смесата и повторете ја постапката од третиот ден.

Направете го истото петтиот и шестиот ден.

Седмиот ден, вашиот квасец е подготвен за употреба.

Квасец од компир
Сварете еден компир на коцки додека добро не се свари.

Исцедете го, но зачувајте ја водата. Измешајте ги компирите со една лажичка сол и една кафена лажичка шеќер. Оставете ја смесата да се излади и додадете четвртина од водата во која се варел.

Оставете ја смесата да отстои неколку дена.

Квасец за тесто

200 гр интегрално брашно
1 дл топла вода
1 лажичка мед

Приготвување:

Измешајте 50 гр интегрално брашно и 1 дл топла вода.

Додадете 1 лажичка мед или јачменов слад.

Измешајте, ставете во стаклена тегла, покријте со крпа и оставете да отстои на топло место.

Следниот ден промешајте и повторно поклопете.

Вечерта на третиот ден, кога ќе се појават меурчиња, додадете 150 гр брашно и 1,5 дл вода.

Добро измешајте и повторно покријте ја теглата.

Четвртиот или петтиот ден смесата ќе биде готова за подготовка на тестото.

Земете 1 грст квас, а остатокот (оставете го во стаклена тегла) и чувајте го затворено во фрижидер.

Ладната супа е идеално јадење кога ви треба освежување во текот на топлите летни месеци. Освен што се богати со хранливи материи, ладните супи обично се подготвуваат без вклучување на шпоретот и се готови за кратко време. Ладните летни супи можете да ги послужите како предјадење или како главно јадење, со леб или фокача, за јадењето да биде позаситно.

Ладни супи – рецепти
Ладните супи за лето можат да бидат многу разновидни и вкусни, а брзо се подготвуваат и даваат освежување. Подолу ќе најдете неколку рецепти.

Ладна супа од домати – гаспачо
Доматите ги има во изобилство во лето, а еден од одличните начини да ги искористите е да направите супа. Можете да направите обична супа од домати и да ја ставите во фрижидер, но овој шпански специјалитет има малку поспецифичен вкус. Освен што е освежителен, газпачо се подготвува и без вклучување на шпоретот! Основата на оваа супа се доматите, но содржи и разни други сиров зеленчуци, што ја прави хранливо побогата. Оваа супа е погодна за вегани.

Состојки:
900 гр свежи домати
1 краставица
1 зелена пиперка
1/2 црвен кромид
2 чешниња лук
3 супени лажици маслиново масло
2 лажици оцет, некој овошен
1 лажичка сол
1/2 лажичка црн пипер.

Приготвување:
Исчистете го зеленчукот, а потоа изблендирајте ги сите состојки во процесор за храна. Во зависност од конзистентноста што ја сакате, гаспачото може да биде помазно или позрнесто по текстура. Доколку е потребно, додадете повеќе сол и црн пипер.
Гаспачото можете да го послужите веднаш, но идеално би било да го оставите да отстои околу три часа во фрижидер.
Послужете го во сад или чаша. Ако го сервирате во сад, одозгора додадете уште малку маслиново масло и по желба крутони.
Во традиционалното гаспачо се користи леб, што му дава погуста текстура. Во овој рецепт нема леб, но ако сакате, една кришка бел леб без кора може да изблендирате со останатите состојки.

Ладна супа од краставици
Ладна супа од краставици и јогурт (поинаква е од таратурот), е исклучително освежителна и идеална за летните горештини. Ако е можно, би било идеално да ја оставите оваа ладна супа од јогурт и краставици да отстои преку ноќ во фрижидер, но можете да ја оставите и само неколку часа.

Состојки:

2 големи краставици

1 и пол шолја грчки јогурт

3 супени лажици сок од лимон
1 мал сечкан кромид
1 чешне лук
1/3 шолјичка копар
1/4 шолјичка магдонос
1/4 шолјичка маслиново масло
сол и црн пипер по вкус.

Приготвување:
Излупете ги краставиците и исечете ги на коцки. Одвојте неколку коцки за сервирање.
Сите состојки изблендирајте ги во процесор за храна додека не добиете кремаста супа.
Ставете ја супата во фрижидер неколку часа.

Послужете ја супата ладна, со парчиња краставица одозгора.
Доколку избегнувате млечни производи или сте на веганска исхрана, оваа супа можете да ја направите со вегански јогурт, како што е соја или кокос.

Ладна супа од цвекло
Оваа супа е полски рецепт за ладна супа од цвекло наречена хлодник. За подготовка на ова јадење се користат цвекло и листови цвекло, па ќе ги искористите сите делови од зеленчукот!

Состојки:
2 цвекла со лисја
2-3 лажици сок од лимон
400 мл супа од зеленчук
750 мл течен или грчки јогурт
3-4 супени лажици сечкан свеж копар
4 супени лажици сечкан свеж власец
10 рендани ротквици
1 рендана краставица
1 чешне сечкан лук.
Можете исто така да користите кефир или комбинација од јогурт и кефир.

Приготвување:
Излупете го и изрендајте го цвеклото. Листовите и стеблата од цвекло исечете ги на помали парчиња.
Во сад ставете ги цвеклото, сокот од лимон и супата од зеленчук и сè заедно варете околу пет минути.
Потоа, исклучете го огнот и оставете супата целосно да се излади, па додадете ги останатите состојки.
Ставете ја супата во фрижидер најмалку половина час пред да ја послужите.
Оваа супа обично се служи со варено јајце одозгора. Значи, ако сакате, додадете јајце пред сервирање.

Ладна супа од грашок
Комбинацијата од грашок и нане е освежувачка, а во форма на ладна супа станува идеално летно јадење. Оваа супа е погодна и за вегани.

Состојки:
1 супена лажица маслиново масло
1 сечкан кромид
1 чешне сечкан лук
3 и пол чаши замрзнат или свеж грашок
2 и пол чаши супа од зеленчук
2 супени лажици сок од лимон
3 супени лажици свежо нане
сол и црн пипер по вкус.

Приготвување:
Загрејте го маслиновото масло во тенџере со средна големина и пропржете го кромидот 5-10 минути. Кон крајот додадете го лукот и пржете уште една минута.
Додадете го грашокот и супата и сè заедно варете 5-10 минути.
Исклучете ја топлината, додадете сок од лимон, нане и сол и црн пипер по вкус.

Ладна супа од авокадо
За сите љубители на авокадо и кремасти супи, оваа ладна супа од авокадо е идеална! Авокадото е богато со витамини и здрави масти, така што оваа супа може да обезбеди вистинско хранливо богатство.

Состојки:
1 авокадо
1 лажица сок од лимон или лимета
1/4 чаша свеж коријандер
1 чешне лук
1 чаша грчки јогурт
1 лажичка сол
1/4 лажичка црн пипер
1/4 лажичка ким
1/2 чаша ладна вода или супа од зеленчук.
Ако сакате супата да биде малку позачинета, додадете 1/8 лажичка кајенски пипер.

Приготвување:
Сите состојки ставете ги во процесор за храна и блендирајте додека не добиете кремаста супа. Доколку е потребно или ако сакате поретка супа, додадете повеќе вода.
Супата можете да ја послужите веднаш, но идеално би било да ја оставите да отстои половина час во фрижидер пред да ја послужите.

Иако не е локална намирница, не може да му се одземат сите оние здравствени придобивки кои се резултат на тоа што авокадото содржи вистинско богатство од здрави хранливи состојки.

Но и покрај тоа што со години слушаме за нутритивните придобивки од авокадото, спаѓаме или во групата што го сака или во групата која во широк лак го избегнува ова овошје. Похрабрите, кои ќе излезат од својата комфорна зона, можеби ќе му дадат шанса, но таа често завршува неславно. Најчеста причина за тоа е што купуваме незрели авокада и ги јадеме самостојно.

Повеќе од гвакамоле

Авокадото совршено ќе се вклопи со друга храна, па неговиот вкус, кој некои го сметаат за безличен, ќе се изгуби и ќе стане навистина вкусен. Кога велиме авокадо, веднаш помислуваме на гвакамоле сос, кој е навистина убав, но со текот на времето може да стане монотон и малку досаден. Затоа, донесуваме два едноставни и брзи рецепти кои ќе ви помогнат да ја прекинете рутината и да им обезбедите на вашите непца нови димензии на вкусови.

Чамци од авокадо

Ова е одлична идеја за хранлив оброк кој може да ви биде и појадок и ручек и вечера.

Состојки за четири порции:

2 зрели авокада, преполовени и без семка
4 јајца
сол
мелен црн пипер
3 парчиња сланина (по желба)
свежо сечкан млад кромид, за декорација

Приготвување:
Загрејте ја рерната на 180°C.
Во садот за печење ставете ги авокадата.
Скршете едно по едно јајце во сад и ставете по една жолчка од јајце на секоја половина од авокадото.
Потоа, додадете со лажица онолку белка колку што ќе собере во издлабените половини од авокадото.
Зачинете со сол и црн пипер и печете додека не се стврднат белките и жолчките.
Во меѓувреме, во голема тава на средна топлина, испржете ја сланината додека не стане крцкава. Исечкајте ја и пред сервирање, ставете ја врз авокадото со исчеканиот млад кромид.

Чипс од авокадо

Кој вели дека чипсот не може да биде здрав? Докажете го спротивното со овој рецепт.

Состојки:

1 големо зрело авокадо
75 грама рендан пармезан
1 лажичка сок од лимон
1/2 лажичка лук во прав
1/2 лажичка италијански зачини
сол
мелен црн пипер

Приготвување:

Загрејте ја рерната на 160°C и обложете две тепсии со хартија за печење.
Во сад изгмечете го авокадото со вилушка додека смесата не се изедначи.
Измешајте пармезан, сок од лимон, лук во прав и италијански зачини. Додадете сол и црн пипер.
Ставајте топчиња од смесата со големина на лажичка на плехот за печење, оставајќи простор помеѓу секое топче.
Секое топче израмнете го на околу седум сантиметри ширина со задниот дел од лажицата.
Печете ја смесата додека не стане крцкава и златна, околу 30 минути, а потоа оставете ја целосно да се излади.
Послужете на собна температура.

Хранливи својства

Авокадото содржи вистинско богатство од здрави нутритивни состојки и затоа може да стане вашето омилено овошје во секојдневната исхрана. Едно авокадо содржи околу 1.000 милиграми калиум, што е, за споредба, двојно повеќе од количината во една банана. Богато е со магнезиум и витамини Е, Ц, К и Б. Покрај тоа, содржи околу две третини од дневната потреба за фолна киселина. Поради добрите, незаситени масти, се покажало дека е добро за луѓето со повисоко ниво на HDL холестерол. 13,5 грама влакна во еден плод ќе обезбеди поволни ефекти за побавно зголемување на шеќерот во крвта. Лесно сварливите протеини со кои е богат може да бидат дополнителен плус во неговиот избор.

Како да го изберете вистинското авокадо

Нема да згрешите ако купите потврдо авокадо и ако го оставите да созрее на собна температура и потоа да го преместите во фрижидер. Ќе знаете дека авокадото е зрело ако неговата кора добие малку кафена боја, а самото овошје стане помеко.

За да спречите оксидација, додадете неколку капки сок од лимон врз исеченото авокадо.

Здравиот намаз од модар патлиџан е идеална замена за млечни намази или паштети и подеднакво добро ќе им послужи на веганите да уживаат во брускети или препечен леб.

Намазот од модар патлиџан може да се служи како појадок, ужина, предјадење или вечера.

Одлично се комбинира и е идеален за овој период.

Арапски намаз од модар патлиџан
Доколку го сакате намазот од модар патлиџан, рецептот што ќе ви го напишеме подолу ќе ги задоволи вашите вкусови. Намазите се исклучително популарни во арапските земји, а стандардниот намаз од модар патлиџан е всушност арапски рецепт.

Состојки:
2-3 средни модри патлиџани (1 кг)
1-2 чешниња лук
1/4 чаша сечкан магдонос
морска или хималајска сол
1-2 лажици екстра девствено маслиново масло
малку сок од лимон (по избор).

Приготвување:
Измиените патлиџани исечете ги на кришки или половини и печете ги на 180-190 °C додека не омекнат (околу 30 минути).
Потоа изладеното месо од модар патлиџан ставете го во блендер со останатите состојки додека не добиете намаз.
Кога намазот е готов, изладете го и послужете.

Намаз од модар патлиџан и таан (баба гануш)
Ако веќе сте пробале сличен рецепт за намаз од модар патлиџан, баба гануш не ви е непознат. Таанот или намазот од сусам е популарен и во источните земји, а комбинацијата од модар патлиџан и сусам ќе создаде исклучителен ориентален вкус.

Состојки:
1 кг модар патлиџан (2-4 средни)
2-3 супени лажици таан
1 чешне здробен лук
2-3 лажици сечкан магдонос
1 лажица екстра девствено маслиново масло
1 лажица сок од лимон
малку морска сол
2-3 лажици павлака (по избор).

Приготвување:
Откако ќе ги испечете патлиџаните во рерна како во претходниот рецепт, оставете го мекото месо да се излади. Сите состојки освен маслиновото масло ставете ги во блендер.
Кога смесата ќе стане хомогена и слична на намаз, додадете маслиново масло и повторно сè убаво измешајте.
Ладниот намаз послужете го по желба, а ви препорачуваме со препечен леб, брускети и сл.

Малиџано – намаз од модар патлиџан и сирење
Здравиот намаз од модар патлиџан е популарен кај нас и заедно со пиперките е меѓу најкористените зеленчуци. Покрај претходните рецепти, пробајте ја и оваа комбинација.

Состојки:
4 – 5 модри патлиџани со средна големина
100 гр мајонез
150 гр павлака
200 гр рендано сирење (кравјо, овчо или фета)
2-3 чешниња здробен лук
3-5 лажици сок од лимон
морска сол и малку црн пипер по желба.

Приготвување:
Печењето на патлиџаните е исто како и во претходните рецепти.
Изладеното месо од модар патлиџан ставете го во блендер или испасирајте го со вилушка или со гмечалка за пире.
Потоа додадете ги останатите состојки и убаво измешајте додека не добиете хомогена смеса што може да се мачка.
Изладениот намаз послужете го со топол тост леб или со која било храна по ваш избор.

Намаз од модар патлиџан и пиперка
Овој намаз е идеален за лето кога не можеме да поднесеме тешка храна, а комбинира модар патлиџан, пиперки и домати за лесна летна закуска.

Состојки:
1 среден модар патлиџан
2-3 пиперки
3 помали домати
2-3 чешниња лук или еден кромид
екстра девствено маслиново масло
морска сол, црн пипер и чили во прав по желба.

Приготвување:
Зеленчукот треба да биде термички обработен, па најдобро е да ги исечкате модриот патлиџан, кромидот, пиперките и доматите, да ги прелиете со масло и сол и да ги распоредите врз хартија за печење.
Се пече на 180 °C додека пиперката не потемни и зеленчукот не стане мек.
Потоа, изладениот зеленчук ставете го во блендер и сомелете го до хомогена конзистентност.
По желба зачинете.