Познатиот готвач со словачко-австриско потекло, Филип Ондрушек, од денес, 19 мај до 26 мај ќе престојува во Македонија и како гостин на „Слоу Фуд“ ќе ги истражува автентичните македонски вкусови, локалните производи и традиционалната кујна.

Наместо луксузни хотелски кујни и затворени гастро-настани, Ондрушек ги одбра македонските пазари, локалните производители, селските трпези и автентичните вкусови на Охрид, Битола, Преспа и Мариово. Тој ќе ја истражува локалната традиција, сезонските производи и потенцијалот на нашата кујна како современ гастрономски бренд.

Во рамките на посетата, Ондрушек ќе одржи мастер клас на Факултетот за туризам и угостителство во Охрид на тема „Локални состојки, сезонски менија и гастрономија без отпад“. Пред студентите ќе зборува за современите гастрономски трендови, одржливата гастрономија и улогата на локалните состојки во современата кујна. Посебен дел од програмата ќе биде демонстративната сесија за готвење со локални и сезонски состојки, како и дискусијата за управување со „нула отпад“ во професионалните кујни – тема која денес е еден од најважните глобални трендови во гастрономијата.

Ондрушек ќе има и средби со локални производители и готвачи, а во Винарија Манастир ќе се одржи панел за кулинарска соработка и „зелено гостопримство“. Заедно со готвачите од локални ресторани во Охрид, ќе работи на јадења инспирирани од традиционалната македонска кујна, сезонските производи и современите техники на готвењето. Во панел-дискусијата „Зелено гостопримство во Охрид“ ќе се разговара за одржливо управување со ресторани, намалување на отпадот од храна, енергетска ефикасност во угостителството, локални набавки, кратки синџири на снабдување, но и за гастрономијата како сериозен туристички производ за Охрид и Македонија.

По Охрид, гастрономската приказна продолжува во Битола и Пелагонија. Ондрушек ќе ја посети Преспа, каде ќе се запознае со подготовката на традиционалното ѓомлезе, потоа ќе го посети битолското село Дихово – познато по македонската медоносна пчела, како и Буково – село мапирано по прочуената буковска пипер. Ќе се одржи работилница и во битолската гостилница „Фуд Рипаблик“, која користи производи од локалните производители и има автентичен македонски шмек.

Одрушек ќе се сретне и со млади готвачи од мрежата на Слоу фуд Македонија, ќе го посети регионот Мариово и селото Зовиќ, винаријата Сарика, а ќе прошета и низ Старата чаршија и пазарот во Битола. Посетата ќе заврши со подготовка на гала вечера.

Посетата на Филип Ондрушек се очекува да донесе нова енергија и дополнителна промоција на македонската гастро-сцена пред меѓународната јавност.

По повод 30 години од воспоставувањето на дипломатските односи помеѓу Словенија и Македонија, во организација на словенечката амбасада и здружението Слоу фуд Македонија, во ресторанот „Ореов лад“ утрово беше послужен традиционален словенечко-македонски појадок.

Алпско млеко, мед и путер од Словенија и македонски домашни производи од членови на локалната организација на Слоу фуд, како матеница, крем-сирење, мармалад од шипки, сок од калинки, маџун и проја, беа послужени на заедничкиот појадок чиј домаќин беше амбасадорот на Р Словенија, Н.Е. Милан Предан.

Во својот поздравен говор амбасадорот, но и претставниците на Слоу фуд Македонија, го истакнаа значењето на здравата традиционална храна и креирањето на навиките за здрава исхрана уште од рана возраст. Токму затоа дел од овој настан беа и неколку деца, ученици во трето одделение и нивната наставничка Славица Зафировска од основното училиште „Крсте Мисирков“ од Скопје, во кое веќе неколку години функционираат училишни градини. во кои децата одгледуваат зеленчук и се радуваат на плодовите од својот труд.

На настанот присуствуваше и сопругата на Претседателот на државата, госпоѓа Елизабета Ѓоргиевска Пендаровска која, иако не зборуваше на настанот, им посвети особено внимание токму на најмалите гости.

Инаку, традиционалниот словенечки појадок е иницијатива на словенечкото здружение на пчелари кое во 2006 година започнало да ги поврзува пчеларските друштва и училиштата во спроведувањето на проектот „Мед за појадок во градинките и основните училишта“, или скратено иницијативата „меден појадок“. Набргу потоа, проектот, кој се одржувал секоја година во третиот петок од ноември, бил проширен и во средните училишта и центрите за професионални активности.

На иницијатива на Здружението на пчелари на Словенија, појадокот со мед станал „Традиционален словенечки појадок“ и бил усвоен на национално ниво во 2011 година.
Слоганот на овогодинешниот настан е Појадок со млеко – одличен ден!

Затоа и денешниот датум, 18 ноември е одбран за одржување на словенечко-македонскиот појадок на кој се одбележа важноста на здравата исхрана генерално, но и важноста на пчелите и другите опрашувачи, за производството на храна.
Со спроведување на иницијативата за појадок со мед, се истакнува важноста на зачувување на природата и животната средина и важноста на пчелите, кои се апсолутно неопходни за подобар свет, свет без глад!

За разлика од последното издание на Тера Мадре, пред почетокот на пандемијата, кога на штандовите со храна локалните производители на Слоу фуд од многу земји ширум светот великодушно ги делеа своите производи, годинава кризата се чувствува и тука, на најголемиот собир на Слоу фуд во Торино, Италија. По едно лешниче, едно зрно чоколадо, трошка пармезан и капка вино, дегустациите се скромни и минимални, а како по обичај, оние најсиромашните се и највеликодушни. Па така, на штандот на Слоу фуд Македонија се служи највкусната храна, од леб и буковец измешан со нане, макало со лук и ореви, ајвар и лепче, слатко од зелени смокви, гравче, до печено јагне.

На 22.09 (четврток) павилјонот на Македонија беше отворен во присуство на Весел Мемеди – македонскиот амбасадор во Рим, Лидија Попандонова – претставничката на Македонија во Организацијата за храна и земјоделство на ОН, ФАО, воедно и заменик претседавач со Европската комисија за земјоделство на оваа организација и други членови на делегацијата.

Оттука почна и патот на македонската арка со презентација и дегустација на автентични македонски производи, дегустација и оценување на овчеполското јагне, најпознат извозен бренд во Италија, во организација на земјоделската задруга „Еко Овчеполка“, презентација на македонското сточарство и млекарство, кампањата „Млеко“ и дегустација на традиционални сирења произведени од сирово млеко. Се разбира за готвењето се задолжени готвачите на Слоу фуд, Зоки, Димитар и Пеце кои неуморно ја подготвуваат сета храна.

Вториот ден, пак, помина во знакот на македонската медоносна пчела Apis mellifera macedonica како симбол за зачувување на генетските ресурси и основна цел на
здружението Макби, кое е президиум на Слоу Фуд Македонија, како и дискусија за важноста и иднината на пчеларството и дегустација на мед и пчелни производи заедно со производителот Дичо Димкоски. Беше претставена и валандовската свадбена погача Чурек, која ја изработи вредната Македонка Узунова од Слоу Фуд Валандово, пекарка и производителка на слатко од диви смокви која не воведе во ритуалот на подготовка на оваа свадбарска погача.

Слободан Чокревски ги презентираше македонските вина, како и првото издание на водичот Slow Wine и секако, се дегустираа одбрани вина, препорачани
во водичот.

Следуваат уште интересни настани на нашиот штанд и генерално, во рамките на целиот настан за кои ќе следуваат уште многу интересни приказни.