Истражувачи од Универзитетот на Сиднеј, Австралија, откриваат дека луѓето кои вежбаат редовно, но се хранат лошо, се изложени на иста опасност од срцеви заболувања, рак или друга болест како и оние кои го јадат истото, но не вежбаат.

Иако постојат значителни општи придобивки кај вежбањето, вклучувајќи го целокупното здравје и можните естетски придобивки, истражувачите предупредуваат дека здравата исхрана е, сепак, од суштинско значење. Многу луѓе кои не внимаваат што јадат, веруваат дека тоа ќе го надоместат само со вежбање… Науката вели – тоа не оди така.

„И редовното вежбање и здравата исхрана играат важна улога кога станува збор за здравјето и долговечноста… Оваа студија ја нагласува важноста и на физичката активност и на квалитетната исхрана во постигнување на најголемо намалување на опасноста од смртност“, вели Мелоди Динг, вонреден професор на Универзитетот на Сиднеј.

Истражувачите, кои ги објавија своите наоди во британскиот „Журнал“ за спортска медицина (British Journal of Sports Medicine), собраа податоци од 360.600 возрасни лица од Велика Британија, поточно „Ју-кеј биобанк“.

Секој од учесниците бил категоризиран врз основа на пријавени обрасци на јадење и вежбање. Луѓето кои јаделе најмалку пет порции овошје и зеленчук секој ден, редовно консумирале риба, а поретко црвено месо, се оценети во графата за најсооодветна исхрана.

Во посебна група се ставени оние кои редовно вежбаат, а не практикуваат  здрава исхрана. Истражувачите потоа ги споредиле стапките на смртност од сите причини во период од 11 години меѓу сите луѓе чии податоци биле собрани. Откриено е дека луѓето со висококвалитетна исхрана и редовно вежбање имаат 17 отсто помала можност да починат од која било причина отколку претходните лица.

„Почитувањето на квалитетна исхрана и физичка активност се важни за оптимално намалување на опасноста од смрт од сите причини, како што се кардиоваскуларни болести и рак“, вели коавторот на трудот, Џо Ван Бускирк.

Оние во најздравата група имале 19 отсто помали шанси да починат од срцеви заболувања и 27 отсто помали шанси да умрат од рак во однос на оние кои не внимаваат на исхраната

Консумирањето умерени количини на незасладено или засладено кафе се чини дека е поврзано со помал ризик од смрт, тврдат кинеските научници.

Резултатите од оваа студија се засноваат на податоци од анкета на повеќе од 171.000 испитаници од Обединетото Кралство. Испитани се нивните навики за консумирање кафе, посебно за консумирањето кафе засладено со шеќер, кафе засладено со вештачки засладувачи и незасладено кафе и поврзаноста со смртноста од сите причини.

Во текот на седумгодишниот период на следење, авторите на студијата откриле дека лицата кои консумирале било каква количина незасладено кафе имале 16-21% помали шанси од смртен исход од испитаниците кои не консумирале кафе.

Тие исто така откриле дека луѓето кои консумираат 1,5-3,5 шолји кафе дневно имале 29-31% помала веројатност од смртен исход, во споредба со оние кои не консумирале кафе. Научниците забележале дека испитаниците кои консумирале кафе засладено со шеќер додаваат во просек само една лажичка шеќер по шолја кафе. Резултатите биле недоследни за испитаниците кои користеле вештачки засладувачи.

Научниците известуваат дека кафето содржи соединенија кои можат да обезбедат здравствени придобивки. Меѓутоа, истакнуваат дека варијаблите вклучувајќи го социо-економскиот статус, исхраната и другите фактори на животниот стил можат да влијаат на резултатите. Врз основа на овие податоци, авторите на студијата веруваат дека нема потреба поголемиот дел од оние кои консумираат кафе да го исфрлат овој напиток од исхраната, туку треба да се внимава со консумирањето на кафиња кои содржат различни висококалорични додатоци, како што се шлаг и слатки преливи.

Авторите исто така нагласуваат дека навиките за консумирање кафе наведени во студијата се стари речиси десет години. Оттогаш, навиките за пиење кафе можеби се смениле, не само во однос на видовите на кафе, туку и во однос на просечната количина на консумирано кафе. Ова може да биде релевантно во однос на здравјето и смртноста од сите причини поврзани со пиењето кафе. Понатаму, постои можност испитаниците да ја потцениле количината на кафе што го консумирале, што исто така влијае на резултатите од студијата. Како заклучок, треба да се забележи дека количината на додаден шеќер пријавена во оваа студија била многу мала и можеби не ја одразува вистинската количина на шеќер што луѓето обично го додаваат во кафето.