Високите стандарди во создавањето вина, децениската посветеност на квалитетот и континуираните успеси на меѓународната сцена ѝ донесоа значајно признание на винарската визба „Тиквеш“, која ја освои титулата „Best Producer – Republic of North Macedonia“, на престижниот вински натпревар Mundus Vini.

– Да се биде прогласен за најдобар производител од Македонија на натпревар со реномето на Mundus Vini е потврда за нашата посветеност, визија и континуирани инвестиции во квалитетот на нашите вина. За нас ова признание има особено значење, но претставува и дополнителен мотив во иднина сѐ поамбициозно да го унапредуваме квалитетот. Ќе продолжиме да создаваме вина кои со својата автентичност и комплексност ќе бидат препознаени и ценети од винските експерти и од потрошувачите од целиот свет и ќе бидат уште поголема гордост на Македонија – изјави Светозар Јаневски, претседател на Управниот одбор на „Тиквеш“.

Оваа почесна титула им се доделува на производители на вино кои во текот на 25-годишната историја на Mundus Vini покажале исклучителна конзистентност, врвен квалитет и извонредни резултати, позиционирајќи се меѓу најуспешните и најнаградуваните учесници во историјата на овој реномиран натпревар. Наградата е уште една силна потврда за меѓународната препознатливост на вината на „Тиквеш“, кои со години наназад освојуваат бројни признанија на најпрестижните светски натпреварувања и дегустации. Признанието „Најдобар производител – Република Северна Македонија“ се доделува врз основа на долгогодишните резултати и медали што вината на визбата ги освоиле на Mundus Vini, една од највлијателните вински манифестации во светски рамки.

Свечената церемонија за доделување на наградата ќе се одржи на 16 март оваа година, во рамките на престижниот светски вински саем ProWein Düsseldorf, кој се смета за еден од најзначајните настани за глобалната винска индустрија.

Со над 100 меѓународни награди годишно на најзначајните меѓународни вински натпревари, „Тиквеш“ продолжува да го зацврстува своето реноме како еден од најнаградуваните вински производители во регионот и силен амбасадор на македонското вино на глобалната винска сцена.

За меѓународна релевантност на „Тиквеш“ говори и фактот што вината на „Тиквеш“ се присутни на 26 странски пазари. „Тиквеш“ е лидер на македонскиот и на српскиот пазар и лидер во винската индустрија во регионот. Во 2025 година, над 60% од продажниот волумен на винарницата беше реализиран на странски пазари, при што извозот на регионалните пазари порасна за 11%, а на меѓународните пазари за 34% во однос на претходната година.

Во конкуренција на 280 винарии, производители и увозници на вино од сите балкански земји, „Тиквеш“ доби три награди на 11. Балкански вински фестивал. Признанијата ги доби во категоријата Најдобро суво вино/Балкан Шоу.

Извршниот директор на Тиквеш Радош Вукичевиќ, за МИА во Софија изјави дека форумот е многу добра платформа за позитивна конкуренција меѓу балканските производители, извозници и трговци со вино. „Тиквеш“  на бугарскиот пазар продава 500.000 литри ракија и вино и има удел од 1 милион евра.

Потрошувачката на вината на „Тиквеш“ во Бугарија расте и тие добиваат многу добра препознатливост на локалниот пазар. Македонската компанија планира да го прошири своето претставништво во Бугарија, но „Тиквеш“ бара и соработка со локални бугарски винарии, стратешки партнерства или потенцијални аквизиции кои имаат лозови насади со многу сериозен потенцијал.

Бугарија има потенцијал да привлече многу од производите на „Тиквеш“ бидејќи, според Вукичевиќ, овој пазар заедно со хрватскиот на пример е за два и пол пати поголем од српскиот.

Иако македонската компанија на бугарскиот пазар е присутна повеќе од 10 години извршниот директор на компанијата смета дека тие се на самиот почеток на развојот. Тиквеш произведува 18 милиони литри алкохол годишно или нешто повеќе од 20 милиони шишиња и е најголем производител на ракија. Компанијата е најголем производител во Југоисточна Европа.

Директорката на фестивалот и претседателка на бугарската асоцијација на извозници на вино Галина Нифору рече дека настанот е особено вреден затоа што ги зближува луѓето на Балканот, бидејќи за нив виното е мост на пријателство. 

Продолжува големиот успех на вината на „Тиквеш“ и „Tikveš Châteaux & Domainеs“. На две престижни меѓународни натпреварувања, што се одржаа во Кина и во Франција, врвните вина го докажаа својот квалитет, освојувајќи седум златни и четири сребрени медали, како и една специјализирана награда.

На најголемиот и најпрестижен натпревар што се одржуваа во Хонг Конг – „China Wine & Spirits Awards – Best Value 2022“, „Vranec Luda Mara 2019“ освои двоен златен медал, што е потврда за високиот квалитет и уникатните карактеристики по кои ова вино се издвојува во конкуренција на вина од целиот свет. Златен медал добија вината „T’ga za Jug 2021“ и „Domaine Lepovo Grand Cuvée 2019“, а на виното „Vase de Pierre 2017“ му беше доделен сребрен медал.

Оценките на вината на овој вински натпревар ги даваат 100 вински судии, номинирани од најголемите увозници на вино, ресторани и специјализирани продавници во Кина, кои годишно увезуваат вино во вредност од над 20 милијарди долари. Нивните оценки воедно се и препорака за вината и информација за потрошувачите за тоа кое вино нуди најголема вредност во однос на цената и квалитетот.

Силна потврда за високите квалитети на вината на „Тиквеш“ и „Tikveš Châteaux & Domainеs“, пристигнаа и од Франција, каде освоија седум златни медали и една специјализирана награда. Специјализираната награда беше доделена од списанието „Sommeliers International“ за црвеното вино „Bela Voda red 2019“ и претставува значајна препорака доделена од меѓународно списание наменето за винските професионалци од целиот свет. Покрај тоа, ова вино доби и златен медал, заедно со „Sauvignon Blanc Barovo 2021“ и „Bela Voda white 2021“. На овој реномиран натпревар, сребрен медал освоија вината „Alexandria Cuvée Rose 2021“,  „Domaine Lepovo Chardonnay 2021“, како и „Terrase a l’Ombre 2019“.

Големиот успех на овие меѓународни натпревари е од исклучително значење за позиционирањето на овие вина на меѓународните пазари и за зајакнување на нивната конкурентност. Наградите се значајни и за целата македонска винска индустрија и придонесуваат за промоција на земјата како винска дестинација.

Ова не се први награди годинава. Вината на „Tikveš Châteaux & Domainеs“ на еден од најголемите натпревари во светот – „Мундус вини“ 2022, освоија четири златни медали и едно специјално признание.

Следејќи ги пазарните трендови кои сѐ почесто ја наметнуваат потребата за дополнително истакнување на врската помеѓу виното, специфичното поднебје и регионот од кој тоа потекнува, ВВ „Тиквеш“ го креираше новиот вински бренд за да ја зајакне автентичноста на своите вина.

„Новиот бренд го поврзавме со името на реката Луда Мара која поминува низ тиквешкиот регион и Кавадарци и која со својата уникатна природа и карактер, како и со бројните приказни и митови поврзани со неа, по многу нешта потсетува на единствениот карактер на нашите вина. Автентичноста на бренд името и спецификата на производот овозможуваат полесно да jа раскажеме приказната за овие висококвалитетни и докажани македонски вина, што е особено важно за успех при извоз на развиените вински пазари“, објаснува генералниот директор на ВВ „Тиквеш“, Радош Вукиќевиќ.

Винарницата штотуку го лансираше и првото ново вино под овој бренд од сортата пино гриџо – „Pinot Grigio Luda Mara“, што се произведува од локалитетот Вршник (Тиквешко виногорје) во ограничена количина од само 6.300 шишиња.

Вината на „Tikveš Châteaux&Domainеs“ добија уште една важна потврда на својот исклучителен квалитет на еден од најпрестижните и најголеми вински натпревари во светот – „Мундус вини“ 2022, освојувајќи четири златни медали и едно специјално признание.

На пролетното издание на овој врвен меѓународен вински натпревар златни медали освоија Sauvignon Blanc Barovo 2021, Barovo red 2019, Domaine Lepovo Pinot Noir 2019 и Terrasse a L’Ombre 2019, при што ова исклучително вино од француската винарница на „Тиквеш“ – Château de Gourdon, беше оценето и како „Најдобро од долината на Рона“, еден од најпознатите вински региони во Франција, во кој е лоцирана винарницата. За истакнување е и дека виното Sauvignon Blanc Barovo 2021 добива значајно признание, какво што е златниот медал на „Мундус вини“, уште во првата година по неговото создавање и лансирање на пазарот.

Значењето на овие признанија за вината на „Tikveš Châteaux&Domainеs“ е дотолку поголемо што се добиени во конкуренција на илјадници вина од десетици земји во светот. Вината се оценувани од меѓународно жири составено од врвни енолози и сомелиери, признати трговци на мало со исклучително знаење на виното, вински новинари и научници од целиот свет. Оценувањето на вината се одвива „на слепо“, што значи дека жирито нема информации за карактеристиките или брендот на виното кое го дегустира.

Наградите на „Мундус Вини“ се оценети и како значајна маркетиншка алатка за зголемување на препознатливоста при настапот на високо конкурентните светски вински пазари.

Винарската визба „Тиквеш“ е најнаградуваната винарница во поширокиот регион. Во последниве години вината на „Tikveš“ и „Tikveš Châteaux&Domaines“ годишно освојуваат над 100 награди и признанија на реномирани меѓународни вински натпревари.

Филип Камби, еден од најпознатите светски енолози заслужен за развојот на современата винска индустрија, ненадејно почина на 59-годишна возраст. Камби беше и еден од консултантите на Винарската визба „Тиквеш“ и на Chateau De Gourdon во Франција, каде што работеше во повеќе винарници, особено во долината на реката Рона.

Соработката помеѓу Камби и „Тиквеш“ започна во 2009 година, а веќе следната година тој беше прогласен за најдобар енолог во светот од страна на престижниот вински критичар Роберт Паркер. Во „Тиквеш“, Камби заедно со Марко Стојаковиќ, предводник на тимот енолози во винарницата, работеше на создавање на врвните тероар вина, денес едни од најнаградуваните – „Бела Вода“, „Барово“ и „Домен Лепово“.  Покрај тоа, Камби помогна во идентификувањето на нови автентични микролокации во земјава и го промовираше македонскиот тероар.

Иако неговата работа во светот на виното беше меѓународно високо вреднувана, Камби скромно и посветено пристапуваше на секој нов проект, фокусирајќи се на автентичните потенцијали. За него најважни фактори за создавање на врвни вина беа тероарот, лозовите насади, климата и страста со која се создава една винска приказна. Неговата способност за разбирање на потребите и навиките на современите љубители на виното во голема мерка е втемелена во концептот на врвните вина на „Тиквеш“ а токму тој концепт беше голем поттик за развој на винската индустрија во земјава и во регионот.

Камби често потенцираше: „Луѓето сакаат ново врвно искуство, сега и веднаш, а автентичните сорти, се нешто што само вие можете да ги понудите. Луѓето сакаат да пробаат нови работи и затоа треба да се искористат сите средства за да се раскаже таа автентична приказна“.

„Изгубивме голем пријател и соработник. Неговиот придонес во развојот на „Тиквеш“ и на македонската винска индустрија е огромен. Страста со која пристапуваше во својата работа успешно ја пренесе и на енолошкиот тим со кој работеше во земјава и во странство, а кој понатаму самостојно успеа да создаде нови вински потенцијали и да ја збогати винската карта на „Тиквеш“. Токму преку енолошкиот тим на нашата винарница ќе продолжи да „живее“ духот на Камби“, велат од „Тиквеш“.

Винарската визба „Тиквеш“ ќе му оддаде пригодна почит на својот соработник Камби на комеморативна седница, која ќе се одржи утре, 21.12.2021 година, со почеток во 11.00 часот, во просториите на М6 Едукативниот центар.

Камби и енолошкиот тим на „Тиквеш“ успеаја да направат врвни вина кои добија највисоки оценки од Паркер, но освоија и други престижни награди на светските натпреварувања во силна меѓународна конкуренција. Токму овој тим е најзаслужен за развојот на премиум сегментот на ВВ „Тиквеш“, кој веќе е добро етаблиран и на домашниот и на странските пазари. Потврда за тоа се и многубројните награди на реномираните светски натпревари. Само во 2020 година вината на „Tikveš“ и на „Tikveš Châteaux&Domaines“, кои до сега беа одбележани со негов потпис, освоија 100 награди и признанија на етаблирани меѓународни вински натпревари.