Традиционално, во скопската приватна болница „Ремедика“ се организира новогодишен базар во чии рамки е изложбата на чоколадни уметнички дела направени од вредните раце на пастри-шеф Снежана Ангеловска.

На слаткиот базар се изложени украсни јадливи елки, чизми, лижавчиња, куќарки, лампиони, чоко-пакетчиња и многу други чоколадни експонати.

Шеф Снежана Ангеловска повеќе од 20 години е во светот на слаткарството, а нејзина специјалност е токму чоколадото.

Таа има освоено многу награди на различни натпревари, а кога пред 3-4 години го освоила сто и првиот златен медал, ја завршила својата натпреварувачка кариера. Има одржано повеќе самостојни изложби, а оваа година на традиционалниот новогодишен базар во Ремедика се изложени повеќе од 100 чоколадни експонати, за кои се употребени околу 70 килограми чоколадо. Најголемиот експонат наречен „новогодишна идила“ е тежок 10 килограми.