Адил Ефе, кој во септември ќе полни 9 години, инаку син на натурализираниот охриѓанец Акин Сезер кој го знаеме како производител на органски зеленчук (чии видови, ако треба да ги наброиме, ќе сочинуваат една многу долга, широка и разновидна листа), е најверниот асистент на неговиот татко во сите активности поврзани со производството на храна.

Детенце, но детенце кое точно знае како од семка настанува растение и како истото потоа доаѓа во нашите чинии. Ова детенце, вели неговиот татко, не спиело цела ноќ пред тргнувањето во Скопје оваа сабота, на пазарчето во „Јавна соба“, од возбуда, затоа што ќе му помага на својот татко кој беше специјален гостин на пазарчето и приготви многу интересно и вкусно мезе во кое главна ѕвезда беше баклата, а малиот Адил Ефе, негов су-шеф.

Да, малиот су-шеф има две имиња, едното, Адил, е на неговиот дедо, татко на татко му, како што вели тато Акин, чесен и фер човек, а веруваме дека во таков ќе порасне и малиот Адил Ефе. А дека е на вистинскиот пат доволно зборуваат и неговите интереси. Освен што веќе знае многу за земјоделието и за производството на храна, знае и да позира, па и покрај уморот, кога ја почувствува прегратката на татко му и застана пред нашиот објектив, ја развлече устата во неодолива насмевка.

А на нивниот репертоар, две свежи салати и едно макало, главна ѕвезда беше баклата, позната и како фава грав, која иако многумина од нас не ја знаат, е всушност мешунка која била присутна на нашите простори со векови, но подоцна некако исчезнала од „репертоарот“ на земјоделците.

Кај Акин Сезер, таа е дел од репертоарот, како впрочем и голем број други зеленчуци кои речиси и ги нема кај никој друг. Поголемиот дел од производите во неговата градина се можеби и за првпат испробани во Македонија. Така, тој е и прв регистриран произведувач на артичока во Македонија, која одлично се вклопува во неговото макало со лук и му дава еден нов и поинаков вкус кој не ја загрозува популарноста на веќе добро познатиот и проверен бренд на макалата од брендот „Папа’с“, туку гордо стои покрај нив со својот сосема поинаков, „сезеровски“ печат.

Што се однесува до саботното мезе од шеф Акин Сезер и неговиот помош Адил Ефе Сезер, највкусен и најинтересен беше намазот сличен на хумус, во кој наместо наут, се употребува бакла. Останатите состојки кои се ставаат во него се истите оние што ги употребуваме и во хумусот со наут: таан, масло, сок од лимон, зачини.

Исто така, според советите на Акин, баклата се вари само 20 минути, а кога е млада може да се јаде и заедно со мешунките.

А нам ни останува до следното мезе од рацете на тато Акин и малиот Адил Ефе Сезер, да си ја воведеме баклата на нашето мени.

.

Оваа сабота (6 мај) во 10 часот на зелената тераса во скопската „Јавна соба“ почнува третата сезона на промоција и продажба нa органска храна – Пазарче.орг (орг = органска храна). Исклучително важен настан кој им дава поддршка на земјоделците и на производителите кои произведуваат малку, внимателно и на природен начин, но е во корист и на потрошувачите кои сè повеќе се едуцираат и се насочуваат кон здрава и природна исхрана.
Посетителите, покрај дегустацијата која е карактеристична за овој органски пазар, ќе имаат можност да се снабдат со свежо овошје и зеленчук, зачини, јаболков оцет од диви јаболки, маџун, јаткасти плодови, компоти, сирења и кашкавали, сувомеснати производи, медови, производи со тартуфи, мармалади и други производи кои се произведени од поединци или од семејни производители. Вината и ракиите од мали семејни винарии и дестилерии, се автентични и неповторливи, а од причина што се произведуваат во мали количини може да се купат само на овој настан. Доказ за нивниот квалитет се многуте награди освоени на домашни и регионални натпревари. Зачин на целиот процес на пазарење и дегустација е ДЈ Јоци и кулинарскиот перформанс на правење самбал (индонезиски лут намаз) на Пол Хотхаузен.
Љубителите на добри летни коктели ќе имаат можност да дегустираат коктели од винската сорта “Станушина” како поддршка за Денот на Станушината – 7. мај.
Пазар.орг е во организација на Јавна соба во соработка со Бакалница.нет, Зелена Република и Прва Органска Задруга, кои решија сите овие вкусови од Македонија да ги доближат до пошироката јавност со цел да се разбие стигмата дека органското е скапо, неубаво на изглед и тешко достапно кај нас. Напротив, производителите на свежи и преработени органски производи во изминатите години напредуваа брзо благодарение на повисоката свест кај сѐ поголемиот број граѓани кои разбраа дека конвенционалната храна содржи во себе огромен број на пестициди. Факт е дека многу луѓе во Скопје сѐ уште немаат пробано вистински производи, односно, здрави и непрскани јаболка или домати, кои на изглед ја немаат формата и сјајот како оние кои се десетина пати поминати со најразлични препарати.
Пазар.орг ќе се одржува секоја сабота на зелената тераса во Јавна соба со цел да се креира поголема афирмација и застапеност на пазарот на малите македонски производители и да се помогне секој еден органски продукт полесно да го најде местото до трпезите во цела Македонија и пошироко.
Линк: https://www.facebook.com/events/647402413889176

Биено сирење има? Мора да има, ако не, мора да се трча и да се купи. Зашто кога нам ни доаѓаат гости од странство, биеното сирење е еден од македонските автохтони производи, бренд со кој сакаме да се пофалиме. За среќа, ги има сѐ повеќе вакви домашни производи кои се со автентичен вкус својствен само за овие краишта. За повеќето сме пишувале, а среќни сме што се појавуваат  и нови и мрежата на Слоу фуд производители постојано се шири, се усовршува, се вмрежува, ама и станува сѐ попопуларна, па оние кои еднаш ќе пробаат нешто од нив, потоа, кога немаат можност да ги најдат или да ги набават овие производи, тешко им се навраќаат на индустриските. Не дека тие не чинат, ама го немаат вкусот на традицијата и мирисот на љубовта која малите локални производители во голема мерка им ја вдишуваат на своите производи.

Кога и да дојдат дома моите две сестри кои инаку не живеат во Македонија, во фрижидерот мора да има биено сирење. Кога си одат, исто така. Една од работите кои им ги носиме или им ги праќаме како поздрав е пак – биено сирење. Друго? Слатко од зелени смокви, и тоа не кое било, туку она на Гуна Маркова. Нејзиното слатко од диви смокви е и првиот Слоу Фуд президиум од Република Македонија, на светската листа на еколошки чисти производи на меѓународната фондација „SLOW FOOD“. Потоа, се разбира, ајвар, па онаа здрава и вкусна мешавина од матичен млеч, мед, поленов цвет и прополис што ја подготвува нашиот пријател Нацо Јовчевски од пчеларникот БН, во село Дихово, па кцаната сол на Стевче Доневски која често знаеме да ја јадеме онака, само поросена на домашно лепче и путер, а од неодамна имаме и нов фаворит – намазот кој двајцата партнери и кумашини кои се појавија на македонската гастрономска сцена со своето ладно цедено масло од сончоглед и ладно цедено масло од афион, Роберт Коцев и Александар Димитриевски го прават од остатоците од афионовото семе искористено за правење на маслото. Во него додаваат лути пиперчиња, нане и малку од нивното ладно цедено сончогледово масло кое се користи како природен конзерванс.

Намазот има навистина интересен вкус, здраво е и може да се јаде и само со парче леб, а сепак да се чувствувате како да имате најексклузивен оброк. Тука се и мармаладите од шипки и капини на најсимпатичниот пар во Слоу фуд, Мирјана и Бранко Ангелески, домашниот оцет, лутото слатко и човекот со еден од најубавите гласови, причината заради која е познат и како еден од најдобрите рецитатори на поезија во Македонија, но и голем гурман Страшко Милошевски. Неговите природни производи: оцет од диви јаболка и модри сливи, ракии со лековити тревки, но и неговото слатко од мали лути бамбурести пиперчиња, се незаобиколен дел од трпезата. Тука е и  Давид Неделковски и козјите сирења и други производи од козјо млеко од неговата семејна фарма во село Раштак кадешто се занимаваат со чување кози и со производство на млеко, млечни производи и јарешко месо, па производите со тартуфи на македонската кралица на тартуфите Валентина Митрова, месните деликатеси на македонскиот „Гавриловиќ“, гостиварчанецот Дамјан Гаврилоски, нашиот стар пријател Пеце Клечкароски и неговите вкусни намази од јаткасто овошје, но и неговото успешно крафт чоколадо, одличните македонски вина на малите бутик-винарии и многу многу други производители за кои веќе сме пишувале, но и многу за кои допрва ќе пишуваме. Навистина има толку многу вкусни македонски производи со кои можеме да се гордееме, ама и да се дебелееме.  

А биеното сирење од почетокот на текстот, е тоа е еден од најстарите македонски производи, а се произведувало уште од турско време. Во еден период производството на ова сирење кај нас било запоставено и во тоа време, во Македонија не се произведувало биеното сирење толку масовно како денес.

Во минатото овој производ бил многу значаен за исхраната на сиромашното население, затоа што се консумирало во помали количини од едноставна причина што истото било прекумерно солено.

Денес, за среќа, иако повеќето видови биено сирење се произведуваат индустриски, имаме можност да вкусиме и дел од минатото преку малите производители кои постојано и сѐ уште нѐ изненадуваат со своите вкусни традиционални производи изработени од состојки кои се исто така, нивни, домашни. Меѓу оние малите производители на биено сирење по традиционален рецепт и со млеко од негови овци е младиот Игор Поповски од Дихово!

„Нашите производи во однос на индустриските производи, се разликуваат по неколку клучни работи. Млекото не го пастеризирам, освен што го ладам во лактофризер (стандардизирање на млекото). Тоа значи дека не се додава калциум, не се користи лимонтус во саламурата, не се користи регулатор на киселост, не се користи боја за обелување или пожолтување, не се користи парафин и восок за премачкување, не се користи млеко во прав, итн“, објаснува Игор за своите производи притоа, откривајќи ни и што сѐ содржат индустриските производи.

Ако сѐ уште не сте ги пробале овие сирења, како и сите наши вкусни македонски традиционални производи изработени со многу љубов и труд, ќе имате уште една можност, на 9.април, во „Јавна соба“ каде што здруженијата Слоу Фуд Водно и „Добредојде“ – Macedonia Welcome Centre ќе ви овозможат да ги дегустирате, a потоа и да си ги купите производите на сѐ побројните членови на големото семејство на Слоу Фуд Македонија.