Познатиот американски кулинарски магазин „Тејст оф хоум“ ова лето вклучи еден „невообичаен“ коктел во своите препораки: освежителна мешавина од црвено вино и „кока-кола“. За американскиот пазар, ова е неочекувано добар летен пијалак, но во поранешна Југославија, тој е одамна познат под името бамбус.

Во својот летен водич за коктели, магазинот го опишува бамбусот како овошен, лесно пенлив и совршен за топли денови. Комбинацијата на вино и „кока-кола“, велат, нуди баланс помеѓу танините и слаткоста, со дополнителна свежина благодарение на газираноста. За Американците, можеби е изненадување, но во земјите од поранешна Југославија, тоа е легенда меѓу пијалаците.
Во земјите од поранешна Југославија бамбусот е незаменлив дел од студентските забави, дружби на скара, журки на плажа и домашни забави уште од 70-тите и 80-тите години на минатиот век. Името, најверојатно, го добил по зелената нијанса што понекогаш ја добива кога се користи поевтино вино. Во својата основна верзија се состои од еднакви делови црвено вино и „кока-кола“, но соодносот често варира според вкусот.

Бамбусот е едноставен, евтин и брзо се приготвува. Изненадувачки е питок, особено за оние што не се љубители на тешки вина. Затоа често бил првиот алкохолен пијалак што младите го пробувале и редовен избор во алтернативните и студентски кафулиња.

Ова не е првпат балкански пијалаци да се најдат на светските листи. Пред неколку години слично внимание привлече и шприцерот, мешавина од бело вино и минерална вода. Бамбусот сега го следи истиот пат, но со далеку подолга локална традиција отколку што би сугерирале американските листи.

За разлика од софистицираните коктели кои бараат миксолози и егзотични состојки, бамбусот е пијалак кој освојува со својата едноставност и кое веќе со децении се пие на терасите од Љубљана до Скопје.