На Факултетот за туризам и угостителство во Охрид, во соработка со македонската асоцијација на шефови на кујни Гастромак и Општина Охрид, денес и утре (9-ти и 10-ти октомври) се одржува дводневен гастрономско-едукативен настан.

На настанот ќе гостуваат, но и ќе споделат нешто од своето знаење врвни готвачи и мајстори на занаетот од Балканот и светот.

Денот започна со словенечкиот шеф Изток Легат кој објаснува како да се намалат трошоците во кујната, за позицијата на директорот за храна и пијалаци, но и нешто повеќе за тоа што е бранч и кога се служи?

Денот продолжува со легендарниот Стево Карапанџа од Хрватска кој зборува на тема: Организација на работата во кујната, комуникација помеѓу келнерите и готвачите, примери, искуства и што е потребно за да се дојде до врвна услуга.

Тајните за создавањето на сезонско мени со локални состојки ќе ги сподели германскиот шеф Уве Мишел, кој ќе раскаже и како готвачот и келнерот треба да ја продадат приказната за јадењето.

За најновите трендови во угостителството, високата гастрономија и бистрономијата ќе зборува Жељко Невен Бремец од Хрватска, а тајни на успехот во готварството и во создавањето свој бренд-ресторан или хотел ќе ги открие Русинот Дон Давид.

Хрватската кулинарска ѕвезда Драгица Лукин ќе зборува за карактеристиките на балканската кујна, идентитетот на дестинацијата, гастрономијата, традицијата и културата како инструменти во создавањето на гастрономски идентитет и воопшто, за тоа како да се создаде бренд во угостителството.

Нашиот Асан Даутовиќ ќе одржи предавање за келнери, правила, предлози, што треба да се знаат, вештини, искуства, хотелско работење и сѐ што спаѓа во него.

Следниот ден, 10 октомври (четврток) е можеби и уште поинтересен бидејќи ќе биде исполнет со мастер класовите на шеф Драгица Лукин од областа на пекарството и слаткарството и на шефовите Жељко Невен Бремец и Хамид Хаџиќ за тоа како да се добие специјалитет на куќата, со локални производи.

Денес на прес-конференцијата за новинарите ќе се обрати и портпаролката на Гастромак Вања Тодоровска, доц. д-р Климент Наумов, раководител на катедрата по гастрономија при ФТУ-Охрид и д-р. Кирил Пецаков, градоначалникот на Општина Охрид.

Теоретските и мотивационите предавања на познатите кулинари од светската и балканската гастрономија се наменети пред сѐ, за студентите, но и за пошироката јавност и сите оние кои имаат среќа овие два дена да бидат во убавиот Охрид.

На Водици (19 јануари, петок) на еден од најголемите христијански празници, Општина Крива Паланка организира масовен настан „Водици, Богојавление 2024“, можност на најубав начин, сите заедно да го одбележат и прослават овој голем ден.
Церемонијата започнува со свечена Богојавленска литургија: верниците наутро ќе го посетат Соборниот храм Св. Великомаченик Димитриј, по што ќе се упатат кон Мостот и кејот на Крива река, каде се осветуваат водите. Потоа, традиционално се фрла чесниот крст, највозвишен и најсвечен чин на Водици, а верниците влегуваат во Крива река за да го фатат.
Централната манифестација на градскиот плоштад продолжува со музичка програма, а клучниот настан што го организираат Македонската асоцијација на готвачи и шефови на кујни „Гастромак“ со претседателката Адријана Алачки во соработка со Општина Крива Паланка е натпреварот за најубава Богојавленска софра. Традиционалните специјалитети на оваа софра ќе ги приготвуваат здруженијата на пензионери, организации на жени, Дневен престој за активно стареење од Крива Паланка, млади гастрономи, учениците, идните готвачи од СОУ „Ѓорче Пертов“, индивидуални домаќинки…
Судиите од „Гастромак“ ќе ја одберат најубавата, највкусната и најдобро аранжираната Богојавленска трпеза каде ќе царувааат вкусовите, миризбите и боите на нашата богата традиционална гастрономија.
На Плоштадот, во огромен котел ќе се вари грав кој ќе може да се купи по симболична цена од 50 денари: средствата се наменети за социјално загрозените матуранти. Ќе се дегустира и најважниот специјалитет за Водици, традиционалната пача, ќе се пие домашен чај а ќе се наздравува со греана ракија.
Минатата година Водици во Крива Паланка привлече многу верници, а годинава се очекува масовна присутност на кривопаланчани, ама и на многубројните гости што го почитуваат овој празник.

Натпреварувачи за „Најубава Богојавленска софра“:

1. Здружение на пензионери од Општина Неготино
2. Здружение на пензионери Куманово (натпреварувачка софра и маса со ракотворби)
3. Здружение на пензионери Крива Паланка и Ранковце „Крива Паланка“
4. Дневен престој за здраво стареење од Крива Паланка
5. Добринка Смилчева од Свети Николе
6. Здружение „Жаклин Арт“ Општина Ѓорче Петров- (со ракотворби и натпреварувачка маса)
7. СОУ „Ѓорче Пертов“, угостителско-туристички смер