Традиционалното производство на пиво во Танзанија нуди широк спектар на уникатни вкусови добиени од плодовите што се користат за негово создавање. На североисток, на долните падини на планината Килиманџаро, племето Чага е познато по мбеге, пијалак направен од банани и изртено африканско просо (отпорна житарка богата со хранливи материи која игра витална улога во безбедноста на храната за милиони луѓе во сушните и полусушните региони на Африка и Азија. Позната е и како фингер просо, а во Индија како раги, во Источна Африка како вимби и во Етиопија како було).
Правењето мбеге е работно интензивен процес кој одзема многу време бидејќи поголемиот дел од процесот се врши рачно, без помош на модерна технологија. Традиционално, за правењето мбеге се задолжени жените. За производството на ова пиво не може да се користи каков било вид на банани, туку се собираат само специфичен вид банани познати како „ndizi ngombe“, што во превод значи „кравји банани“. Откако ќе се наберат, бананите се чуваат на топло, темно место за да созреат. Во зависност од временските услови, на бананите може да им требаат до седум дена за да постигнат соодветно ниво на зрелост.
Потоа, бананите се гмечат и ги варат, а потоа ја оставаат смесата да ферментира во дрвено буре додека не се појават бели меурчиња на површината. Откако бананите ќе ферментираат, додаваат прашок од изртено, сушено на сонце африканско просо заедно со кората од дрвото кинин (msesewe).

Конечниот вкус е прилично сладок, од бананите, со благо- горчлив вкус од кининот и киселкаст афтер вкус. Пијалакот често се споредува со нешто помеѓу вино и пиво.

Мбеге не е само вкусен пијалак, туку е важен и од социјален аспект. Членовите на племето традиционално го споделуваат со одреден круг на луѓе и најчесто го консумираат како свечен пијалак. Тој во минатото служел и како платежно средство.