Чиа семето е богато со хранливи материи, вклучувајќи омега-3 масни киселини и влакна, но сепак треба да бидете внимателни со неговата консумација.

Веројатно сите сме пробале поздрави опции за храна во одреден момент, а терминот „суперхрана“ сè повеќе го користат фитнес инфлуенсерите на социјалните мрежи.

Сепак, една суперхрана што се споменува одново и одново сега доаѓа со предупредување, иако често се промовира како нутритивен „суперхерој“, пишува LADbible.

Како што расте популарноста на оваа здрава супер храна, една докторка предупредила за можната непријатна нус појава.

Подготовката на чиа семето е клучна

Многу луѓе прават грешки при подготовката на чиа семето. Така, еден млад човек добил желатинозна маса заглавена во хранопроводот откако го изел, бидејќи апсорбирало голема количина вода.

Според Healthline, семето може да апсорбира и до 12 пати од својата тежина кога е во контакт со течност. Д-р Ребека Раул, која го лекувала младиот човек, рекла дека конзистенцијата е споредлива со пластелин, а случајот бил објавен во American Journal of Gastroenterology уште во 2014 година.

Младиот човек морал да помине низ сложена интервенција за да се отстрани масата.

„Популарноста на чиа семето расте и мислам дека ќе видиме повеќе вакви случаи“, рекла Раул.

Како да се користи безбедно?

За безбедно уживање во чиа семето, се препорачува да започнете со една до две лажици (околу 14 грама) дневно за да му помогнете на вашиот дигестивен систем полесно да го процесира.

Healthline препорачува семето да се потопува во вода, млеко или сок најмалку 10-15 минути, а идеално и преку ноќ. Ова ќе помогне да се спречи опасно лепење што може да доведе до задушување или затнување.