Која е првата работа на која помислувате кога некој ќе каже „Италија“?

Венеција, Рим, Колосеум, Римската империја, пица, тестенини – ова се само неколку зборови кои можат да ве поврзат со оваа прекрасна земја.

Италија, но и целиот свет, ја сакаат фокачата, рамен леб кој потекнува од северните делови на Медитеранот, а се претпоставува дека првите се печеле уште во времето на Етрурците и Античките Грци.

Фокачата е рамен леб прелиен со маслиново масло и зачини, а на него можете да ставите и домати и маслинки.

Тоа е всушност најраната форма на модерната пица.

Најпрво се печела на камен покрај загреан оган (нешто слично на денешната печка) или на загреана подлога под која има пламен.

Има карактеристични резови на лебот кои најчесто се прават со помош на прстите.

За да се зачува свежината на лебот, тестото пред печење се мачка со маслиново масло.

Фокача – рецепти

Иако се потребни речиси три часа за да се направи фокача, ќе видите дека трудот ќе се исплати. Мирисот што ќе ја исполни вашата куќа ќе биде толку опоен што тешко дека ќе одолеете да не посегнете по првото парче.

Подолу е нашиот рецепт за фокача со кој ќе го почувствувате вистинскиот вкус на Медитеранот.

Фокача со маслинки – рецепт
Фокача со маслинки често се служи на Бадник или Велигден во Италија. За разлика од Италија, Американците сакаат да додаваат жалфија, сирење или кромид.

Постојат и слатки верзии на фокача кои содржат јајца, мед, суво грозје, анасон, шеќер, кора од лимон или портокал.

Фокача со маслинки сè уште е една од традиционалните верзии на овој оброк.

Доколку го направите истиот рецепт, но без маслинки, домати и црвени пиперки, тогаш ќе ја направите оригиналната верзија на фокача – focaccia rustica.

Состојки за тестото:

500 гр меко брашно
15 гр свеж квасец
1 лажица шеќер
1 лажица сол
300 мл топла вода.

Состојки за филот:
околу 60 мл маслиново масло
1,5 лажички сол (можете да користите помалку, зависи како ви се допаѓа)
2 сечкани чешниња лук
1 лажичка црн пипер (препорачуваме свежо мелен)
рузмарин (околу 4 лажички сув)
црни или зелени маслинки
мелен црвен пипер (по избор)
шери домати.

Приготвување:

Свежиот квасец издробете го во помал сад или чаша, додадете една лажица шеќер и прелијте го со 150 мл топла вода.
Оставете го да надојде 10-15 минути.
Во меѓувреме, просејте ги брашното и солта во голем сад.
Направете дупка во брашното и додадете го нараснатиот квасец и остатокот од водата.

Започнете да го месите тестото со раце и ќе бидат потребни околу седум минути месење за да се добие мазна топка.
По седум минути извадете го тестото од садот на набрашнета површина и месете го уште 2-3 минути.
Во чист сад ставете две супени лажици маслиново масло и ставете го тестото внатре.

Притиснете го малку за да може да го впие маслото додека нараснува.

Ќе треба околу час и половина додека не се удвои во големина.
Направете го премазот додека тестото нараснува.

Ставете маслиново масло, сол, лук, пипер, рузмарин (ситно исечкајте го) и една лажичка црвен пипер доколку сакате тестото да добие малку портокалова боја.
Кога тестото ќе нарасне, префрлете го на малку набрашнета површина и повторно замесете.

Повторно ставете го во садот, покријте го со крпа и оставете го да нарасне уште час и половина.
Кога тестото ќе нарасне, земете голема тава и обложете ја со хартија за печење.

Тестото од садот префрлете го во плехот и развлечете го за да стигне до сите рабови на тавата и со прстите направете ги вдлабнатините кои се класични за фокачата.
Потоа прекријте ја фокачата со премазот, а во вдлабнатините ставете исечени маслинки и шери домати. Вклучете ја рерната на 200 °C.
Додека се загрева рерната, оставете го колачот уште 10 минути да нарасне во рерна.
Печете го околу 20 минути.
Откако ќе ја извадите почекајте пет минути барем малку да се излади. Јадете ја топла бидејќи така е највкусна.

Двете европски земји кои се можеби најодговорни за еволуцијата на вафлите какви што ги знаеме денес се Белгија и Холандија. Холандските вафли пристигнале во Америка во 1620 година и тогаш почнуваат да се преливаат со јаворов сируп, а денес можете да ги подготвите со овошни филови, чоколадни филови, итн…

Доколку сакате сладок појадок, послужете вафли, а кај нас овие слатки печива се познати и како бабини колачи или галети. Секако, треба да си набавите и од оние специјални апарати за правење вафли кои, за среќа, не се скапи.

Состојки:
1 чаша брашно
1/2 лажица прашок за пециво
2 лажици шеќер
1/4 лажичка сол
1 јајце
1/4 чаша масло (уште подобро е ако ставите растопен путер)
1 чаша млеко
1/2 лажичка екстракт од ванила

Приготвување:
Во сад се мати јајцето, па се додаваат шеќерот, маслото, млекото и ванилата. Добро измешајте, па во садот додајте просеано брашно со прашок за пециво и лажичка сол. Соединете ја смесата за вафли, а потоа подмачкајте го апаратот и истурете од смесата. Печете додека не се потроши цека количина.

Рецептот и фотографиите се на Марина Луетиќ, која вели дека секогаш кога ѝ доаѓаат гости или пак таа оди некаде и сака да придонесе за трпезата, ги прави токму овие кифлички. Вели, рецептот е навистина одличен и со него не ѝ се случило никогаш да згреши.

Патем, препорачува веднаш да ја дуплирате дозата за да не ви биде жал кога ќе се уверите колку се вкусни.

Состојки:

600 гр обично брашно
1 прашок за пециво
1 лажичка сол
100 мл масло
200 гр кисела павлака
200 мл топло млеко
1 инстант сув квасец
1 голема лажица шеќер

Приготвување:

Измешајте 600 гр брашно, прашок за пециво и лажичка сол. Додадете 100 мл масло и 200 гр павлака и измешајте.
Посебно измешајте 200 мл топло млеко, инстант сув квасец и голема лажица шеќер и истурете ги во готовата смеса. Се замесува мазно тесто, се дели на 4 дела и се расукува до дебелина од 1/2 цм. Исечете го на триаголници и обликувајте ролни.

Во овие кифли има и фил, јајце измешано со здробено кравјо сирење.

Загрејте ја рерната на 180° Ц. Ставете ги кифличките на подмачкан плех и оставете ги во кујната на топло, да отстојат 10-15 минути. Намачкајте ги со жолчка од јајце и по желба поросете со сусам, ким или афион. Се печат во рерна 10-15 минути.

Таанот е вкусна паста од сусам што често се користи во медитеранската и блискоисточната кујна за подготовка на хумус, таан сос, во салати и други јадења. Најчесто ја купуваме, но сега најдовме рецепт и можеме да ја испробаме и домашната верзија.

Еве едноставен рецепт за подготовка на таан дома:
Состојки:
250 гр сусам (непржен)
2-4 лажици неутрално масло (на пример, сончогледово или маслиново масло)
Прстофат сол (по вкус)

Приготвување:
Прво, важно е да се напомене дека може да се користи и пржен и непржен сусам за подготовка на таан. Пржениот сусам ќе даде побогат вкус, но непржениот е поздрава опција, бидејќи не содржи адитиви и има повеќе хранливи состојки.

Пред да започнете, се препорачува лесно да го потпечете сусамот за да се ослободи неговата арома. Ставете го сусамот на сува тава и нежно мешајте го на средна топлина. Внимавајте да не го препечете сусамот бидејќи може да стане горчлив.

Испечениот сусам ставете го во блендер или процесор за храна.

Во блендерот со сусам додадете прстофат сол и 2 лажици неутрално масло.
Почнете да мешате со мала брзина и постепено зголемувајте ја брзината за да направите мазна паста.

Ако смесата е премногу густа, можете да додадете уште малку масло за да ја постигнете саканата конзистентност.
Пробајте го таанот и по потреба додадете повеќе сол, доколку сакате да го засилите вкусот.

Кога таанот е готов, префрлете го во стерилизирана тегла и чувајте го во фрижидер до еден месец.

Можете да го користите на различни начини во готвењето.

Додадете го во хумусот, направете вкусен сос од таан со мешање на таан со сок од лимон, лук и вода, користете го како прелив за салата, а можете дури и да го користите како замена за путер во некои рецепти. Уживајте во оваа вкусна и хранлива состојка!

Пакувањето за овие печива, веројатно кинески, се појави на Фејсбук и, мора да признаеме, е многу добро. Којзнае што им значи тоа дека станува збор за печива со низок процент на јаглехидрати, ама нас не инспирираше да најдеме рецепт за печива кои можете лесно да ги направите дома сами, а кои имаат минимално количество јаглехидрати.

Овие печива секако не се од оние што ќе ве натераат да се чувствувате виновни и веројатно ќе бидат популарни кај тие што се на диета, а не можат да се откажат од лебот. Тие се сунѓерести и меки, па затоа се одлични за правење сендвичи. Кога ќе ги исечете на половина, наполнете ги со вашите омилени состојки. Има милион комбинации, а печивата без јаглехидрати имаат неутрален вкус, па затоа одлично одат со домат и моцарела, но и со џем.

Состојки:

100 гр крем сирење

3 јајца

½ лажичка прашок за печиво

малку сол

Приготвување:

Одделете ги белките и жолчките.
Направете тврд снег од белките и малку сол, а во друг сад изматете ги жолчките, сирењето и прашокот за печиво. Потоа внимателно додадете го снегот во смесата со жолчка и сирење. Полека мешајте за да се задржи воздухот во смесата.
Земајте ја смесата со лажица и ставајте ги на плех обложен со хартија за печење.
Печете 25 минути на 150°C.

Ако сакате да ја збогатите вашата домашна здрава исхрана, засилете ја и со здрави домашни грицки, овие крцкави чипсови од јаболка треба да бидат на врвот на вашата листа. Да научите како да направите печен чипс од јаболка е одличен начин да заштедите пари, да ја намалите консумацијата на индустриските нездрави грицки и да направите вашата куќа да мириса какјо циметен рај.
Впрочем, есента е баш вистинско време да ги донесете дома своите омилени јаболка од пазар и да ги направите сите омилени десерти и грицки од јаболка, вклучително и овие крцкави чипсови.

Тие се лесни, слатки, а загреаниот вкус на цимет совршено се комбинира со деликатната сладост на јаболкото.

Некои од начините на кои може да се сервираат е и во комбинација со зелена салата или во порција со киноа или нешто трето.

Зошто овој рецепт е одличен?
Супер евтин е, се прави лесно и во големи количини, здраво е и слатко иако има само сосема малку додаден шеќер, одличен е и за ужина која децата можат да ја понесат со себе на школо.
Што ви треба за овој рецепт?
Не ви треба многу за да направите серија печени чипсови од јаболка! Неколку зачини, шеќер и јаболка.

Состојки:
Јаболка: Изберете цврсти јаболка со средна големина со сладок вкус.
Шеќер, цимет и морско оревче: оваа комбинација ќе им додаде сладост на овие печени чипсови од јаболка.

Како да ги направите?

1) Загрејте ја рерната на 100-150 степени. Исечете ги јаболката на многу тенки прстени.
2) Ставете ги прстените од јаболка на обложен плех во еден слој.
3) Измешајте ги заедно шеќерот и зачините во мал сад.
4) Поросете ја смесата со шеќер и зачини преку прстените од јаболка.
5) Ставете го плехот во рерната. Времето за печење ќе зависи од дебелината и содржината на вода во парчињата јаболка. Тие треба да се направат за 1 ½ до 2 часа. Ќе знаете дека се готови кога ќе станат крцкави.

Уште неколку дополнителни совети
Најдобри се тенки парчиња! Ако ги исечете подебели ќе бидат вкусни, но нема да бидат толку крцкави.
Уживајте во овие чипсови од јаболка печени во рерна и додадени врз салати, врз овесни снегулки или сами за себе, додека ја гледате омилената серија.

Дали се здрави?
Да, тие се поздрава опција во споредба со другите видови чипс како што се чипсот од компири или тортилјите. Уште подобро, овие чипсови од јаболка се печат во рерна наместо да се пржат, што ги прави уште поздрава алтернатива.

Рецептот и фотографијата се од ТУКА.

Италијанската кујна е меѓу омилените на многумина и тоа не е без причина. Тестенините во секоја можна форма и со каков било фил се секогаш одлична идеја за појадок, ручек или вечера, па така и наполитанската калцоне или како што многумина ја нарекуваат преклопена пица, специјалитет од југот на Италија кој се прави од тесто за пица, но со додавање на фил во кој главната состојка е рикота.
Во различни регионални варијации на калцоне често се вклучуваат други состојки кои вообичаено се поврзани со додатоци за пица.

Епа токму деновиве кога и во Скопје почнуваат деновите на италијанска храна, еве еден одличен рецепт за калцоне. Викендот е пред вас, па ако не можете да одите до Ист Гејт Мол или на плоштад каде што ќе се готви италијанска храна, тогаш направете си ги дома:

Состојки:

480 мл млака вода

1 лажица шеќер

1 лажица сол

1 сув квасец

1 лажица маслиново масло

1 јајце

720 г брашно

За полнење изберете:

сос од домати, босилок, моцарела, кашкавал, шунка, сирење, магдонос, маслинки, сушени домати…

Приготвување:

1. Ставете ги шеќерот и квасецот во млаката вода да отстојат 15 минути. Потоа додадете ги брашното, солта и маслото и замесете го тестото. Покријте го и оставете го да отстои 1 час.

2. Направете 2 поголеми фамилијарни или 8 помали индивидуални парчиња. Намачкајте ја едната страна со сос од домати и додадете ги состојките што ги сакате. Преклопете со празниот дел од тестото и затворете го калцонето. Намачкајте ги со изматеното јајце.

3. Нека отстојат уште 45 минути. Потоа печете на 230 степени.

Овој предлог за денешниот ручек е баш за сите, за оние што не јадат месо, одлична идеја, за оние што сакаат спанаќ, уште подобра, ама и за оние што не јадат спанаќ, доволно вкусно и декоративно за да им го смени ставот. Ако и вие си имате таков проблем со некој од домашните, понудете им го спанаќот вака, во попривлечна варијанта.

Од каде да знаете, можеби потоа ќе треба често да купувате спанаќ.

Состојки:

500 г спанаќ, обарен

4 јајца

4 лажици брашно

100 г павлака

1 лажица масло

1-2 чешниња лук

1/2 лажичка морско оревче

сол

црн пипер

микс од зачини, вегета

За кремот:

100 г сирење, рендано

100 г крем сирење

Приготвување:

1. Изматете ги белките.

2. Обарете го спанаќот, исцедете го добро и откако ќе се излади ставете го во блендер. Додадете ги жолчките, зачините, павлаката, брашното, лукчето и изблендирајте добро. Потоа полека, со спатула, измешајте ги белките со смесата од спанаќ.

3. Ставете го ролатот врз хартија за печење и печете го на 180 степени околу 20 минути. Откако ќе се излади префрлете го врз алуминиумска фолија или соодветен плех и полека одлепете ја хартијата.

4. Измешајте ги крем сирењето и ренданото сирење, намачкајте го кремот врз печениот ролат и завиткајте го. Ставете го во фрижидер да се излади, па исечето го на парчиња.

Еве одлична идеја за појадок кој одлично оди со утринското кафе, нешто како кроасанот, но многу, многу повкусно.

Секако, за да го направите ќе ви треба време, па зачувајте си го рецептот за викенд. Е тогаш ќе можете да станете порано и да ги дочекате домашните со овој одличен појадок кој ќе ги разгали и ќе им го разубави денот.

Одлична варијанта е ако имате вредна колешка како нашата која ги направила дома и ќе ви донесе да ги пробате, а згора на тоа и ќе ви го напише рецептот.

Значи, ова е испробан рецепт и навистина вреди да го направите, особено ако сте сите дома гурмани кои знаат да ѝ се радуваат на храната и гласно да го искажуваат своето задоволство. Знаете, она….мммммммм…мхмхмх, превкусно!   

Состојки:

За тестото:

500 г брашно

60 г шеќер

10 г сол

20 г свеж квасец

130 мл млеко

120 мл вода
50 г путер

250 г ладен путер

За филот:

250 мл млеко

2 жолчки
50 г шеќер

20 г пченкарно брашно
10 г екстракт од ванила

За сувото грозје
100 шеќер

100 вода
150 г суво грозје

За премачкување
1 жолчка
малку млеко
прстофат сол
прстофат шеќер

Приготвување:

1. Растворете го квасецот во течноста од млако млеко и млака вода. Додадете го брашното, додадете ги солта и шеќерот на различни страни од садот, во средината ставете 50 г мек путер. Измешајте полека, па забрзајте ако мешате со миксер. Месете додека добиете еластично тесто. Покријте го со најлон фолија пристисната до тестото и оставете го да нарасне 45 минути.

2. Во меѓувреме направете го кремот. Во лонец ставете ги млекото, ванилата и 25 г шеќер. Нека зоврие па тргнете го од огнот. Во друг сад измешајте ги жолчките со 25 г шеќер и со пченкарното брашно. Откако ќе зоврие млекото сипете дел во садот со жолчките со постојано мешање. Потоа смесата со жолчките сипете ја во лонецот  и варете со постојано мешање додека згусне. Откако ќе згусне по околу 4 минути префрлете ја во друг сад и оставете ја да се лади во фрижидер.

3. Во мало лонче ставете 100 мл вода и 100 г шеќер. Кога ќе се стопи шеќерот, тргнете го лончето на страна и ставете го во него сувото грозје.
4. Земете хартија за печење и помеѓу два листа ставете го ладниот путер од 250 грама. Со сукало развлечете го во правоаголна форма. Откако ќе отстои 45 минути развлечете го тестото во правоаголна форма. Во средината на тестото ставете го путерот. Покријте го путерот со тестото одоздола и одозгора, а потоа преклопете го на две. Покријте со најлон фолија и ставете го во фрижидер да стои 30 минути.

5. Потоа расукајте го тестото во правоаголна форма и повторно преклопете го одоздола кон средината и одозгора кон средината и на две. Повторно покријте со најлон фолија и ставете во фрижидер уште 30 минути.

6. Расукајте го тестото во правоаголна форма. Намачкајте го кремот и ставете го исцеденото суво грозје. Сочувајте го сирупот. Завиткајте нежно во ролат, залепете ги краевите со малку вода. Потоа исечете го на парчиња во ширина од 1 см. Наредете ги врз хартија за печење во тава, притиснете ги со шпатула да добијат кружна форма, намачкајте ги со жолчката одгозгора и од страна и нека отстојат 2 часа на собна температура. Потоа повторно намачкајте ги со жолчката и ставете ги да се печат. Печете на 180 степени околу 15 минути. Кога ќе ги извадите од рерна премачкајте ги со сирупот, тоа ќе помогне да не се исушат брзо.

Меки како памук одвнатре, крцкави однадвор, со вкусни филови, или оној стандардниот, со праз и со сирење или пак со некоја помодерна верзија, со блитва и сирење, малешевските зелници се превкусен специјалитет кој не смеете да не го пробате ако патот ве однесе во кој било дел од Малешевијата.

Ние имавме среќа да го пробаме во еден ден двапати. На фармата за овци Агро чука во Негрево каде што вредната домаќинка Билјана го направила со праз и со сирење, а ни го послужи со превкусно сирење од нивната фарма и домашен ајвар, но и во куќата на нашиот домаќин Горан Алачки во село Владимирово, каде што ни го послужија и во двете верзии, со праз и со блитва. Патем, тука пробавме и од славните малешевски компири во неколку варијанти: спакувани како фил за пита, полнети со ајвар, но и оние најголемите малешевски компири сварени во котле на отворен оган. Лудница, што би рекол Алачки.

Освен што пробавме, ние успеавме да го дознаеме и рецептот.

Овој малешевски зелник е специјалитет со неповторлив и единствен вкус, сукан, месен и печен, кој ги собирал во минатото целите семејства на една софра, а се толку големи и богати што се доволни да се најаде и цела тајфа луѓе, како оваа нашата, 25 на број.

Рецепт за малешевски зелник

Состојки:

За тестото:
1 кг брашно
1 квасец
1 лажица сол
1 лажица шеќер
вода за замесување
маст, маргарин или зејтин за премачкување на корите (Секако, порано сите го правеле со маст и според на, тоа е најдобриот избор)

За филот:
праз или блитва (може да биде и некој друг зелен зеленчук по ваш избор)
сирење

Приготвување:

Една коцка квасец се разматува со млака вода и се додава шеќер и една лажичка брашно. Кога ќе надојде квасецот се меша со еден килограм брашно, сол и вода по потреба. Откако тестото убаво ќе се замеси, се остава еден час за да нарасне. Потоа се дели на пет помали и едно поголемо топче. Сите се расукуваат колку што можете потенко.

Секоја расукана кора се остава врз чаршав да се потсуши, додека не се завршат сите. Најголемиот дел се расукува малку подебело во однос на другите и се става во тепсија. На помалите кори се распоредува иситнето сирење и се распоредува свинска маст или маргарин или пак се попрскува со зејтин.

Потоа се собираат и се редат во поголемата кора. Со краевите на поголемата кора се замотуваат помалите кори.

Во средината се става малку запржен праз со сирење и одозгора се посипува со брашно. Се остава еден час да нарасне, а потоа се пече на 250 степени.

Откако ќе се испече се вади од рерната и се прелива со 100 грама зовриена вода со зејтин и пак се става во рерна да се допече уште 10 минути.