Компотот отсекогаш бил одличен деликатес, чиј сладок мирис со примеси на каранфилче, цимет и кора од лимон буди спомени од нашето детство. На овој начин се конзервираат разни овошја за зимата, а компот најчесто се прави од јаболка, круши, праски, кајсии, дуњи, вишни.

Постојат различни рецепти за правење компот, а се разликуваат по количината на шеќер и должината на готвењето, што пак зависи од видот на овошјето од кое се подготвува компотот.

Компотот е многу популарен и во студената сезона, кога обично се консумира топол.

Е сега, иако сите знаеме за компот од јаболка и круши, па и за компот од суво овошје како што е оној од суви сливи, веројатно помалубројни се оние кои пробале компот од тиквички.

Барем нам ни беше првпат.

Рецептот за компотот од тиквички е од шеф Снежана Ангеловска која пак го научила од својата тетка и внимателно го запишала во својата тетратка со рецепти која ја има од својата 11-та година, значи, најмалку 40 години.

А бидејќи Снежана е најпозната по своите торти и колачи, како и по најголемата традиционална манифестација која таа ја организираше цели 15 години, сосема очекувано е дека освен како десерт сам за себе, таа најчесто го користи својот компот од тиквички токму за своите торти.

Рецептот за компотот е најдолу во текстот.

Инаку, освен компот од тиквички, ако се договорите со неа да пиете кафе, еве што ќе ве дочека таму. Да, може дури и да ви се извини затоа што не стасала да направи пита со сливи.

Овие другиве работи се нешто што го има онака, речиси во секое време.

Рецептот за компот од тиквички се однесува на поголема количина, но вие можете слободно да ја намалите доколку сакате да направите само за проба.

Состојки:

5 кг тиквици

4 л вода

1,200 г шеќер

2 кесички ванилин шеќер

2 кесиќки лимонтус

Ако сакате и ако најдете, 4 кесички од оние сокчиња во прав, од ананас (степ). Ако ставате од нив, намалете од количината на шеќер.

Приготвување:

Излупете ги тиквичките и исчистете ги од средината, а потоа исечете ги на тркалца и обарете ги кратко во вода (5 минути). Извадете ги од водата и наредете ги врз крпа за да се исцедат, а потоа наредете ги во тегли.

Водата и шеќерот ставете ги во едно тенџере на рингла, почекајте да зоврие и да се стопи шеќерот, а откако ќе се подизлади, додадете ја содржината од степ кесичките (ако ги додавате) и наполнете ги теглите.

Затворете ги со капаци и стерилизирајте.

Манифестацијата Интерскопкејкс на којашто се натпреваруваа најубавите торти и која се одржуваше традиционално во центарот „Веро“ во Скопје, годинава, поточно на 12.10. (сабота), ќе се одржи во поинакво и проширено издание под називот – Интерфест фуд.

Имено, сега, освен натпревар на торти, ќе има и пица шампионат, национална кујна и војничко гравче, како и натпревар во брзо јадење, блек бокс, едукативни работилници, гости од странство и многу забава за посетителите.

Учество ќе земат натпреварувачи од нашата и околните земји, Србија, Босна и Херцеговина, Црна Гора, Хрватска, Италија, а сѐ што ќе биде изготвено за манифестацијата е наменето за хуманитарни цели.

„Изработените креации по завршувањето на манифестацијата ќе бидат подарени на хуманитарното здружение „Св. Спас“ кое ќе им ги подели на социјално загрозените семејства“, вели Снежана Ангеловска која е и иницијатор и творец на манифестацијата.

За жал, поради незаинтересираност на градските власти за продолжување на оваа манифестација која годинава се одржува по 15-ти јубилеен пат, ова ќе биде и последно издание кај нас, а понатаму манифестацијата се сели во Белград, кај нашите соседи.

Организаторката вели дека ова последно издание е целосно во организација на нејзината хуманитарна организација „Ангелчиња“, центарот „Веро“ и Федерацијата на угостителско-туристички средни училишта, а со поддршка од Академијата за пица мајстори – Accademia Pizzaioli и од средното училиште „Лазар Танев“.

Инаку, Снежана ја знаеме и како творец на најтешката торта во државата која тежеше цели 100 килограми, како и на најдолгата, седумметражна торта.

Впрочем, таа е секогаш таму кадешто се најубавите торти, а нејзиното име е синоним за „ангелчињата“, хуманитарната организација која ја основаше во 2001 година кога ја победи и тешката болест и посака да им помага на оние на кои им е тоа потребно преку организирањето на најслатките хуманитарни манифестации, тортијадите „Слатка мистерија“ и „Интерскопкејкс“

„Приказната е малку емотивна па ќе бидам кратка во врска со неа. Пред околу 20 години се разболев, ја добив поддршката од луѓе кои ги познавав, но и од многумина кои не ги познавав, а ми помогнаа да го надминам проблемот кој го имав и кој траеше со години. Тоа ме поттикна да станам дел од оние што помагаат, да подадам рака за сите кои ќе се најдат во таква ситуација во каква што бев и јас и која се случува понекогаш во животот и ја основав хуманитарната организација „Ангелчиња“. Почнавме со мојот син, неговите другари, потоа, луѓе заболени од канцер, нивни роднини, сите заедно соработувавме, доаѓавме до идеи кои се реализираа со поддршка на сите оние луѓе кои се родени со хуманост“, вели Снежана во разговорот за „Арт кујна“.

Инаку, Интерфест фуд ќе се состои од ревијален дел кој ќе трае од 10 до 16 часот и официјален дел во кој ќе биде проследена програмата со претставување на натпреварувачите, прогласување на победниците, доделување награда за животно дело, како и доделување на благодарници за излагачите на оваа манифестација.

Со оглед на сите претходни години од одржувањето на оваа манифестација, годинава очекуваме едно најинтересно и најшаренолико, но за жал, последно издание.