Домашните супи и чорбите од зеленчук биле предмет на истражување од страна на научниците за да се види како овие топли оброци „на лажица“, можат да им помогнат на возрасните да се опорават од инфекции на респираторниот тракт.

Во прегледна статија објавена во списанието Nutrients, истражувачите идентификувале студии кои сугерираат дека зеленчуковите супи и пилешките супи можат да ја подобрат сериозноста на симптомите и да го скратат времетраењето на болеста, веројатно поради намалувањето на инфламаторните маркери.

Респираторните инфекции се глобален здравствен проблем

Акутните респираторни инфекции остануваат голем глобален здравствен проблем, предизвикувајќи широко распространети болести и смртност, оптоварувајќи ги здравствените системи. Инфекциите на горните дишни патишта сочинувале повеќе од 17 милијарди случаи низ целиот свет во 2019 година, при што децата под пет години и постарите возрасни лица се изложени на најголем ризик.

Покрај здравствените последици, акутните респираторни инфекции доведуваат и до значителни економски и социјални оптоварувања, вклучувајќи отсуство од работа и стрес на негувателите.

Иако често се користат фармацевтски третмани како што се антипиретици и деконгестиви, тие не се секогаш многу ефикасни и предизвикуваат несакани ефекти, особено кај децата, што го поттикнува интересот за други терапии.

Чорби од зеленчук или храната како лек

Меѓу традиционалните и комплементарните пристапи, супата, која истражувачите ја дефинираат како „солен течен оброк што содржи зеленчук, месо, житарки и/или овошје и вода или чорба како основа“, е широко консумирана како домашен лек за настинки и разни респираторни симптоми. Културно е прифатена, се смета за безбедна и нуди терапевтски придобивки преку своите антиинфламаторни својства, хидратација, хранливи материи и топлина.

Популарно сметана за „храна како лек“, супата одамна се препорачува од здравствените работници. Раните истражувања сугерираат дека супата може да помогне во намалувањето на сериозноста и времетраењето на симптомите, а потенцијално ја зајакнува имунолошката функција. Зеленчуковите супи се првенствено благи, лесни за голтање намирници кои најмногу го смируваат болното грло. Топла чинија зеленчукова супа е смирувачка, а пареата може да помогне во олабавување на затнатоста. Лукот е одличен додаток на зеленчуковите супи, бидејќи содржи сулфурни соединенија кои се борат против воспалението. Лукот е исто така антибактериски, антивирусен и антифунгален, помагајќи во намалувањето на симптомите на настинка и грип.

Познато е дека постудените месеци носат промени во навиките во исхраната, метаболизмот и нивото на енергија. Намалената достапност на свежо сезонско овошје и зеленчук го отежнува одржувањето на разновидна исхрана.

Топлите супи стануваат совршен избор во овој период – заситуваат, закрепнуваат и лесно се прилагодуваат на сезонските потреби на организмот.

Зошто е важно да се јаде супа?

Супата отсекогаш била синоним за јадење кое лекува, а во зима особено им годи на телото и на душата со својата топлина, затоа, не залудно, во некои не многу минати времиња, секој оброк се почнуваше со квалитетна супа.

Традиционалните супи од месо и зеленчук обезбедуваат многу витамини и минерали, а на нивниот квалитет влијаат состојките од кои се прави супата.

Денес имаме можност да складираме разни намирници во нашите кујни, а во студените зимски месеци лесно можеме да направиме супа која може да биде дури и самостоен оброк.

Иако кај нас супата традиционално се јаде како предјадење на главното јадење на ручек или навечер, топол сад со шарена супа може да биде идеален и за почеток на денот.

Внесувањето на течност придонесува за будење на организмот, а диеталните влакна од зеленчукот даваат добро чувство на ситост.

Се препорачува во утринската супа да додадете цели зрна или тестенини и варено месо или јајце за да направите целосен оброк.

Иако е полоша опција од домашната супа, дознавме дека супата од кесичка може да биде и добар извор на течност и некои витамини и минерали од сувиот зеленчук.

Сепак, повеќето супи од кесичка содржат голем процент на сол и адитиви, затоа секогаш треба да им се даде предност на домашните супи.

Кои видови супи се најдобри?

Сите супи од месо и риба имаат заедничко тоа што придонесуваат за вкупниот дневен внес на протеини, минерали (цинк, железо, калциум, магнезиум) и други електролити.

Супата од пилешко традиционално се смета за лек против настинка, затнат нос и кашлица, а нејзиното антивоспалително дејство е научно докажано.

Чорбите од коски се особено богати со колаген и минерали како што се железо, цинк, магнезиум, калциум и како такви имаат позитивно влијание врз здравјето на коските, мускулите, зглобовите, кожата и дигестивниот систем.

Супите од зеленчук се богат извор на витамини, диетални влакна и фитохемикалии, пред сѐ, растителни пигменти со антиинфламаторно и антиоксидантно дејство.

На пример, супата од тиква е портокалова поради бета каротен пигментот кој има заштитно дејство врз здравјето на очите и кожата, супата од домати е извор на моќниот антиоксидант ликопен, а супата од цвекло е богат извор на железо.

Препорачливо е да додадете маслиново масло или суви печени семки во супите од зеленчук пред да ги послужите за да ги збогатите со добри масти.

На што да се обрне внимание при подготовката на супа?

За најквалитетна супа, неопходно е да се избере квалитетна, свежа, сезонска храна, бидејќи тие имаат највисок процент на хранливи материи. Потребно е супата да се готви подолго време и на помал оган за да се зачуваат витамините и минералите.

Во бистра супа во која се растворени витамини, минерали и фитохемикалии, секогаш е добро да се додаде варен зеленчук за да се зголеми внесот на диетални влакна и парчиња месо или риба како извори на протеини.

Пожелно е во супите да се додаваат зачини (бибер, магдонос, босилек, ѓумбир, куркума) за да се зголеми нивното благотворно дејство.

Се препорачува да се избегнува додавање мешавини за зачини поради високата содржина на сол и засилувачи на вкус.

Не постојат најдобри комбинации на состојки во супата, но дефинитивно се препорачува да се користат што повеќе видови зеленчук за да се добие што поголем опсег на витамини и биолошки активни компоненти.

За да се избегне додавање на рафинирано/бело брашно или крем за готвење, може да се користат цели зрна (ориз, просо, хељда, киноа, овес, јачмен) или да се изгмечи дел од зеленчукот за да се постигне саканата густина.

Дали готвењето ја нарушува хранливата вредност на храната, пред сѐ, на зеленчукот?

Термолабилните витамини и минерални материи делумно се уништуваат со готвењето, но некои од нив остануваат во течноста, односно во супата.

Се препорачува да се користи што повеќе храна при подготовката на супата за да се обезбеди поголема количина на витамини и минерали со што се намалува влијанието на водата и високите температури.

Исто така, пожелно е да не се оставаат супите да се варат подолго време на висока температура и да се ставаат поголеми парчиња зеленчук, бидејќи така се намалува влијанието на водата и високата температура.

Во овој едноставен рецепт за супа од карфиол нема павлака или брашно, а можете да додадете дополнителна димензија на вкусот и текстурата со тоа што ќе ја послужите со крутони или тостиран леб.

Велат, ова е еден од оние рецепти кои се храна за душата, па најдобриот начин да ја започнете сезоната на чорби со стил е да го испробате токму овој едноставен, а сепак толку неодолив рецепт.

Состојки:

1 голема главица карфиол, исечкана на цветчиња
3 супени лажици маслиново масло
сол и бибер
1 главица лук
1 среден жолт кромид, исечкан на коцки
1 литар супа од зеленчук или вода
200 гр рендан чедар кашкавал
сечкан млад кромид по избор за украс
крутони или тостиран леб по избор за сервирање

Подготовка:

Загрејте ја рерната на 200°C. а плехот обложете го со хартија за печење.

Ставете ги цветчињата карфиол на хартијата, наросете ги со 1-2 лажици маслиново масло и обилно зачинете со сол и бибер. Што се однесува до лукот, излупете го однадвор и отсечете го одозгора за да бидат изложени поединечните чешниња лук.

Полејте го одозгора лукот со маслиново масло, завиткајте го лукот во парче фолија и ставете го на тавата со карфиолот.

Печете ги карфиолот и лукот 30-35 минути, превртувајќи ги на половина од времето за печење, додека карфиолот не порумени и не се карамелизира.

Додека карфиолот се пече, ставете една лажица маслиново масло во тенџере и кога ќе се загрее, додадете го кромидот исечкан на коцки и пржете 5-8 минути додека кромидот не стане проѕирен.

Со блендер измешајте го кромидот, печениот карфиол, печениот лук (кој едноставно сте го исцедиле од лушпата), супа од зеленчук или вода, сол и бибер.

Мешајте додека не се соедини околу една минута, а потоа вратете го назад во тенџерето и ставете го на средна топлина.

Оставете ја супата да зоврие, а потоа измешајте го внатре чедарот.

Мешајте 10-15 минути, вкусете и по потреба додајте зачини.

Украсете со зелен кромид и дополнително рендан чедар кашкавал. Послужете со крцкав тост или крутони.

Готовите супи од кесичка се исклучително популарни меѓу луѓето, особено во лето кога никој не сака да се задржува долго пред шпоретот, но експертите предупредуваат: „Избегнувајте ги“

Незнам дали и вам како помлади ви изгледало како да сте зготвиле којзнае што кога сте направиле супа од кесичка, ама јас си изгледав како права готвачка кога првпат сварив самата ваква супа.

Па дека крушата под круша паѓа покажа и син ми кога еднаш, на прашањето дали со девојка му на одмор јадат само сува храна, се пофали: Не, не, баш денес си правевме домашна супа!

Ооо, браво, од што? Го потпрашав јас, а тој ми вели: од кесичка!

Ете толку за домашната супа.

Инаку, со оглед на тоа што сме сите во трка со времето, а летово и навјасани од големите горештини, супите од кеси често изгледаат како брза и практична опција за оброк.

Сепак, иако изгледаат како едноставно решение кое овозможува да се подготват оброците за миг, малку луѓе размислуваат за потенцијалните здравствени ризици што ги носат.

Иако се привлечни поради нивната едноставност и различните вкусови, супите од кесичка кријат бројни состојки кои можат да бидат штетни за вашето здравје.

Доколку редовно ја избирате оваа опција, важно е да знаете што се крие во пакувањето и какви последици може да има врз вашето здравје.

Иако се достапни во различни вкусови и ги привлекуваат потрошувачите со леснотијата на подготовка, супите во кеси всушност не се најздравиот избор.

Можеби на прв поглед изгледаат како добра замена бидејќи брзо добивате четири чинии супа, но доколку ги консумирате редовно, треба да знаете неколку важни факти.

Составот на супата од кесичката може да има негативно влијание врз здравјето.

Содржат голема количина сол и тестенини направени од бело брашно, што значи зголемен внес на јаглехидрати.

Посебен проблем се транс мастите, односно незаситените масни киселини и разните засилувачи на вкусот.

Не се здрави

Еден од главните проблеми со супата од кесичка е високата содржина на натриум.

Натриумот е важен за регулирање на крвниот притисок и функцијата на мускулите, но прекумерното консумирање може да предизвика хипертензија, срцеви заболувања и проблеми со бубрезите.

Според препораките на Светската здравствена организација (СЗО), возрасните не треба да консумираат повеќе од 2.300 милиграми натриум дневно, а една порција супа од кесичка може да содржи и до половина од таа количина.

Супите од кесичка често содржат конзерванси и адитиви кои го продолжуваат рокот на траење и го подобруваат вкусот.

Колку почесто, толку полошо

Иако многу од овие адитиви се безбедни за консумирање во мали количини, долготрајното консумирање може да има негативни здравствени последици.

На пример, мононатриум глутамат (MSG), кој често се користи како засилувач на вкусот, може да предизвика главоболки и други здравствени проблеми кај некои чувствителни луѓе.

Иако погодни, супите од кеси често се нутритивно слаби.

Тие обично содржат минимални количини на зеленчук и протеини, што ги прави несоодветен извор на есенцијални хранливи материи.

Редовното консумирање на такви супи може да доведе до недостаток на потребните витамини и минерали во исхраната.

Избегнувајте ги

Исто така, супите од кесичка често содржат додадени шеќери и нездрави масти.

Овие состојки го подобруваат вкусот, но во исто време ја зголемуваат и калориската вредност на производот, што може да придонесе за зголемување на телесната тежина и други здравствени проблеми.

Ако консумирате супи од кесичка два до три пати неделно, не се препорачува. Подобро е да се избегнува честото консумирање на овие супи.

Наместо супа од кесичка, се препорачува да се подготви домашна супа од свежи состојки. Домашните супи може да се направат пред време и да се замрзнат во порции што ги прави подеднакво брз оброк.

Изборот на поздрави алтернативи може значително да придонесе за подобро здравје и подобра исхрана.

Настинките и вирусите траат од пет до десет дена и поминуваат сами од себе. Не постои посебна процедура за третман освен доволно одмор и соодветен внес на течности. Иако витамините од одредени видови храна не можат да помогнат симптомите да исчезнат, тие можат да помогнат да траат пократко.

За добро познатиот домашен лек против настинка, пилешката супа, неколку научни студии потврдија дека има способност да ги ослободи дишните патишта. Второ место по популарност е киселата зелка, која се карактеризира со многу висока содржина на витамин Ц, благотворно дејство на имунолошкиот систем и скратување на времетраењето на настинките.

Вирусите и настинките се најчестиот облик на акутни инфекции на горниот респираторен систем и ги погодуваат сите возрасни групи. Во просек, здравите возрасни лица се среќаваат со ваква блага инфекција два до три пати годишно, а децата од предучилишна возраст шест до осум пати годишно. Со доаѓањето на зимските месеци, кои носат пониски температури, се зголемува и зачестеноста на настинките и вирусите.

Антибиотиците не лечат вируси!

Настинката е лесна вирусна инфекција која трае не повеќе од една недела и се манифестира со кивање, шмркање или затнат нос, болки во грлото и главоболка. Во поретки случаи, вирусот може да се појави во форма на ентеровирус со дигестивни нарушувања, додека најчесто го зафаќа респираторниот систем со симптоми како течење на носот, болка во грлото и целото тело и покачена температура.

Иако многу луѓе прибегнуваат кон антибиотици за што побрзо да се ослободат од настинките, тие не претставуваат соодветна помош освен ако не се развие бактериска инфекција покрај вирусната. „Лекувањето“ на настинки и вируси најчесто се сведува на зајакнување на одбранбениот механизам и ублажување на симптомите, без разлика што тие обично поминуваат сами по пет до десет дена.

Важно е да се одржи здрав и силен имунолошки систем во форма на превенција на болести, односно, со цел лесно да се одговори на нападот на инфекцијата. Најдобар начин да го направите ова е да јадете добро балансирана исхрана, редовно да се занимавате со умерена физичка активност, да избегнувате стрес и нагло губење на тежината и да обезбедите квалитетен сон. Меѓутоа, доколку не успеавме да го заштитиме телото од настинка, постојат голем број намирници кои би можеле да го забрзаат заздравувањето и да ги направат тие неколку дена поподносливи.

Течноста како сојузник

Правилната хидратација на организмот е од големо значење при настинки и вирусни инфекции. Топлите напитоците во вид на супи и чаеви ќе помогнат да се навлажни слузокожата на грлото и да се ублажат симптомите на болно грло, а пијалаците направени од свежо овошје или зеленчук ќе ги обезбедат многу потребните електролити.

Чаевите се одличен сојузник во борбата против грипот и настинката, а со додавање на мед и сок од лимон, нивниот ефект во ублажување на симптомите на настинка ќе биде уште подобар. Поради својата леплива конзистентност, медот помага да се намали иритацијата на слузокожата на грлото. Изборот на типот на чај влијае и на текот на развојот на болеста, а чајот од камилица, шипка, бозел и столисник се покажале како најефективни.

Сокот од лимон, освен што е извор на витамин Ц, ја поттикнува работата на плунковните жлезди, поттикнувајќи ги да лачат плунка која ги навлажнува устата и грлото и го олеснува голтањето. Имајте на ум дека витаминот Ц и медот се додаваат во топлите напитоци само кога ќе се изладат за да не се уништат вредните состојки.

Храна за побрзо заздравување

За да ги подобрите шансите на вашето тело да се бори против инфекцијата, неопходно е да се зајакне одбранбениот систем со урамнотежена исхрана, која првенствено се заснова на богатство од овошје и зеленчук и цели зрна и е сиромашна со едноставни шеќери од преработена храна и заситени масти. Збогатете го менито со храна богата со витамини Ц, Е и А и минерали цинк, бакар и селен.

Постојат квалитетни докази дека високите дози на витамин Ц (1-2 г на ден) го скратуваат времетраењето и ги ублажуваат симптомите на обичната настинка. Доволно количество на овој витамин обезбедуваат агрумите како што се лимоните, портокалите, грејпфрутите, шипките и бобинките, кои исто така содржат и изобилство од антиоксиданти. Доколку витаминот Ц се зема во форма на додатоци во исхраната, треба да се има предвид дека дневните дози од повеќе од 2 грама може да предизвикаат дијареа, повраќање и вртоглавица.

Витаминот Е, особено во комбинација со селен, може да игра важна улога во спречувањето на настинки и други инфекции на горниот дишен систем, додека витаминот А го зајакнува имунитетот и делува на обновување на слузокожата на горниот респираторен тракт.

Честото консумирање јаткасти плодови, семки и производи од соја ќе обезбеди доволно витамин Е, додека внесот на витамин А ќе биде обезбеден со моркови, кељ, кајсии, слатки компири, брокула и јајца. Треба да се земат предвид и традиционалните домашни лекови кои се пренесуваат од генерација на генерација, особено што некои од нив добија научна потврда за нивното благотворно дејство врз симптомите на настинка.

Она што веројатно прво им паѓа на ум на повеќето луѓе е пилешката супа, која со неколку научни студии е потврдено дека има антибиотски својства и способност за чистење на дишните патишта. Киселата зелка, која се карактеризира со многу висока содржина на витамин Ц, поволно влијае на имунолошкиот систем и го скратува времетраењето на настинката.

Се охрабрува и консумацијата на лук и кромид бидејќи содржат активни материи со антивирусно и антибактериско дејство. Одредени зачини како што се чили, пипер или кари, кои вообичаено поттикнуваат дренажа, можат да ги ослободат дишните патишта и да ги ублажат симптомите, а ренот или сенфот даваат сличен ефект.

Оваа крем супа од тиква ни ја послужија на еден настан на Слоу фуд, во ресторанот „Ореов лад“ во Сарај. Можеше слободно да биде и главно јадење бидејќи беше толку јака и вкусна и здрава што може слободно да биде и ручек. Уште ако си додадете некое крцкаво препечено лепче, не ви треба ништо друго.

Бидејќи и тиквата и слаткиот компир (батат) и морковите се полни со здрави состојки, кога ќе се здружат во една ваква вкусна порција, ќе добиете обилен оброк полн со хранливи материи, а сепак не многу калоричен.

Тиквата содржи високо ниво на антиоксиданти и каротен и особено високо ниво на витамин Ц и Е. Со своите лековити својства е идеална во борба против срцеви заболувања, како превентива од рак, катаракта и мозочен удар. Содржи и калиум кој е важен за функцијата на срцето, фосфор и калциум кои влијаат врз коските и забите, железо кое е важно за крвта и манган кој ја чува кожата.

Последниве години кај нас почна да се употребува во исхраната и слаткиот компир. Иако не е дел од нашата традиција, кога веќе добро вирее, зошто една толку здрава намирница да не стане дел од нашето секојдневје.

Особено ако се има предвид дека него секојдневно го консумираат жителите на Окинава кои важат за едни од луѓето со најдолг животен век во светот. Слаткиот компир е богат со растителни влакна и антиоксиданти и една студија објавена во списанието „Интерна медицина“ во 1994 година, покажала дека луѓето што консумирале сладок компир имале низок крвен притисок и немале проблем со вишок килограми. Речиси ретко кој од нив имал срцеви болести, удари или некоја друга од современите болести. Бататот е богат со растителни влакна, витамин Ц, калиум, витамините Б3, Б5 и Б6, манган, магнезиум и бакар. Портокаловиот вид сладок компир, оваа боја ја добива поради тоа што во неговиот состав има бета каротен, што во исто време е и пигмент и антиоксидант. Богат е со протеини, кои се одлични во борбата со вишокот килограми. На организмот му нуди големо количество витамин А чиј недостиг во организмот на светско ниво води кон слепило кај децата.

И на крајот, но не помалку важна е третата портокалова состојка во оваа супа се морковите, кои ги ставаме во се, од супи, манџи, салати. па до десерти. Колку што имаат широка листа за тоа на кој начин можат да се употребат во исхраната, толку е долга и листата на здравствени придобивки.

И тие се богати со витамин А, хранлива материја од суштинско значење за добар вид, поточно, морковите се полни со бета каротени што последователно се претвораат во витамин А во нашиот црн дроб. Бидејќи бета каротените не можат да се произведат во телото, мора да се добијат од исхрана, а со оваа супа ќе добиете навистина одлична доза. Инаку, не е случајност што „каротен“ звучи како „карот“ („carrot“). Зборот потекнува од 19-тиот век, од германски научник кој го кристализирал каротенското соединение од корени од моркови. Бета каротенот е еден од повеќе од 600 каротеноиди, кои се пигменти што ја даваат бојата на жолчките од јајцата, доматите, овошјето, темно зелените листести зеленчуци и некои типови на морска храна. Познати по заштитата од ултравиолетово зрачење, морковите се исто забележани поради нивната улога што ја играат во превенција на срцеви заболувања и мозочен удар, во превенција на инфекции кај исеченици и гребаници, во одржување на млада кожа и во чистење на дебелото црево и исфрлање на токсините.

Калциумот, фосфорот и магнезиумот во морковите помагаат во изградбата на силни коски и здрав нервен систем. Потрошувачката на калциум е од суштинско значење, особено за здрав срцев мускул. Фосфорот е од суштинско значење за омекнување на кожата и зајакнување на забите, косата и коските, додека на магнезиумот можеме да му бидеме благодарни за неговата улога во ментален развој, дигестија на мастите и апсорпција на хранливите материи. Морковите исто нудат и бројни придобивки заради содржината на калиум, витамин Ц и Б6, бакар, фолна киселина, тиамин и магнезиум.

И конечно, еве еден рецепт за вашата супа од трите најпортокалови и најздрави плодови.

Состојки:

500 г тиква

2 поголеми моркови

1 среден батат

1 главица кромид

50 г путер

8оо мл вода

100 мл млеко

павлака за украсување

сол, црн пипер

Приготвување:

Исечкајте го на ситно кромидот, а морковите, бататот и тиквата на тркалца и коцкички. Пропржете ги на путер, кромидот, морковот, бататот и тиквата, па ставете ја водата.
Нека се крчка околу 20 минути, а потоа додадете го млекото и зачините. Се заедно ставете во блендер и измиксајте. Ако ви е многу густо можете да додадете млеко. По желба украсете со павлака.
5.Добиената супа ставете ја во чинии и украсете ја со малку магдонос и павлака за готвење 

Повеќето од нас сме навикнати да ја фрламе кората од лубеница и да ја јадеме само сочната црвена внатрешност. Но кората од лубеница не само што е јадлива, туку е и богата со корисни хранливи материи.  Практично, тука има најмногу витамини, на пример, во неа се наоѓаат витамините Б и Ц и цитрулин кој се претвора во аргинин, кој е многу важен за здравјето на срцето и за циркулацијата.

Станува збор за белиот дел од лубеницата кој се наоѓа помеѓу слаткиот црвен плод и зелената кора. Иако црвената внатрешност е неспорно највкусна, и белиот дел може да биде вкусен, но на поинаков начин.

Затоа, време е да престанеме со фрлање на кората од лубеница и да ѝ дадеме шанса. Од кората може да се направат повеќе работи, на пример, слатко од лубеница, кисела туршија, може да се сомеле и да се додаде во смути, а може да се направи и кандирана закуска. Пред неколку години ние ја откривме и ладната супа од кора од лубеница и беше навистина вкусна и освежителна.

Подолу ќе ги најдете рецептите за супата, за слаткото, за салата и за кандирана кора од лубеница.

Супа од кора од лубеница

Состојки:

Кора од една кришка лубеница

1 помала краставица

1 лажица сок од лимон

1 лажица маслиново масло

200 мл јогурт

сол, црн пипер, копар

Приготвување:

Откако ќе ја исечете лубеницата и ќе го одвоите црвениот дел, излупете ја со нож за лупење зеленчук зелената кора (надворешниот дел) и белиот дел исечете го на коцки. Ставете ги во блендер заедно со краставицата, исечени на коцки, 1 лажица маслиново масло, 1 лажица сок од лимон, 200 мл јогурт, сол, црн пипер, копар и едно чешне лук.

Изблендирајте и ставете ја смесата убаво да се излади.

Оваа одлична супа е многу освежителна, вкусна и најважно, се прави дури побрзо и од таратур.

Белиот дел од кората може да се направи и за зимница такашто истите ќе ја подготвите на сличен начин како и киселите краставички.

Слатко од лубеница

За домашно слатко од кора од лубеница потребни ви се само3 состојки и помалку од еден час.

Состојки:

600 гр кора од лубеница
200 гр шеќер
сок од 1 лимета + кора

Приготвување:

Земете ја кората и извадете го зелениот дел со помош на лупач. Остатокот исечкајте го на ситни коцки и ставете го во поголемо тенџере. Поросете со шеќер, додадете сок и кора од лимета и оставете да се вари на тивок оган 45 минути. Потоа, истурете во чисти тегли и оставете да се излади.

Кандирана кора

Состојки:

500 гр кора од лубеница
250 гр шеќер

Приготвување:

Исечете ја кората на мали коцки. Ставете во тенџере, додадете шеќер и покријте со вода. Ставете го на средна температура и почекајте водата целосно да испари. Ќе потрае околу 2 часа. Потоа наредете ги парчињата кора од лубеница во плех на хартија за печење, а потоа сушете ги во рерна на 100 °C 1 час.

Еве еден рецепт и за салата со белиот дел од кората.

Состојки:

1 кисела павлака

3 чешниња лук

белиот дел од лубеницата

1/2 краставица

1 пиперка

2-3 ротквици

1 лажица маслиново масло

вински оцет или балсамико

Приготвување:

Подгответе ја кората од лубеницата на ист начин како за супата и изрендајте ја. Истото направете го со краставицата, ротквиците и пиперката, а лукот смачкајте го со преса.

Ставете ги сите состојки во сад за салата и зачинете.

На Блискиот Исток и во Кина се консумираат и семките од лубеница. Најчесто се сушат и се печат и се консумираат како закуска.

За да ви биде полесно да си ја направите оваа интересна супа од сладок компир, ѓумбир и портокал, добро е секогаш да имате малку печен компир во фрижидерот или барем да ги испечете компирите претходната вечер, така што кога ќе дојдете од работа ќе можете да ја подготвите оваа вкусна супа за околу 3 минути.

Состојки:

2 средни слатки компири (околу 500 г вкупно)

750 милилитри супа од зеленчук

2 лажички ситно рендан свеж ѓумбир

кора од пола портокал – по можност непрскан или добро измиен и 2 лажички сок од портокал

1 лажичка сок од лимета

¼ лажичка каенски пипер

сол (по вкус)

Приготвување:

Загрејте ја рерната на 200/220ºC.

Ставете ги слатките компири во мал плех за рерна, обложен со кујнска хартија или завиткани во фолија (сирупот што истекува од слатките компири додека се печат е многу тежок за миење) и избоцкајте ги неколку пати со врвот на остар нож или со вилушка. Потоа печете 1 час, или додека компирите не омекнат. Се вадат од рерна и се оставаат да се изладат.

Ставете ги излупените слатки компири во тенџере. Ставете ја супата, додадете го изренданиот ѓумбир, кората од ½ портокал и 2 лажици сок од портокал, заедно со сокот од лимета и кајенскиот пипер. Потоа измешајте убаво пред да го ставите  капакот, вклучете ја ринглата и ставете ја супата да зоврие.

Вкусете за зачините, оставете малку да се излади, а потоа користете блендер или испасирајте со вилушка ако сакате супа со погруба текстура.

Дополнителни информации:

Компирите може да се печат и до 2 дена однапред. Префрлете ги во соодветен сад, оставете да се изладат, па покријте ги и ставете ги во фрижидер.

Ако ви остане од супата, изладете ја, покријте ја и ставете ја во фрижидер во рок од 2 часа од правењето. Се чува во фрижидер до 3 дена. Повторно загрејте во тенџере, повремено мешајќи и додајте дополнителна вода доколку е потребно кога ќе сакате повторно да јадете.

:

Изладената супа може и да се замрзне, во херметички сад, до 3 месеци. Одмрзнете преку ноќ во фрижидер и повторно загрејте како во претходниот случај.