Денеска некако ни тргна со текстовите за необични јадења. За разлика од кактусите, кои можат да бидат вкусни, ова последново, изгледа како најголема глупост. Мислам, баш е некако и соодветно за времево кога е се поскапено по продавниците и пазарите, па ни останува да почнеме да јадеме камења. Иако ми се чини дека овие, кои ги продаваат како популарна улична храна во Кина, се всушност прилично скапи. И не е дека камчињата се буквално за јадење, туку за шмукање. Ишмукајте и фрлете, тоа е принципот, а ќе ве чини 16 јуани или околу 2 евра за порција. Познато е како Суо диу, најтврдото јадење на светот, а благодарение на социјалните мрежи, стана исклучително популарно во последните неколку недели.

А кога ќе ми текне дека на самиот почеток од средношколските денови со другарка ми Кате продававме на плоштад нацртани камења како украси и сувенири. Иако беа многу убави, повеќето од минувачите реагираа викајќи: „како не ви е срам, камења ќе ни продавате!“ Ама тоа беа други времиња, кога не се почитуваше претприемничкиот дух на децата, туку требаше само на школо да се мисли.

Како и да е, ова јадење е нов хит на улична храна на кинеските улици – пржени камчиња (stir fry). Наместо зеленчук, морска храна или месо, во врелото масло се фрлаат камчиња и се мешаат со масло од чили, разни зачини, лук и пиперки исечкани на коцки.

Името на јадењето, suo diu, од кинески се преведува како „ишмукај и фрлај“. Имено, на купувачите им се послужуваат ароматизирани камења во кутии со големина на дланка, а на нив останува да ги ишмукаати вкусовите од камењата и потоа да ги фрлат.

Всушност, можете и да си ги однесете дома како сувенир.

Се верува дека самото јадење е старо неколку стотици години и потекнува од провинцијата Хубеи. Наводно, го измислиле лаѓари кои заглавиле по пат и останале без храна, а на овој начин подготвувале камчиња за да си го задоволат гладот.

Како се прави suo diu на кинеските улици, погледнете во видеото подолу.