Во светот денес се зголемува бројот на луѓе кои најчесто поради зголемен стрес имаат проблеми со срцето, како што се аритмија, тахикардија или забрзана работа на срцето и ангина пекторис…

И додека медицината нуди бројни синтетички лекови за срцето, постои еден ефикасен природен рецепт стар повеќе од 800 години.

Станува збор за вино од магдонос, еликсир за срцето кое во средниот век го измислила германската бенедиктинка и визионерка Хилдегард од Бинген, инаку позната како поддржувач на умерениот живот, природната храна и растителните лекови.

Виното од магдонос, кое таа го смислила, е лек за најтешките срцеви заболувања, како и за ревматски болки и срцева слабост, а особено им се препорачува на постарите лица.

Овој Хилдегард тоник за срцето може да помогне и при стрес, како и зголемен замор и анксиозност.

Се препорачува и при преоптоварување на срцето за време на сезоната на настинки и грип.

Интересно е што овој нејзин природен рецепт го прифатиле дури и лекарите, а гласот за него го проширила познатата австриска билкарка Марија Требен.

Состојките вклучени во овој лек за срце се вино (по можност домашно), магдонос, оцет и мед.

Вино – древен народен лек

Виното уште од многу одамна е познато како еликсир за здравје – важно е само да се биде умерен со неговата количина. Уште во библијата се спомнува „вино што го развеселува човечкото срце“.

Хилдегард исто така верувала дека умереното консумирање на домашно вино е составен дел од здравиот начин на живот.

Меѓу другото, таа верувала дека виното дополнително ја поттикнува циркулацијата.

Виното станува уште полековито ако му се додадат некои здрави билки. Во овој случај, тоа е магдоносот.

Магдонос – за циркулација и здрави крвни садови

Оваа зелена билка, освен што е одличен диуретик, богата е и со фолати (витамин Б9), кои помагаат во спречување на срцеви заболувања.

Фолатите, всушност, помагаат да се претвори хомоцистеинот, кој може да ги оштети крвните садови и да го зголеми ризикот од срцев удар, во бенигна молекула.

Магдоносот содржи и есенцијални масла, кои исто така имаат корисен ефект врз работата на срцето и циркулацијата.

За најдобри лековити својства, секогаш избирајте темно зелен свеж магдонос без жолти листови.

Мед – за понизок крвен притисок и регулација на отчукувањата на срцето

Во овој народен лек, медот се додава на виното и магдоносот. Овој популарен пчелен производ е одличен извор на антиоксиданти.

Според едно истражување, медот помага да се намали крвниот притисок, да се регулираат отчукувањата на срцето и да се спречи смртта на здравите клетки.

Благодарение на сето ова многу поволно делува на здравјето на срцето и крвните садови.

За рецептот на Хилдегард изберете висококвалитетен домашен мед бидејќи е најбогат со антиоксиданти, кои се клучни за кардиоваскуларното здравје.

Природен лек за срцето – рецепт за вино од магдонос

Состојки:

10 стебленца свеж магдонос
1 л домашно црвено вино
2 лажици вински оцет
300 гр мед

Приготвување:

Во тенџере истурете литар домашно вино и 2 лажици вински оцет. Додадете ги стебленцата од магдонос заедно со листовите, оставете да зоврие и да се вари околу 10 минути.

Потоа додадете мед и продолжете со готвењето уште 3-4 минути.

Процедете и истурете во стерилизирани шишиња. Добро затворете. Слободно можете да го консумирате и талогот што се создава.

Употреба:

Пијте 1-3 лажици вино од магдонос секој ден, додека не забележите подобрување.

Во случај на тешки срцеви заболувања, конзумирајте го овој напиток подолг временски период.

Во случај на палпитации на срцето, можете да пиете и поголеми количини од овој природен лек – додека срцето не се смири.

Земете вино од магдонос во случај на болка во пределот на срцето, палпитации, стегање во градите.

Овој природен лек е одличен и за несоница. За оваа намена испијте половина чаша пред спиење.

Ова вино е добра помош при хронични ревматски заболувања, како и при опоравување од срцев удар.

Ако сте загрижени затоа што медот треба да се вари, во овој случај тоа има добра причина.

Имено, со варење на медот во алкохол се создаваат добри состојки за срцето и циркулацијата – гликозиди.

Понекогаш новинарската работа е навистина тешка, особено кога треба да работиш во недела, и тоа, по сопствена волја и по сопствен избор. Како ние од Арт кујна. Ниту некој не тера, ниту мораме да го правиме тоа, но понекогаш навистина не можеме да им одолееме на настаните кои се во нашиот ресор – храна, вино, ем ракија, пиво, фестивали на храна, саеми на вино, разговори со готвачи, со експерти, гастрономи, енолози и мераклии.

Па така беше и овој тежок викенд. Четврта година по ред се одбележа денот на македонската мома, тивка, силна и своја – Станушината. Станува збор за автохтон вид на грозје кое се одгледува само во Македонија и на ниту едно друго место во светот, кој последниве години, не само што успеа повторно да заживее на родното македонско тло, туку и успеа и да се рашири и сега веќе од него прават вино дури 28 македонски винарии.

На 11 мај во Кавадарци по четврти пат се одржа настан по повод Денот на Станушина, единствената автохтона сорта на грозје во Македонија, со долгогодишна традиција во тиквешкиот регион. Настанот кој го организира здружението на „Македонски семејни винарии“, со поддршка од Министерството за земјоделство, како и минатата година, продолжи на 12 мај во Скопје во винскиот бар и продавница за вина – Wine Berry, кадешто љубителите на македонското вино можеа да дегустираат станушини од 28 македонски винарии, но беа избрани и најдобрите четири.

Нашата домаќинка, Јадранка Клариќ Кимовска, сопственичка на Wine Berry, е вински експерт со меѓународно искуство, интернационален вински судија, вински витез и најголем промотор на малите семејни винарии, како и на оваа наша автохтона винска сорта, па не е чудно што е и прв вински амбасадор и почесен член на здружението Македонски семејни винарии.

Токму затоа и вината од македонските семејни винарии сочинуваат голем дел од асортиманот во Wine Berry, a нашата соговорничка постојано ја истакнува нивната автентичност.

„Викендов имаме четврта едиција на Денот на Станушина, нашата автохтона сорта на која, иако беше заборавена и ископачена сорта ѝ се враќаме последниве години и сега веќе  имаме многу винарии кои прават нови насади на таа сорта, затоа што пазарот бара нешто што е уникатно и што е печат за државата. Всушност, она што го правиме со малите семејни винарии е вистинска револуција, иако ова го правиме ентузијастички, без никакви дополнителни бенефити, но се надеваме дека фелата ќе не слушне и дека ќе разбере дека е ова навистина важно за нашата винска индустрија“, ни рече Јадранка.

Таа е навистина неуморна во тоа што го прави, а нејзиниот ентузијазам е очигледно, заразен. Како вистинска домаќинка, Јадранка, како и секогаш, постојано се движи меѓу гостите неуморно објаснувајќи и успева да ги заинтересира дури и случајните минувачи. По повод денот на станушината, многу такви случајни минувачи како едноставно да заборавија каде тргнале, остануваа да дегустираат и да слушнат нешто повеќе за тоа од каде доаѓаат сите тие убави станушини во варијации, од бели, розеви, црвени и пенливи вина.

Во Скопје сите видови на станушина од 28 винарии беа и оценети од жирито во кое имаше и тројца специјални гости, инаку, важни имиња од светот на виното: Црногорката Весна Мараш, професор доктор по производство на вино, Германецот Томас Брендл, вински новинар и амбасадор на Concours Mondial de Bruxelles, важно интернационално натпреварување за вино и Словенецот Дејан Лепувчек, сомелиер кој има своја дистрибутивна куќа која работи со македонски вина.

„Оваа година платината ја освои станушината на винаријата „Параџик“ од село Витоша, златото го освои „Момина солза“ од винарија „Попови“, среброто – пенливата станушина на винарија „Кувин“, а бронзата ја доби винаријата „Венец“, ни соопшти Јадранка додавајќи дека се надева дека следното, полујубилејно, петто издание на Денот на Станушината, ќе имаат поголем буџет и ќе можат да направат интернационален настан.

„Затоа што станушината е навистина наше национално богатство, нешто уникатно во нашата винска индустрија“, заврши госпоѓа Јадранка Клариќ Кимовска.

Понекогаш се случува да ни останат неколку чаши вино кои не сме имале време да ги испиеме, а може да се случи и виното по некое време да ја изгуби свежината и вкусот. Но, не го фрлајте веднаш – остатоците од вино можете да ги користите на бројни креативни и практични начини, дури и кога не е идеално за консумирање.

Еве некои од најдобрите совети за користење на виното кое ја поминало својата „оптимална фаза“.

Направете сос за тестенини или за месо

Еден од најпопуларните начини да го користите виното кое повеќе не е најдобро за пиење е да го користите во готвењето. Виното е одлична состојка за правење разни сосови, особено за тестенини или јадења со месо.

Црвеното вино може да биде совршено надополнување на сосови за месо како говедско или дивеч, додека белото вино оди одлично со пилешко и риба.

Додадете го виното во тавата заедно со путерот, зеленчукот, зачините и малку супа за да создадете богат, вкусен сос.

Освежете го овошјето во десертите

Виното можете да го користите и како маринада за овошје, што на десертите ќе им даде посебен вкус. Најдобро оди со бобинки, круши или праски. Со додавање на малку шеќер, зачини како цимет или ванила и малку сок од лимон, овошјето маринирано во вино може да стане одлична состојка за овошни салати, колачи или крамбл.

Користете го во маринади

Виното е одлично за маринирање месо. Содржи танини кои помагаат во омекнување на месото, а истовремено му даваат богат вкус. Маринирајте пилешко, свинско, говедско или зеленчук во вино, маслиново масло, лук, зачини и билки. Овој процес не само што го подобрува вкусот, туку и го прави месото посочно.

Направете сами прелив за салата

Ако ви останало бело вино, можете да направите фантастичен прелив за салати. Комбинирајте го виното со маслиново масло, сенф, сок од лимон, сол и бибер. Овој сос носи лесен, киселкаст вкус кој одлично оди со зелени салати, зеленчук, па дури и со печени компири.

За правење сорбет или сладолед

За љубителите на десерти, виното може да биде и одлична состојка за домашно сорбе или сладолед. Со оглед на природната сладост на виното, ова е совршен начин да му дадете нов живот. Измешајте вино со овошје и шеќер, ставете во замрзнувач и уживајте во освежителен деликатес.

Како додаток на супи и чорби Виното може да им даде длабока арома и богатство на вкус на различни супи и чорби. Црвеното вино оди одлично со говедска чорба, додека белото вино може да ги подобри лесните супи од зеленчук или пилешко. Само додадете малку вино за време на готвењето за да создадете покомплексен, пополн вкус.

Иако виното може да ја изгуби првобитната свежина, тоа не значи дека треба веднаш да го фрлите. Со малку креативност, остатокот од виното можете да го претворите во одличен додаток на вашите оброци и пијалоци. Без разлика дали се работи за сос, десерт, маринада или нешто друго, виното може да донесе длабочина и богатство на вкусот. Следниот пат кога ќе ви остане вино, запомнете дека можете да го искористите за да создадете нешто вкусно и здраво – ќе бидете изненадени од резултатите!

Сите знаеме за Дионис и за Бахус, речиси сечие раѓање, сeчии радости и животни успеси биле и ќе бидат прославени со вино, како што и сите тажни приказни и секое заминување од овој свет се натопени со вино.

Виното било и останува ценет пијалак на многу цивилизации. Што би рекле Французите: Сите моди поминуваат, само виното останува. Несомнено, тоа претставува најцивилизирано и најкултивирано средство за уживање и своевиден културен и цивилизациски предизвик.

Вистинската винска култура, на крајот на краиштата, како и секоја друга, се стекнува со текот на времето. Секако, не се мери според количината на испиено вино, туку подразбира одредени знаења. Од оние за основата на производството на одредени видови вино, за неговата класификација по квалитет, за сервирањето, за читањето на етикетите, познавање на температурата на виното, спарување на виното со храна, а особено за запознавање на самиот ритуал за пиење вино.

Таа всушност подразбира цивилизирано консумирање на овој боженствен пијалак.

Колку знаете вие за виното?

А сега, признајте, колку пати сте седнале на ручек или вечера и сте го гледале сомелиерот како се приближува до вашата маса носејќи го шишето вино што го нарачавте?

Сигурно барем неколку пати! И дали сте си помислиле во себе: Немој само мене да ми дадеш да го пробувам! Плашејќи се дека нема да знаете како да го направите тоа, а да не излезете смешни и несигурни!

Но сигурно ќе дојде ден кога ќе ви стават вино во чашата и ќе ја чекаат вашата оценка за истото.

Ќе ја земете чашата од која ќе ви се насмевнува виното и веројатно ќе кажете само некое несигурно: аха, во ред е!

И што потоа? Нема белким наеднаш да престанете да пиете вино. Многу подобар избор е да се едуцирате!

Скопскиот вински салон е вистинското место

На 13 и 14 декември (петок и сабота) во хотел Мериот почнува скопскиот вински салон „Винодонија“ кадешто трпеливо не едуцираа во текот на изминатите седум изданија, а така ќе биде и овојпат, на осмото издание, во чии рамки ќе можеме да уживаме во над 500 различни вина, кои ќе бидат изложени од над 70 различни винарии.

Тука можете да се запознаете со различни видови и подвидови на вино. Да научите како да ги разликувате и зошто кога пробуваме вино ја навалуваме чашата на 45 степени, како и тоа што всушност бараме кога ќе го помирисаме виното и ќе го провртиме во чашата.

Ќе научите многу работи, а единственото што се очекува од вас е да сте љубител на вино и да сакате да знаете повеќе отколку само тоа дека постојат црвени и бели вина, пенливи и оние кои се нешто помеѓу црвено и бело, односно, розе вина. (Патем, има и портокалови).

Што се однесува до спарувањето со храна, тоа ќе можете да го направите на лице место, во гастрономскиот дел кадешто ќе бидат присутни над 15 изложувачи на деликатеси што совршено се надополнуваат со виното.

Ексклузивни мастер класови и дегустации водени од енолози, сомелиери и професори

Во склоп на Винодонија секогаш има одлична програма која освен спонтаните дегустации на повеќе од 500 различни вина среде убавиот метеж од луѓе, вклучува и водени дегустации каде секоја етикета е претставена од сомелиери, енолози, професори и од самите винари, со објаснување зошто е избрана за одредена дегустација.
Секое вино во рамките на ексклузивните мастер-класови ќе биде презентирано со сугестија зошто е избрано, што го издвојува од другите, колку алкохол има, дали има полно, средно или лесно тело, повисоки танини и побогата арома, па дури и со каква храна треба да се служи.

Програмата вклучува седум мастер класови и работилници водени од светски и домашни вински експерти. Љубителите на виното ќе можат да научат повеќе преку тематски предавања како што се: „Во долината на винската среќа – Дегустација на вина од северна Рона, Франција“, „Во светот на

меурчињата“, потоа, еЕдукативно предавање за виното и здравјето на срцето“, како и уникатната „Голема вертикална дегустација на Merlot Single Vineyard на винарија Камник“.

Специјален дел од програмата се и работилниците „Запознај ја винска Унгарија“, „Ризлинг – сорта за

префинети и долговечни вина“ и „Враќање во иднината – новоформирани вински

сорти од Србија“.

Повеќе од изложба на вина

И конечно, како што вели проект-менаџерот на Винодонија 2024, Дејан Донев, оваа манифестација е повеќе од изложба на вина.

„Винодонија 2024 е платформа за винариите да се претстават пред префинета винска публика, која вклучува гости од ХоРеКа секторот, угостители и љубители на виното. Ова е шанса за сите учесници да создадат нови контакти, да ги прошират своите пазари и да ја раскажат својата винска приказна на начин кој инспирира,“ вели Донев.

Распоредот на мастер класовите е во официјалната програма на Винодонија, подолу во текстот.

Картите за претстојното 8-мо издание на Винодонија 2024 се во продажба и можете да ги набавите на следниот линк: https://vinodonia.mk/shop/

Целта на Анџела Лела, сопственичка на неодамна отворениот ресторан „Ал Кондоминио“ во Верона, е да ги поттикне гостите да разговараат за време на оброкот наместо постојано да гледаат во нивните телефони, објави „Гардијан“.
Таа вели дека сакала да отвори ресторан кој се разликува од другите.

„Технологијата станува проблем – нема потреба да гледате во телефонот на секои пет секунди, но за многумина тоа е како дрога… На овој начин имаат можност да го остават телефонот на страна и да испијат добро вино“, рекла Лела.

Гостите од ресторанот кои ќе се решат да го сторат тоа, го ставаат телефонот во посебна кутија на влезот и го покажуваат клучот од кутијата на келнерот кој ќе им донесе шише вино.

Во кутијата гостите можат да ја стават и својата оценка за оброкот, а на оние кои ќе напишат највпечатлива оценка, ќе им биде понуден оброк следниот пат кога ќе дојдат.

Гардијан пишува дека со ветувањето за бесплатно вино, ресторанот станал популарен меѓу оние кои се подготвени да се „детоксираат“ од мобилните телефони.

„Одговорот беше многу позитивен“, рекла Лела, додавајќи дека 90 отсто од гостите одбрале да ги остават телефоните во замена за вино.

Таа вели дека е убаво да се видат луѓето како разговараат меѓу себе наместо да гледаат слики или да одговараат на пораки.

Ал Кондоминио верува дека е првиот ресторан во регионот Венето со новата иницијатива, иако ги има неколку, вклучувајќи го и оној во Тоскана кој на гостите им дава ваучери доколку ги остават своите мобилни телефони.

Италијанецот Тулио Масони произведува едно од најексклузивните вина во светот – но тој не сака никој да го пие. Претприемачот, колекционер на уметнички дела и поранешен инвестициски банкар го поседува, како што вели, најмалото лозје во светот. Сместено е на врвот на палата од 16 век во градот Реџо Емилија кој се наоѓа во сендвич помеѓу Парма и Модена, област што ѝ овозможи на Италија некои од нејзините најпознати извозни производи, вклучувајќи ги Ферари и Ламборџини, пршут ди Парма и рагу ала болоњезе, како и лазањи и тортелини.

Можете да го најдете лозјето на Тулио Масони на покривот на Виа Мари 10, што е и адреса и име на самото вино. Иако имал „вистинско“ лозје недалеку од градот, заклучил дека на него потрошил повеќе отколку што заработувал, па го продал. Како што изјавил за CNN, дваесет години подоцна се покајал и направил џебно лозје.

Во област со големина на гаража, односно на 18,5 квадратни метри, Тулио одгледува грозје од сортата Sangiovese за 29 шишиња годишно, кои се продаваат во уметничката галерија Bonsioni Arte, неколку улици подалеку, за неверојатни 5.000 евра.

„Моето вино е форма на уметничко изразување, филозофска провокација, нешто што треба да се чува во дневната соба за да можете да разговарате за тоа со вашите пријатели, да им кажете за лудиот кој изгради лозје на покривот“, рече Масони, кој го споредува неговото урбано лозје со тркалото од велосипедот на францускиот уметник Марсел Дишан – обично тркало што уметникот го поставил на стол во неговото студио во Париз во 1913 година, а набргу потоа ја дизајнирал познатата серија обични предмети претставени како уметност, наречена Редимејдс.
„Ако видите велосипедско тркало во дневната соба, а не во гаражата, ќе сфатите колку е убаво“, вели Масони. „Моето лозје е такво: неочекувано, го стимулира мозокот, поттикнува нови мисли. Виа Мари 10 е психо вино, масажер за мозокот, за нашата сива материја атрофирана од конвенциите и мисловните обрасци. Тоа е вино на жива креативност , симулакрум (копија без оригинал) на современите противречности на реалноста“, вели винарот.

Врската помеѓу виното и уметноста започнува со винова лоза која расте на решетките, дело на локалниот скулптор Оскар Акорси. Виното одлежува во уметнички дабови буриња на Лоренцо Меноци кои претставуваат маж и жена. Џузепе Камунколи, познатиот стрип уметник на Марвел, кој е роден во Реџо Емилија, ги потпишува етикетите на виното. Поради сето ова, Тулио ги охрабрува своите клиенти никогаш да не ги отвораат шишињата, туку да ги третираат како уметнички дела.

„Јас сум единствениот производител на вино во светот кој вели дека не треба да го пиете неговото вино“, вели тој.

Ако сте од оние што секогаш мора да имаат нешто за грицкање, ама сепак внимавате на тоа да консумирате здрава храна, сигурно не купувате чипс и смоки.

Ние најдовме еден рецепт кои си го прилагодивме по свое па добивме некоја малку поздрава верзија. Е сега крекериве се навистина заразни и иако се поздрави од купечките или од оние кои се прават во домашни услови но со други не толку здрави состојки, сепак не претерувајте, грицкајте со усул.

И не се секирајте, нема да се расипат од стоење. Ако не ги изедете набрзина, ќе ви траат навистина долго. И посни се. Односно, не содржат млечни производи.

Состојки:

500 г брашно (тука можете да си играте до бескрај, односно, да си изберете брашно по ваш вкус. Ние ги направивме со комбинација од бело, брашно од хељда и од лен)

200 мл бело вино

150 мл маслиново масло

1 лажичка сол

1 прашок за пециво

И потоа, сусам, сончоглед, чиа семе, афион, ама најмногу ким. Ние сончогледот и кимот на кратко ги блендираме, па ги додаваме во сувите состојки.

Приготвување:

Во сад ставете ги маслото, виното, солта, семките од сончоглед, сусамот, кимот и замешајте со лажица. Постепено мешајќи додадете го брашното. Замесете кратко со рака и на малку набрашнета површина растегнете го во тенка кора. Вадете форми со калапчиња или сечетe ленти или форми по ваш избор. Печете на 200 степени околу 10 минути.

Сè почнало како што обично почнува секоја добра приказна – случајно. Група љубители на пиво поминале една зимска вечер зборувајќи за квалитетот на пивото, за начините на кои тоа може дополнително да се облагороди, да се направи различно и посебно.

„Додека разговаравме за нашите идеи, мене и на мојот пријател Марио Радиќ Филиповиќ ни падна на памет „Дингач“. Зошто пивото да не одлежи во барик буре во кое претходно се чувало нашето врвно вино“, открива за хрватскиот портал „Слободна Далмација“, Здеслав Бензон, за кој велат дека е таму најдобар познавач на пивото меѓу лекарите и најдобар доктор меѓу познавачите на пивото.

Не поминало долго време од идеја до реализација. Контактирале со винарот Ивица Радовиќ од Пељешец. Го прашале дали ќе им помогне, тој се согласил и толку…

„Тука нема голема мудрост. Го преточив виното, го ставив празното буре во автомобилот и тргнав кон Сплит“, вели винарот, а потоа додава:

„Виното надвор, пивото внатре“. Темното пиво, кое го крстиле „Мрка“ е прво во светот соединето со „Дингач“.

Пивото има 7,5 отсто алкохол и 27 единици горчина.

Во бурето од 225 литри, колку што има сега и од ова пиво, кое е лимитирана серија, стареело осум месеци на околу 5 степени Целзиусови. Велат дека пивото што го добиле е нешто што е уникатно по вкус, мирис, арома и по самата хармонија и комбинацијата на Дингач и стаут пиво.

Производителите решиле да го спакуваат пивото во шишиња и да го продадат по промотивна цена, а секоја куна потоа да оди во Жупаниската лига за борба против ракот.

„Во процесот на подготовка на пивото било користено и чоколадото од Доминиканската Република, со 99 отсто какао, а за таа количина биле потрошени четири килограми“, открива познатиот хрватски производител на крафт чоколадо Маринко Бишкиќ..

Оние кои го пробале „хуманитарното пиво“ коментираат дека е нешто најдобро што пробале досега.

Понекогаш е полесно да направите набрзина нешто за грицкање отколку да трчате во продавница за да купите. Така е и со овие крекери кои толку лесно и брзо се прават што навистина нема потреба да излегувате за да купите нешто за гостите кои неочекувано ви се најавиле или пак за себе, ако сакате нешто да си грицнете.

Само да знаете дека ако ги правите, попаметно ви е веднаш да направите дупла доза. Или направете една пробна, а потоа ќе видите, сами ќе заклучите дека е најпаметно да ги дуплирате состојките.

Ако и не се изедат веднаш, зашто прилично брзо заситуваат, добро е што можат да стојат и подолго време. Само ставете ги во кутија, затворете ги и ќе имате грцки за цела недела..

Од состојки ви требаат само брашно, масло, бело вино и сол. И секако, семчиња по ваш избор.

Бидејќи секогаш гледаме да направиме нешто здраво, ние веднаш го изменивме рецептот па наместо само бело брашно, ставивме пола-пола, пола бело, пола интегрално, а наместо обичен индустриски зејтин, ставивме ладно цедено масло од сончоглед.

Можете да си играте со комбинирање на различни видови на брашно и сосема да го избегнете белото, можете да комбинирате и различно масло, но секако препорачуваме да биде ладно цедено. И најмногу избор имате со семките, сусам, ким, сончоглед, лен,…

Се прават многу брзо. Подгответе ги калапчињата со кои обично ги правите празничните колачи или вадете облици со обична стаклена чаша, сеедно.

Еве го и рецептот:

Состојки:

500 г брашно

1,5 лажичка сол

2 шолјички масло

3 филџанчиња бело вино (а може и обратно, 2 шолјички вино, а 3 масло, ама според нас, оваа комбинација е подобра)

50-100 г семки, што повеќе, толку подобро. Ако ставате семки од сончоглед, од тиква или од лен, малку смелете ги за да не бидат цели парчиња кои ќе ви пречат додека ги вадите формите.

Приготвување:

Замесете тесто од наведените состојки, вклучувајчи ги и семињата кои одат во тестото, па расукајте кора со дебелина колку прст или дури и потенка, во зависност од тоа далуи сакате покрцкави крекери кои и побрзо ќе се испечат или подебелки.

Редете ги врз хартија на плехот од шпоретот и печете ги на 200 степени околу 15 минути. Проверувајте ги одвреме навреме затоа што знаат за кратко да загорат.

Кога ќе се изладат префрлете ги во кутија со капак или во стаклен сад со капак и нека ви бидат при рака.

Секој кој некогаш требало да донесе вино за некоја вечера или да купи вино за своите пријатели кои се љубители на добра капка, знае дека светот на виното е полн со можности и стилови. Сепак, опишувањето на виното не е едноставно, ниту е лесно да се дефинираат неговите карактеристики, па секој треба да знае некои основни термини за вино. Бидејќи, како и секоја страст или хоби, учењето за виното нуди нов свет полн со убави искуства. Особено сега, во пресрет на уште едно убаво винско искуство кое не очекува во Битола – SLOW WINE 2022, вински салон Битола.

Салонот има за цел да ги презентира и промовира производителите на вино, кои ќе ни ги презентираат нивните вински приказни и ќе ни понудат на дегустација вина направени во мали семејни винарии, вина направени со вистинска страст.  На ова издание на винскиот салон „Slow Wine салон 2022“ ќе се дегустираат над 200 етикети на вино и дестилати, како и бројни деликатесни производи..

„Не си бил во Битола, ако не си прошетал на Широк сокак. Не го познаваш македонското вино ако не си ги запознал малите семејни винарии. Оваа променада од архитектура, луѓе и убавина е како новиот бран на винари кои ќе го исполнат нашиот салон со позитивна енергија и вкусови“, велат организаторите.

Доброто вино ја зачинува речиси секоја прослава и дружење, а уживањето во вино и друштво е одличен начин за истражување на вкусовите и стиловите додека комуницирате со пријателите. Секако, подоброто познавање на виното го олеснува купувањето, а знаењето за виното го отвора патот за развој на сетилото за вкус и мирис. Ако развиете свесност за тоа што пиете, ќе ви биде полесно да најдете слични вина и да разберете зошто виното варира по регион, година и некои други фактори.
И конечно, учењето за виното може да биде личен предизвик и извор на задоволство. Можноста за постојана потрага по вкусни вина е задоволство, како за вас, така и за многу други луѓе со кои ја споделувате љубовта кон виното.

Мал речник со термини за вино што секој треба да ги знае

Алкохол: тој е природен нуспроизвод на процесот на ферментација, дава чувство на сладост за да се балансираат киселините и танините во виното.

Барик: име за дрвени буриња со различни волумени, обично 225 л, во кои се произведува вино по истоимената постапка. Со одлежување на виното во овие буриња, во него се случуваат сложени процеси на естерификација и екстракција на танински и ванилински материи од дрвото и оксидација.

Буке: ова се сите оние мирисни состојки во виното што ги чувствуваме со сетилото за мирис. На пример, грозјето има примарен мирис, но има и други мириси, како земја, сено, овошје, ароматични билки… Со оглед на тоа што дел од мирисот исчезнува при ферментација, терминот арома се користи за млади вина, а буке за постарите.

Дегустација на вино: Колку и да им завидуваме на сомелиерите за нивната вештина, дегустацијата подразбира големо знаење за правилно да се оцени виното – од познавање на сорти, различни ароми и вкусови до професионален опис на виното.

Декантирање на виното: тоа е процес на внимателно преточување на виното во сад за да се отстрани талогот (вински каменец) и да се овозможи виното да има подолг контакт со кислород пред консумацијата, со цел подобро да се развијат аромите.

Десертни вина: исто како што кажува нивното име, тие се слатки и се пијат после оброк. Во нив се додава алкохол (најчесто бренди) за да се задржи нивото на природни шеќери кои се користат за време на процесот на ферментација.

Хармонично вино: тоа е добро избалансирано, хармонично вино во кое сите основни карактеристики се избалансирани, па ниту една не се истакнува.

Карактерно вино: се однесува на карактеристиките на поднебјето од кое доаѓа, бидејќи секое има одредени специфичности.

Лесно вино: она со ниска концентрација на танини и помал процент на алкохол, питко и со пониски енергетски вредности во споредба со тешките вина.

Младо вино: не поминало низ целосна технолошка обработка, туку само делумна или цела ферментација, поради што се нарекува младо.

Органско вино: многу популарно во последниве години и означува вино направено од грозје одгледувано без вештачки адитиви за одржување на квалитетен род.

Пенливи вина: се карактеризираат со значително влијание на карбонизацијата, која се јавува како природен дел од ферментацијата. Имено, по ферментацијата, во виното се додава јаглерод диоксид, а нивото на карбонизација може да се види на етикетата на која пишува дали виното е слатко или суво.

Трпезно или лесно вино: без разлика дали е црвено, бело или розе, тоа се вина кои имаат содржина на алкохол од 14 проценти.

Слаткост: шеќерот природно се наоѓа во грозјето, што ја зголемува тежината и јачината на вкусот и на тој начин ја одредува текстурата на виното.

Танини: фенолни соединенија што се наоѓаат во кората, лисјата, семето и лушпата на грозјето. Иако најчесто се поврзуваат со црвените вина, може да се изразат и во некои бели вина, обично оние кои се мацерирани и оние кои созреале некое време во дабово буре.

Популарни бели вина

Шардоне: има овошен, малку масен, кадифен вкус кој не е типичен за сувите вина.

Мускат: вино со овошен вкус, многу често е и доста слатко.

Пино Гриџо: има едноставен, лесен, сув и киселкаст вкус.

Ризлинг: главно сладок, со интензивен овошен вкус.

Совињон бланк: има сув и киселкаст вкус, со ароми на билки и тропско овошје.

Популарни црвени вина

Каберне Совињон: карактеристично тешко црвено вино со примеси на билки.

Мерло: има овошен вкус, но во него се чувствуваат и зачини. Сепак, полесно е и со помалку танини од Каберне Совињон.

Пино ноар: деликатно и свежо вино, со помал процент од танини со овошни ароми.

Станушина – автохтон вид на грозје кое се одгледува само во Македонија. Погоден за производство на многу квалитетни вина.