Уметниците готват!

0
796

Традиционалната  интернационална уметничка резиденција „Арт Поинт – Гумно“ во Слоештица во организација на уметникот Сергеј Андреевски, годинава се одржа од 10 до 31.. јули, со делумна поддршка од Министерството за култура.

Овојпат, куриозитет беше тоа што „Арт Поинт – Гумно“ одлучи да покани две уметнички двојки што годинава прославуваат 3 години заедничко живеење и креирање: Мејси Ларгадо Ротман и Кристијан Ротман од Берлин, Германија и Ева Мајер и Арон Мајорош од Будимпешта, Унгарија.

„Освен што создадоа дела со оригинален авторски печат, нашите гости покажаа дека се уметници и во кујната! Во ова имаа можност да се уверат и гостите што на 22. јули го посетија Отвореното студио во Слоештица, настан што традиционално го организираме при крајот на престојот на уметниците, кога ги изложуваме нивните дела за пошироката јавност„, вели Ирена Андреевска, коорганизатор на настанот.

Годинава, над 80 посетители се прошетаа низ гумното, ги видоа креациите на уметниците, но и на децата (Мејси Ларгадо Ротман реализираше неколку креативни работилници со најмладите жители и посетители на Слоештица), уживаа во амбиентот кадешто се чини дека времето застанало, разговараа со уметниците и ги вкусија и нивните кулинарски креации.

Рецепти од уметниците:

Мејси Ларгадо и Кристијан Ротман

Мејси Ларгадо Ротман, Филипини

Пилешко кари

Состојки:

2кг. пилешко месо

1 конзерва кокосово млеко (420 мл.)

1 чаша (околу 240 мл.) млеко

½ чаша ситно сецкан ѓумбир

1 средно голема главичка кромид

6 големи чешниња лук

2-3 моркови (сечкани на тркалца или на коцки)

2 тиквички

3 лажици црвено кари во прав

1 китка свеж коријандер (исечкан)

½ стебленце лимонска трева (сечкана или толчена)

масло и сол по потреба

Подготовка на пилешкото кари

Приготвување:

  1. Одвоено се пропржува зеленчукот со еден дел од лукот и ѓумбирот, да биде полу-зготвено.

2. Вториот дел од лукот и ѓумбирот се динстаат со кромидот додека не се карамелизираат. На ова се додава црвеното кари, се пржат заедно 1 минута и се додава пилешкото месо исечкано на коцки од 1,5-2 цм. Се пржи на средно јак оган 2-3 минути и се додава кокосовото млеко и млекото (количината ја прилагодуваме според вкусот!).

3. После 5 минути, се додаваат претходно пропржените зеленчуци и лимоновата трева. Сè заедно се динста уште неколку минути. Доколку е потребно, може да се додаде малку вода.

4. На вака подготвеното јадење, одозгора му се додава свежо сечкан коријандер или магдонос.

Напомена: во недостаток на црвено кари, ние употребивме класично, жолто кари во прав, а наместо коријандер, ставивме магдонос!

Пилешкото кари е готово!

(Мејси Ларгадо Ротман потекнува од Миндоро, Филипини кадешто дизајнирала уметнички разгледници со традиционални фолклорни мотиви. Од 2014-тата живее во Берлин кадешто честопати асистира при изведбата на инсталации/скулптури на отворено на нејзиниот сопруг. Коавтор е на книгата „Птицата Лили“ чија цел е да им ја приближи германската култура на мигрантите.)

(Кристијан Ротман е уметник со огромен творечки опус. Препознатлив е по виножитниот колорит што вреска од неговите дела и тежнее да се стопи со динамиката од надворешниот свет. Со своите фотопроекти („Ти и јас“, „Мајки и ќерки“ и др.) Ротман постојано патува низ светот. Застапен е во повеќе колекции, од Германија до Јапонија.)

Коцки од бел кокосов пудинг (Maja Blanca)

Состојки:

1 чаша (околу 240 мл.) пченкарно брашно

1 чаша кокосово млеко

1 чаша млеко

½ чаша шеќер

сол (на врв на ножот)

пропржено кокосово брашно за декорирање (се пржи без масло!)

Приготвување:

Во тенџере на тивок оган го ставаме кокосовото млеко, шеќерот и солта да се стопат. Мешавината се вари околу 8 минути. На страна, во посебен сад ги мешаме брашното и ладното млеко. Ги додаваме во смесата со кокос. Се заедно се вари на тивок оган околу 30-45 минути. Откако ќе се свари, се става во сад и се поросува со пржен кокос.

Оладено, се сече на коцки и се сервира.

МАЈОРОШ ГУЛАШ 

Мајорош готви гулаш

Состојки:

4кг. свинско месо од заден бут

3-4 кг. ситно сечкан кромид

1 исечкана, средно голема главичка лук

2- 3 средно големи моркови

1 средно голем корен од целер

100 – 150 г мелен црвен пипер

3 дл. црвено вино

1 филџанче винска киселина

3-4 листови ловор

1 лажичка Хабанеро (лут сос од пиперчиња)

масло, свинска маст, сол, црн пипер, мајоран

Ева и Арон: Готвиме заедно под акварелите на Ротман

Приготвување:

Во голем котел за гулаш (ова е идеално за подготовка на вака голема количина гулаш, но дозата може да се намали и да се готви во поголемо тенџере на шпорет) се загрева маслото со маста. Се пржи кромидот додека не омекне. Потоа се додава лукот со морковите и целерот сецкани на коцкички.  Се пропржува 10-тина минути и потоа се додава месото сечено на коцки од околу 2×2 см. заедно со црвениот пипер. Убаво се меша и постепено се додаваат црвеното вино,  киселинатаи ловоровите листови. По желба, може да се додаде и малку вода (Арон не додава, го прави гулашот погуст!). Откако ќе почне да врие смесата со виното, се додава сосот од лути пиперчиња, сол и бибер. Постојано се меша најмалку  1 час на средно јак оган, се додека не омекне месото. Пред крај, се додава мајоран по вкус.

Напомена: Наместо свинско, може да употребите јунешко месо. Имајте предвид дека во тој случај, готвењето ќе биде најмалку 1 час подолго!

Количината дадена во рецептот е доволна за 20-тина гости!

Бубланина (типичен Словачки/Чешки десерт)

Состојки:

3 јајца на собна температура

200 г шеќер во прав

1 кесичка ванилин шеќер

1 дл. масло

2 дл. млеко

300 г брашно

1 кесичка прашок за пециво

½ кг. сезонско овошје

Ева Мајер: Повелете на бубланина

Приготвување:

  1. Се матат жолчките, шеќерот, ванилиниот шеќер и маслото се додека не се добие изедначена смеса. Се додаваат млекото и брашното, помешано со прашокот за пециво. Повторно убаво се мати.

2. Одвоено, се бијат белките додека не се добие цврста и сјајна пена. Ова се додава во претходно подготвената смеса, убаво се меша да се изедначи текстурата. Оваа смеса се става во подмачкан плех и се реди со овошје.

(Ева употреби боровинки што локалните жители ги набрале на Плакенска Планина).

3. Се пече во претходно загреана рерна на 180°С, 30 – 40 минути. Откако ќе се олади, по желба, може да се нароси со шеќер во прав. Оваа беше превкусна и без додаден шеќер!

(Арон Золт Мајорош е уште едно од звучните имиња не само на уметничката сцена на Унгарија, кадешто ги има освоено сите позначајни национални признанија. Неговите до беспрекорност изработени скулптури што се дел од национални и приватни колекции во Унгарија, Шпанија, Турција и Мексико го привлекуваат вниманието на неколку високо рангирани светски галерии.)

(Ева Мајер е најмладиот добитник на престижната Унгарска државна награда за уметност Мункачи (во 2013.година). Таа е графичар и сликар што често експериментира комбинирајќи повеќе техники. Во нејзиното творештво доминира духовнста со интегрирани религиозни елементи. Мајер е основач и организатор на реномираниот симпозиум за уметност ДунАрт во Шаморин, Словачка.)

Џин-тоникот на Мејси

Во овој пијалак домаќините и гостите уживале пред главниот оброк, секој ден, без исклучок!

За 1 чаша (од 2,5 дл) потребно е:

1 ракиена чашка квалитетен џин

1 ракиена чашка Спрајт

1 ракиена чашка сируп од нане – не е задолжително (во Арт Поинт – Гумно, редовно го имаат и од него приготвуваат ладен чај)

Тоник

¼ лимета (пред да се стави парчето во чашата, се истискува сокот во течноста)

неколку коцки мраз – задолжително

НАЗДРАВЈЕ!