Лесно е да направите свој протеински прав. Ви требаат чиа, коноп и семки од тиква – кои нудат протеини од растителна основа. Брзо се прави такашто можете да го прескокнете купувањето на оние огромни кутии купечки протеински прав кои ниту се вкусни, ниту пак се евтини.

Овој протеински прав одлично ќе се вклопи во вашето омилено смути или чиа пудинг, а може да се користи и во печива како мафини или леб.

Еве неколку совети од кујната на EatingWell.

Ова се клучните совети што ги научивме додека го развивавме и тестиравме овој рецепт во нашата тест-кујна за да се осигураме дека функционира, дека има одличен вкус и дека ќе биде добар и за вас, пишува EatingWell!

За најдобра текстура на протеинскиот прав, препорачуваат да користите мелница за зачини. Иако тоа значи дека се работи со помали количини, дава многу пофин резултат отколку што може да даде блендерот. Имено, тој може да ги претвори семките во путер наместо во прав.
Но ако сепак сакате да користите блендер со голема брзина, внимавајте да не мешате премногу.

Нутритивни белешки
Семето од коноп е комплетен извор на протеини од растително потекло, бидејќи ги обезбедува деветте есенцијални аминокиселини што нашите тела не можат да ги произведат. Овие аминокиселини поддржуваат многу функции, вклучувајќи обновување на клетките и раст на мускулите. Може да помогне и во намалувањето на воспалението, бидејќи семето од коноп содржи омега-3 и омега-6 масни киселини, кои помагаат во регулирањето на воспалението во телото.

Чиа семето содржи комбинација од влакна, пребиотици, антиоксиданти и омега-3, а сите можат да го подобрат здравјето на цревата бидејќи го поттикнуваат растот на здрави бактерии. Ова семе исто така содржи протеини, железо и калциум, хранливи материи кои луѓето што следат веганска или вегетаријанска исхрана можеби не ги внесуваат доволно, па затоа додавањето повеќе чиа семе во исхраната може да биде корисно.

Семките од тиква се едни од најдобрите семиња за јадење ако сакате да додадете повеќе протеини во вашата исхрана. Порција од 250 грама нуди 8 грама протеини и околу 14% од дневната вредност на железо.

Јадењето доволно протеини е од суштинско значење, бидејќи поддржува многу телесни процеси, вклучувајќи го варењето и здравјето на коските, додека железото игра важна улога во производството на енергија и имунитетот.

Порција од овој домашен протеински прав обезбедува 7 грама протеини, што е приближно исто како големо јајце (6 грама), 1/2 шолја грав (8 грама) или порција деликатесно месо (7 грама). Стандардните протеински прашоци нудат повеќе протеини по порција, во опсег помеѓу 20-25 грама. Но, еве зошто е добра оваа домашна опција:

Направена е со состојки што веројатно веќе ги имате во вашата остава.
Не треба да се трошите на гломазна скапа кутија со протеински прашок, само за да откриете дека не ви се допаѓа.
Иако алтернативите на шеќер се безбедни за употреба, тие можат да имаат многу сладок вкус и посебен вкус што може да преовладува и да биде многу силен.
Бидејќи е направена со семки, добивате дополнителен бонус од здрави антиинфламаторни масти, плус обилна порција влакна – што нема да ги добиете од купен протеински прашок од продавница. Комбинацијата од протеини, масти и влакна во овој домашен протеински прашок ви помага да се чувствувате сити подолго време по оброкот и ги стабилизира нивоата на шеќер во крвта за долготрајна енергија.

Состојки:
1 шолја чиа семе

1 шолја семе од коноп

¼ шолја сирови семки од тиква

Приготвување:
Ставете ¼ шолја чиа, ¼ шолја коноп и ¼ шолја семки од тиква во мелница за зачини (или за кафе). Пулсирајте додека не добиете ситно сомелен прав (околу 10 пулсирања).

Префрлете во сад.

Повторете го истото со остатокот. Промешајте за да се соедини.

(Алтернативно, пулсирајте ги сите состојки заедно во блендер со голема брзина додека не се сомелат фино, околу 15 пулсации (1 секунда), повремено запирајќи за да ја изгребете смесата од семки од дното на блендерот.)

Мешавината можете да ја чувате во херметички затворен сад до 2 недели или во фрижидер до 2 месеци.

Пченката била припитомена во Мексико пред околу 8.000 години од дива трева која речиси воопшто не личи на неа. Една од првите сорти била токму таа од која се прават пуканките.

Постојат неколку теории за тоа како настанале пуканките, а некои од нив ќе ги споделиме со вас во продолжение.

Една од најпопуларните теории е дека пуканките биле откриени случајно пред неколку стотици години, кога домородците во Јужна Америка користеле пченка за храна. Легендата вели дека некои домородци оставиле пченка на оган, а зрната експлодирале и се претвориле во она што денес го нарекуваме пуканки.

Друга популарна теорија е дека пуканките биле откриени од американските Индијанци во 16 век. Тие наводно користеле пченка за правење погачи, а кога зрната биле преголеми ги фрлале во оган. Така пченката би се претворила во снегулки кои потоа се собирале на дното на тавата во која се печела погачата.

Сепак, останува прашањето: кога и како пуканките станаа глобално популарни?

За популарноста на пуканките е веројатно одговорна Америка, а станале омилена закуска на крајот на 19 век поради мобилноста. Имено, тогаш биле направени првите парни машини за правење пуканки на улица и станале составен дел на саемите и циркусите, но биле забранети во театрите, а подоцна и во кината.

Според легендата, Големата депресија од 1929 година имала огромно влијание врз нивната популарност на почетокот на 20 век.

Имено, во текот на 1930-тите, луѓето биле сиромашни и не можеле да си дозволат скапа храна во кината, па пуканките станале евтина алтернатива. На сопствениците на кино салите не им требало долго да го сфатат тоа и брзо ги вклучиле во својата понуда.

Како закуска која лесно се подготвува и складира, со карактеристичен мирис кој никого не остава рамнодушен, пуканките брзо ги преплавиле кино салите ширум Америка.

Кинематографите развиле машини за пуканки кои брзо и ефикасно ќе произведуваат големи количини од ова солено задоволство. Од тогаш до денес, пуканките станаа незаменлив дел од кино искуството. Со текот на годините, тие доаѓаат во различни вкусови, но една работа остана иста – сè уште се омилена закуска во кино салите и домаќинствата ширум светот.

Пуканките и денес носат значителни приходи во кината бидејќи пченката е евтина, а оваа закуска лесно се подготвува. Плус, можете да ги добиете свежо подготвени и топли многу брзо непосредно пред филмот.

Психолозите велат дека ги сакаме пуканките затоа што нивното крцкање ни носи задоволство додека грицкаме, но и затоа што вкусот и мирисот на оваа закуска будат носталгија и убави спомени, со оглед на тоа што е дел од многу убави моменти во нашите животи. Меѓу другото, веројатно сме ги грицкале додека сме го гледале омилениот филм.

Сепак, кај нас, многу пред пуканките, во кино се јадеа семки и сончоглед. Главниот проблем беше што откако ќе се запалеа светлата, целата сала беше полна со лушпи.

Ви пренесувамe интересен, а пред се, лесен и брз рецепт за леб. Брз во однос на работата околу него, сè друго го одработуваат времето и чекањето. Во лебот оди значителна количина темно пиво, а тоа во финалниот вкус многу добро се чувствува. Можете да користите и светло пиво, а вкусот на самиот леб ќе варира во зависност од пивото.

Но секако станува збор за многу интересна, по малку горчлива аромати и богат вкус, а за дополнително крцкање додадете сечкани ореви, сусам и овес.

Лебот, ако добро го чувате, останува свеж и мек неколку дена, а може и да се замрзне.

Состојки:
500 гр интегрално брашно
400 мл темно пиво
50 мл маслиново масло
2 лажички сув квасец
1 рака сечкани ореви
2 супени лажици овесни снегулки
2 супени лажици сусам (мешавина од црн и бел)
прстофат сол
1 лажица маслиново масло за премачкување.

Приготвување:
Сувиот квасец измешајте го со пивото, а солта со брашното, семките, овесните снегулки и оревите. Можете да оставите дел од оревите и семките за последното поросување, но не мора.
Додадете ги сувите состојки на влажните и прелијте со маслиновото масло. Сè убаво измешајте и месете околу 10 минути.
Формирајте топка, покријте ја и оставете ја на топло место околу 40 минути да нарасне.
После тоа, повторно измесете и повторно формирајте топка, покријте ја и оставете ја повторно да нарасне 40 минути.
Потоа обликувајте го лебот, намачкајте го со маслиново масло и поросете со семки, ореви или со што сакате. Покријте и оставете го да отстои околу 60 минути.
Печете околу 30 минути на 200 °C.
Кога ќе го извадите од рерна, малку попрскајте го со вода и оставете го да се излади.

Семињата се вистинска ризница на хранливи материи кои се навистина корисни за целокупното здравје. Ленот, тиквата, сончогледот и сусамот се одличен извор на диетални влакна, витамин Е и незаситени масни киселини.

Овие здрави семиња се извор на протеини и многу минерали, од кои најважен е цинкот. Спречуваат појава на срцеви заболувања, таложење на штетен холестерол и помагаат во регулирање на телесната тежина.

Семки од тиква
Научните студии покажаа дека овие семки содржат антиоксиданти кои значително го зајакнуваат нашиот имунолошки систем.

Семките од тиква содржат и омега 3 масни киселини кои ги намалуваат воспалителните реакции во нашето тело, и го намалуваат ризикот од отекување на зглобовите и остеопороза. Една рака семки како ужина може да ви обезбеди голем број добри состојки, како што се омега-3 масни киселини и фитостероли, кои помагаат при високиот холестерол.

Семките од тиква содржат висок процент на цинк, кој го намалува ризикот од вирусни инфекции, како настинка и грип, и го подобрува здравјето на простатата, а исто така е корисен за здравјето на кожата, за јајниците и за раст на косата. Затоа можат да бидат одлична замена за грицките. Тие дејствуваат како антиоксидант и имаат антимикробно дејство, што е корисно за здравјето на цревата. Богати се со железо, цинк, фосфор, омега 3 масти, киселини и витамин А…

Семки од сончоглед
Овие семки се совршени за сите оние кои сакаат да ослабат, поради содржината на големо количество влакна кои го регулираат варењето. Богати се со витамин Е, кој е добар за нашата кожа и коса и минерали селен и бакар, кои не штитат од болести на крвните садови и срцето.

Сусам
Придобивките од ова семе се познати илјадници години. Сусамот е богат со калциум, магнезиум, витамин Б1 и фосфор. Истражувањата покажаа дека многу ефикасно го намалува крвниот притисок на природен начин и го штити црниот дроб од оштетување. Сусамот е богат со растителни влакна, кои се познати по позитивното влијание на варењето, а редовното консумирање спречува запек и слични здравствени проблеми. Сусамот можете да го употребите така што ќе ја попрскате салатата со една лажица сусам или ќе ставите од нив врз зеленчукот сварен на пареа. Можете исто така да го ставите во смути или едноставно да го измешате во чаша јогурт и да го испиете.

Ленено семе
Ова семе слободно можеме да го наречеме лек. Освен што се многу вкусни, семките од лен се богати со есенцијални масни киселини, кои се одлични за нашето здравје и организмот не може сам да го создаде, туку се внесува само преку храната. Улогата на оваа киселина во безбедно спречување на срцев удар е научно докажана. Посебна предност на ленот е тоа што содржи голем процент на лигнин. Во истражувањето се покажало дека лигнините се корисни за намалување на ризикот од рак на дојка и јајници, бидејќи ја намалуваат активноста на естрогенот, главниот женски полов хормон – потенцијален поттикнувач на малигнен раст.

Чиа семе
Чии семето е богато со протеини и значително го подобрува варењето. Натопените чиа семиња го забавуваат варењето на метаболизмот и ве прават сити подолго време. Истовремено го спречуваат зголемувањето на крвниот притисок и го намалуваат лошиот холестерол, а поради високата содржина на вода дополнително го хидрираат организмот.

Продавам семкиииии, ајде, семки, продавам семки. Памтите ли дека порано се продаваа на улица директно од кошница полна со семки од сончоглед, од тиква и кикиритки?

Само што тогаш сите грицкавме од досада, а не зашто знаевме дека се здрави.

Со испитувањата утврдени се повеќе придобивки за здравјето на човекот, па така сега освен што ги грицкаме, ги додаваме семките во салати, печива и во други јадења. А за што се добро конкретно семките од тиква прочитајте подолу. Имаме и инструкции за тоа како самите дома да си испечете семки.

1. Го намалуваат шеќерот во крвта
Семките од тиква содржат незаситени масни киселини кои се корисни за регулирање на нивото на шеќер во крвта, па затоа се препорачуваат како корисна храна за луѓето кои страдаат од дијабетес.

2. Чувари на срцето
Истражувањата покажаа дека семките од тиква го намалуваат нивото на лош холестерол, го намалуваат ризикот од згрутчување на крвта и штитат од срцеви заболувања и болести на кардиоваскуларниот систем.

3. Заситуваат и го стимулираат варењето
Сто грама семки од тиква содржат дури 19 грама протеини. Тие се наметнуваат како одлична храна за луѓето кои не јадат храна од животинско потекло, но и за сите оние кои сакаат да грицкаат нешто здраво. Покрај тоа, содржат диетални влакна, кои го стимулираат варењето.

4. Зачувајте го здравјето на коските
Семките од тиква се одличен извор на цинк, потребен за изградба на коските. Само 30 грама од овие семки исполнуваат приближно една петтина од дневните потреби за овој минерал.

5. Антивоспалително дејство
Семките од тиква содржат соединенија кои имаат антиинфламаторно дејство. Затоа се препорачуваат за луѓе кои имаат артритис, но исто така се сметаат за добра превенција против некои видови на рак. Згора на тоа, докажано е дека го подобруваат расположението.

Како да се подготват семки од тиква?

Извадете ги семките од тиквата, измијте ги во вода и исушете ги со крпа. Ставете ги врз хартија за печење, а потоа пикнете ја тепсијата во рерна и оставете ги да се сушат на 120 Целзиусови степени околу 15 до 20 минути.

Можеби спанаќот и не содржи толку железо колку што мислевме, ама тоа не значи дека не е здрав. Напротив, спанаќот е одличен извор на витамини и минерали, богат е со каротеноиди, кои телото може да ги претвори во витамин А. Содржи витамин Ц кој е моќен антиоксидант кој го зајакнува имунолошкиот систем и позитивно влијае на кожата, витамин К кој е од суштинско значење за згрутчување на крвта, фолна киселина, позната и како витамин Б9 или фолат, витамин кој е од суштинско значење за нормална клеточна функција и раст на ткивата и е многу потребен во текот на бременоста. Секако, содржи и железо кое помага да се создаде хемоглобин, кој носи кислород до ткивата на телото, како и калциум кој е многу важен минерал за оддржување на здравјето на коските. Спанаќот исто така содржи и други витамини и минерали, како што се калиум, магнезиум, витамин Б6 и витамин Е, но во помали количини.

Затоа, ако сфатите дека сте купиле премногу и дека нема да можете да го изедете за еден ручек, не го правете цел, но и не дозволувајте да овене. Измијте го убаво и направете песто.

Освен спанаќ ви треба и свежо цеден сок од лимон, маслиново масло, сол и црн пипер. Ако не посите додадете и пармезан. За подобар вкус, ако не ставате пармезан, заедно со спанаќот ставете во блендерот и семки д сончоглед и од тиква. Ќе придонесат да се зголемат здравствените придобивки на ова песто, а ќе го збогатат и вкусот. Можете да поросите одозгора и со цели семки.

Јадете го намачкано на интегрално лепче или пак со салата од компири.