Кој си е мераклија и во Америка прави зимница: Од ајвар до печи-гмечи и кисела туршија

Иако има 68 години, а изгледа како да има најмногу 58, Македонката Аница Клокановски која пола век живее во Америка, својата Фејсбук страница и јутјуб канал на кој приготвува македонски рецепти, ја нарекла токму Baba Ance’s Kitchen. И додека многу жени избегнуваат да се нарекуваат себеси баби, госпоѓа Аница нема таков проблем бидејќи, како што вели, навистина е баба и оваа „титула ја оправдува дури 4 пати, а „титулата“ прабаба, засега само еднаш. Таа не се откажува од традицијата и готви по рецептите на својата мајка, а не се откажува ниту од правењето зимници, исто како да е во родното село Наколец, во Преспа од каде што заминала на свои 16 години.

Прво родителите ја испратиле кај вујко ѝ, кој живеел во Виндзор, Канада, а веќе на 17 години се омажила и се преселила во Детроит, во Америка. Минатата година прославила и златна свадба, осносно, 50 години во брак со својот Илија.

Фејсбук-групата каде што ги споделува своите рецепти ја отворила минатата година и таму доминираат старинските македонски рецепти, научени од нејзината мајка. Признава дека до денес со „старата мајка“ се консултира за гастрономијата и дека сè уште учи од неа.

Баба Анче ги запознава Американците со голем број традиционални македонски јадења, а прави и зимници па секоја година во ова време од нивниот дом во Детроит се шири и мирисот на печени пиперки и ајвар. Но тоа не е единствената зимница што ја прави.

„Потребно е долго време за да се направи, но вреди зашто е навистина многу вкусен.
Може да се купи и готов во македонските продавници, но не е ништо подобро од домашниот што ќе го направите сами. Годинава јас направив ајвар од 40 кг пиперки. Пола направив со модар патлиџан, а половина само со пиперки“, вели баба Анче во видеото.

Баба Анче го споделува и рецептот за „печи-гмечи“, како и оној за кисела туршија.

Со оглед на количината и на видовите на зимница што ги прави, претпоставуваме дека ќе има доволно за сите нејзини деца, внуци и правнуци.