Светски познатиот готвач Нусрет Гокче славата ја стекна благодарение на Митко Муриќ од Рожаје.
Митко Муриќ (Митхат Ердем), по потекло од Јабланица кај Рожаје во Црна Гора, денес е успешен бизнисмен, а својата кариера ја започнал во Истанбул, каде што пристигнал кога имал само шест години. Како млад човек работел во Капаличаршија, каде што го стекнал своето прво искуство.
Иако не завршил училиште, успеал да го започне својот бренд „Vento Milano“, со кој учествувал на бројни модни ревии низ целиот свет. Тој останал во текстилната индустрија цели 25 години, објавува „Фокус Прес“.
Пресврт на неговиот пат се случил во 2010 година, кога го запознал тогаш непознатиот готвач и месар Нусрет Гокчке и го препознал неговиот потенцијал.
Нусрет Гокче, познат низ целиот свет како „Кралот на солта“ („Salt Bae“), стана глобална сензација поради неговиот карактеристичен начин на сервирање месо и солење на храната.
Благодарение на Муриќ, станал светски познат
Нусрет е роден во 1983 година во турскиот град Ерзурум, во сиромашно семејство. На само 14-годишна возраст, тој почнал да работи како месар, покажувајќи голема страст за готвење. Од 2007 до 2010 година, работел вредно како волонтер во бројни ресторани низ Аргентина и САД, стекнувајќи скапоцено искуство во подготовката на месо.
По тримесечен престој во САД, животот на Нусрет драматично се променил кога го контактирал Муриќ. Овој клучен повик го означил почетокот на деловно партнерство кое ќе прерасне во кулинарска империја.
Муриќ му понудил партнерство и финансиска поддршка од еден милион евра. Токму оваа инвестиција довела до отворањето на првиот ресторан „Нуср-ер“ во Истанбул, кој денес стана глобален феномен. Брендот моментално се проценува на 1,3 милијарди долари.
Уникатната личност на Нусрет и неговиот препознатлив гест на солење го претворија во интернет сензација, привлекувајќи бројни светски ѕвезди во неговите ресторани.
Бројни контроверзии околу Нусрет
Сепак, успехот не е без контроверзии. Неговите ресторани често се критикувани за нивните „непристојни“ цени, а Нусрет предизвика неодобрување со своето однесување за време на прославата на Аргентина на Светското првенство во 2022 година, кога им додеваше на играчите, им го земаше трофејот и ја претвори нивната прослава во свое шоу, пишува sandzacke.rs.
Дополнително, во 2021 година, Нусрет ги нарече своите деловни партнери „предавници“ и „непријатни партнери“ на социјалните мрежи, без јасно да ги објасни своите обвинувања. Во исто време, почнаа да се појавуваат извештаи за можна продажба на уделот во компанијата.
Да ве потсетиме, еден стек во неговиот ресторан чини 20 евра, но ако тој лично ви го исече, цената може да достигне и до 800 евра.
Триото зад империјата Нуср-Ет
Иако Нусрет е лицето на брендот и личноста што привлекува најголемо внимание, сопственоста на синџирот ексклузивни ресторани Нуср-Ет е поделена помеѓу три деловни партнери:
Нусрет Гокче поседува 25 проценти од акциите
Митхат Ердем (Митко Муриќ) има 35 проценти
Ферит Шаченк, претседател на турската групација Догуш, поседува 40 отсто од акциите
Ветувањето е исполнето
Кога Митко Муриќ решил да инвестира во Нусрет, тој му ветил дека ќе постигне таков успех што ќе мора да купи машина за броење пари. Судејќи според моменталниот статус и вредноста на синџирот Нуср-Ет, тоа ветување е далеку надминато.
Додека Нусрет продолжува да привлекува внимание со својот препознатлив стил и со појавувања со познати личности, неговите двајца деловни партнери, вклучувајќи го и човекот од Јабланица, уживаат во плодовите на нивната инвестиција зад сцената – далеку од очите на јавноста, но со значителен удел во еден од најпрепознатливите кулинарски брендови денес.