Цикоријата го регулира шеќерот во крвта, го поттикнува слабеењето и дава чувство на ситост
Нашите претци ја користеле како кафе, во време кога до вистинско кафе потешко се доаѓало. Дури и кога имале кафе, го мешале со цикорија за да им трае подолго. Сега знаеме дека цикоријата е и исклучително здрава
Ние најчесто ја сметаме за прекрасен плевел, меѓутоа, ова моќно растение со сино-виолетови цветови нуди многу повеќе. Неговата улога во секојдневниот живот, а особено во минатото, била многу позначајна. Распространет е речиси насекаде: покрај патиштата, на ливадите и пасиштата, а некогаш се одгледувало како замена за кафето, особено во време на војна и сиромаштија. Со печење и сушење на корените на растението цикорија, богато со инулин и растителни протеини, се добива напиток со вкус и боја слична на кафето, познат како „воено кафе“ или „кафе за сиромашни“. Денес, цикоријата (Cichorium intybus), е сè повеќе ценета поради своите лековити својства.
Ја стимулира работата на бубрезите и слезината
Исто така, цикоријата е богата со бројни минерали, како што се железо, калиум и калциум, и се карактеризира со исклучително висока содржина на витамин Ц и бета-каротен. Има многу корисен ефект врз варењето на храната и, за разлика од некои други видови зеленчук, не предизвикува надуеност, туку, напротив, има смирувачки ефект врз дигестивниот систем бидејќи е многу лесна за варење. Го поттикнува поминувањето на содржината низ цревата и спречува запек. Цикоријата е растение кое често се користи во традиционалната кинеска медицина поради нејзиното лековито дејство врз бубрезите и слезината. Ја стимулира нивната работа и помага во чистењето на телото од токсини, а е и одличен диуретик.
Предијабетес и дијабетес тип 2
Споменатиот инулин што се наоѓа во коренот на цикоријата може да ја поддржи контролата на шеќерот во крвта преку неговата улога во варењето на јаглехидратите. Пребиотските влакна ја забавуваат апсорпцијата на гликоза во цревата, спречувајќи ненадејни скокови на шеќерот во крвта по јадење.
Може да ги поддржи целите за слабеење
Рандомизирано испитување покажува дека цикоријата може да биде корисна и во регулирањето на апетитот. Високата содржина на растителни влакна создава желатинозна супстанца која, кога ќе стигне до желудникот, создава чувство на ситост, намалувајќи ги сигналите за глад. Исто така, бидејќи инулинот се разградува во дебелото црево, произведува масни киселини со краток синџир (SCFAs) кои го стимулираат глукагон-сличниот пептид-1 (GLP-1). Затоа, цикоријата може да биде вреден природен додаток во стимулирањето на овој пептид и поттикнувањето на губење на тежината.
Домашно кафе од цикорија
Состојки:
2 лажички мелен печен корен од цикорија
2,5 дцл вода
млеко, мед, шеќер (по желба)
Подготовка:
- Ставете вода во ѓезве и ставете го на средна температура. Кога ќе зоврие, додадете ја мелената цикорија.
- Намалете ја температурата и оставете да крчка 3 до 5 минути. Колку подолго се готви, толку поинтензивен ќе биде вкусот.
- По готвењето, процедете го пијалокот низ цедалка со дебела мрежа или газа за да го отстраните талогот.
- Додадете млеко, малку мед или шеќер по желба.
Ако не користите печен корен од цикорија купен од продавница, можете сами да го подготвите: измијте го, исечкајте го и исушете го коренот, потоа печете го во рерна (на околу 150 °C додека не потемни), а потоа смелете го во мелница. Ова кафе не содржи кофеин, но го поттикнува варењето и е благ стимуланс, идеален за оние кои сакаат да го прескокнат вистинското кафе и да го одржат својот утрински ритуал.