Ако тиквичката, краставицата или тиквата имаат горчлив вкус, со оглед на тоа што овој зеленчук не треба да има горчлив вкус, тоа значи дека содржи несакани, токсични материи. Во тој случај, таквиот зеленчук треба да го фрлите.
Што имаат заедничко радичот, грејпфрутот и прокељот?
Тие содржат супстанци кои на нашиот јазик ги детектираат рецепторите за горчлив вкус.
Ова се здрави намирници, па дури и да не сакаме горчлива храна, добро би било повремено да ја внесуваме во исхраната.
Од петте различни видови вкусови – слатко, солено, кисело, горчливо и умами – горчливиот вкус несомнено не е најомилен.
Ако мислите дека горчината е нешто што треба да го избегнувате, го пропуштате вкусот и хранливите придобивки од многу намирници.
Горчливата храна може да има остар, често лут вкус.
Некои горчливи јадења имаат посуптилен вкус, а во многу такви намирници наоѓаме и елементи на сладост или киселост.
Нутриционистите веруваат дека заедничкото својство на горчливата храна е нивната корист за цревата и варењето.
Горчливата храна ја поттикнува работата на дигестивниот систем, го намалува апетитот и ги ослободува дигестивните сокови во панкреасот.
Затоа, може да биде корисно да пиете горчлив пијалак пред јадење или да додадете горчлива храна во вашиот оброк или предјадење.
Горчлива храна – зошто толку многу луѓе не ја сакаат?
Кристина Есер, предавач на германскиот универзитет за превенција и здравствен менаџмент, објаснува:
Ова ни е вродено бидејќи горчливиот вкус обично сигнализира дека нешто може да биде отровно.
Многу растенија произведуваат горчливи материи токму за да се заштитат од предатори.
Но, можете да се навикнете на горчливиот вкус.
Ова објаснува зошто некои луѓе не уживаат во првата голтка незасладено кафе или зошто многу деца го мразат прокељот.
Што ја прави горчливата храна толку здрава?
Горчливите материи го подобруваат варењето, објаснија од германската организација за помош на дијабетичари.
Тие го поттикнуваат производството на стомачна киселина и жолч, што го олеснува варењето на масната храна.
Горчливата храна истовремено го намалува чувството на глад и желбата за слатки, што е предност за луѓето со дијабетес или прекумерна тежина, но и за сите останати.
Есер истакнува дека горчливите материи имаат антиинфламаторно дејство и можат да го намалат ризикот од развој на срцеви заболувања.
Доколку сакате да внесете повеќе горчливи материи во вашата исхрана, најдобро е тоа да го правите чекор по чекор.
Прво можете да комбинирате горчливи и слатки компоненти.
Салата од тиквички и горчлив радич измешани со бобинки од калинка и солено-сладок прелив се вкусен почеток, советува Кристина Есер.
Горчлива храна – дали може да биде штетна?
Во некои случаи, да.
Се советува претпазливост, на пример, ако тиквичката, краставицата или тиквата имаат горчлив вкус, предупредува германската организација за помош на дијабетичарите.
Овој зеленчук не треба да има горчлив вкус, а ако тоа се случи, тоа значи дека содржи несакани, токсични материи. Во тој случај, таквиот зеленчук треба да го фрлите.
Ако јадете грејпфрут или пиете сок од грејпфрут, имајте на ум дека ова овошје може да го намали или зголеми ефектот на лековите што ги земате.
Ова се однесува, на пример, за лекови за намалување на холестеролот или лекови за третман на кардиоваскуларни заболувања.
Дали додатоците со горчливи материи се опција за вас?
Некои додатоци во исхраната се базираат на растителни екстракти кои содржат горчливи материи. На пример, можете да добиете капсули со екстракт од артичок.
Нутриционистката Астрид Томбек вели дека сепак треба да се одлучите за свеж зеленчук наместо капки, капсули или таблети.
Зеленчукот е поевтин, повкусен и подобар поради другите здрави состојки кои ги содржи.
Друга работа што треба да се има на ум – со додатоци во исхраната може да дојде до предозирање.
Ако наместо суплементи конзумирате природни горчливи материи од зеленчук, билки или салати, тоа нема да се случи бидејќи во одреден момент горчливиот вкус станува премногу интензивен.
Горчлив вкус имаат брокулата, прокељот, зелката, карфиолот, коријандерот, чај и листови од глуварче, диви шпароги, темната чоколада, кељот, рукола, радич, јаболков оцет, зелен чај и сл.
Горчлива храна и хранливи материи
Горчливиот зелен зеленчук како рукола, кељ и брокула се богати со витамини, минерали, антиоксиданти и корисни растителни компоненти како што се витамините А, Ц и Е, како и со калциум, калиум и магнезиум.
Во споредба со спанаќот, глуварчето со горчлив вкус има осум пати повеќе антиоксиданти, три пати повеќе витамин А, пет пати повеќе витамин Е и двојно повеќе калциум.