Замрзнатиот зеленчук е лесен за консумирање, но новата студија сугерира дека многу луѓе не го користат безбедно, односно, го користат во сирова состојба.
Истражувањето објавено во Journal of Food Protection анализирало како луѓето во САД користат и подготвуваат замрзнат зеленчук, а експертите за безбедност на храна велат дека резултатите покажуваат како луѓето би можеле да го загрозат своето здравје.
Како луѓето консумираат замрзнат зеленчук
Како дел од студијата, истражувачите ги анализирале податоците од анкетата на примерок од повеќе од 3.000 луѓе за подготовка и потрошувачка на замрзнат зеленчук, собрани помеѓу 1 и 24 септември 2022 година. Тие откриле дека речиси 9 отсто од испитаниците изјавиле дека јадат сиров замрзнат зеленчук, а повеќето го додаваат во блендер за да направат смути или сок.
Повеќе од 40 отсто од испитаниците исто така рекле дека не ги следеле инструкциите на пакувањето кога подготвуваат замрзнат зеленчук, иако третина од учесниците во истражувањето биле свесни дека замрзнатиот зеленчук може да биде загаден со бактерии.
Овие наоди покажуваат дека некои потрошувачи не го готват замрзнатиот зеленчук пред да го консумираат и не ги читаат упатствата на пакувањето. Двата наоди ја нагласуваат клучната важност на превентивните мерки во производството на замрзнат зеленчук пред тој да стигне до потрошувачите, заклучиле истражувачите.
Ризици од јадење сиров замрзнат зеленчук
Иако замрзнатиот зеленчук изгледа безопасен, тој може да содржи патогени кои сериозно може да го загрозат вашето здравје.
Замрзнатиот зеленчук е како и секој друг сиров земјоделски производ. Имено, секогаш постои можност за контаминација со еколошки патогени, изјавила за Health Џенет Бафур, виш менаџер на Институтот за безбедност на храна и безбедност на исхраната на Универзитетот Џорџ Вашингтон.
На пример, во 2016 година, девет лица биле хоспитализирани, а тројца починале поради појава на инфекција со листерија моноцитогенес во замрзнат зеленчук.
Listeria monocytogenes може да предизвика бактериска инфекција позната како листериоза, која се јавува во две форми: цревна и инвазивна.
Цревната листериоза обично предизвикува дијареа и повраќање, додека инвазивната форма може да предизвика симптоми слични на грип, конфузија, напади, па дури и смрт.
Во понов случај, замрзнатите моркови и одредени мешавини од замрзнат зеленчук биле повлечени од пазарот во декември поради загриженост за можна изложеност на бактеријата E. coli. Инфекциите со E. coli може да предизвикаат силна стомачна болка, дијареа, треска, гадење и повраќање, а кај некои луѓе може да доведат до компликации опасни по живот.
Бафор нагласила дека замрзнувањето не уништува одредени бактерии и вируси, вклучително и хепатитис А и норовирус, што е честа заблуда.
Замрзнувањето само го ограничува растот на бактериите. Доколку штетните бактерии или вируси контаминирале прехранбен производ, тие ќе бидат внесени во телото за време на консумирањето, објаснила Бафор.
Некои луѓе кои јадат сиров замрзнат зеленчук се изложени на поголем ризик од болест во споредба со другите, вели д-р Елен Шумејкер, директорка на програмата Safe Plates на Државниот универзитет во Северна Каролина.
Кај помладите и здрави луѓе симптомите на листерија често не се присутни. Но, листеријата може да биде многу опасна за постарите лица, бремените жени и луѓето со ослабен имунолошки систем или основни здравствени состојби, рекла Шумејкер.
Како да се подготви замрзнат зеленчук
Иако замрзнувањето на зеленчукот не ги уништува потенцијалните патогени, нивното загревање може да ги елиминира.
Многу е важно да ги следите упатствата за подготовка на замрзнат зеленчук. На пакувањето често се наоѓаат изјави за безбедност на храната, во кои се наведува дека зеленчукот треба да се готви на температура од 74 степени. Следењето на овие упатства го намалува ризикот од болести кои се пренесуваат преку храна, рекол Вејд Сајерс, специјалист за безбедност на храна во Државниот универзитет во Мичиген.
Шумејкер нагласила дека исто така е важно луѓето да бидат свесни дека замрзнатиот зеленчук може да содржи патогени.
Терминот „подготвен за јадење“ значи дека производот е подготвен и може да се јаде без понатамошна обработка. Замрзнатиот зеленчук не е готова храна и бара дополнителна подготовка пред консумацијата, односно, мора да биде термички обработен, рекла Шумејкер.