Ја поддржува мускулната и нервната функција, контролата на шеќерот во крвта, регулирањето на крвниот притисок и здравјето на коските
Магнезиумот е суштински минерал кој ја поддржува мускулната и нервната функција, контролата на шеќерот во крвта, регулирањето на крвниот притисок и здравјето на коските. Исто така е клучен за производство на енергија, синтеза на протеини и поправка на ДНК.
Еден од најдобрите совети што можеби сте ги слушнале е да јадете бадеми.
Бадемите се еден од најдобрите диететски извори на магнезиум. Има импресивни 77,96 милиграми магнезиум во 30 грама бадеми, а на мажите и на жените им се потребни 420, односно, 320 милиграми магнезиум дневно. Сепак, постојат многу намирници со уште повеќе магнезиум од бадемите. Еве го списокот на некои кои се лесно достапни.
Спанаќ
Содржина на магнезиум: 157 милиграми по чаша
Спанаќот, исто така, го поддржува здравјето на коските и може да помогне во намалувањето на крвниот притисок, благодарение на неговата содржина на калиум и нитрати. Додадете една шака спанаќ во вашата супа, чорба или утринско смути. Можете исто така да пропржите спанаќ со лук, да го додадете во тестенини или во омлет.
Семки од тиква
Содржина на магнезиум: 156 милиграми во 30 грама
Семките од тиква имаат речиси двојно повеќе магнезиум од бадемите, а исто така нудат и високо ниво на цинк, железо и протеини од растително потекло. Тие исто така содржат мононезаситени („добри“) масти кои се здрави за срцето, влакна кои се корисни за цревата и антиоксиданти кои го зајакнуваат имунитетот. Додадете ги во салати, јогурт или кратко пропржете ги во тава и наросете ги врз вашата овесна каша за појадок наутро.
Киноа
Содржина на магнезиум: 120 милиграми на чаша
Покрај магнезиумот, киноата е исто така добар извор на влакна и протеини и е корисна за имунитетот и здравјето на цревата. Користете ја киноата исто како оризот: како прилог, во салати или дури и сервирана топла за појадок со млеко, малку мед и овошје.
Црн грав
Содржина на магнезиум: 120 милиграми на чаша
За обилна доза на магнезиум, посегнете по црн грав. Тoj е исто така одличен извор на протеини, влакна и микронутриенти како фолна киселина, манган, железо, калиум и витамин Б6. Овие хранливи материи се корисни за здравјето на цревата, здравјето на срцето и контролата на шеќерот во крвта. Додадете црн грав во супи од зеленчук, чорби, салати или направете веге плескавица или намаз.
Чиа семе
Содржина на магнезиум: 95 милиграми на 30 грама
Покрај магнезиумот, чиа семето содржи и антиоксиданти, омега-3 масни киселини и влакна, што ги прави популарна суперхрана. Направете чиа пудинг од нив – измешајте една или две лажици чиа семе со млеко или јогурт и оставете ги да отстојат преку ноќ. Можете да ги додадете во вашите утрински житарки, смутија или јогурт. Секогаш оставете ги малку да се згуснат пред да ги консумирате за да ги добиете најголемите придобивки и да избегнете дигестивни тегоби.
Ленено семе
Содржина на магнезиум: 80 милиграми на порција од 30 грама
Една лажица е стандардна големина на порција, бидејќи се богати со растителни влакна, а премногу може да предизвика дигестивни проблеми. Лененото семе содржи и микронутриенти како тиамин и манган. Тиаминот е витамин кој промовира подобар сон, додека манганот е вклучен во здравјето на мозокот и имунолошкиот систем. Додадете ги во јогурт, овесна каша или смути, или наросете ги на свежо овошје и салати.