Во некои случаи, недостатокот на цинк може да биде ран предупредувачки знак за срцев удар или други сериозни здравствени проблеми..
Цинкот е минерал кој е важен за бројни телесни функции, помага при зараснување на раните, ја поддржува имунолошката одбрана, па дури и може да помогне во заштитата од макуларна дегенерација. Бидејќи игра клучна улога во растот и развојот, особено е важен за децата, адолесцентите и бремените жени.
Но, влијанието на цинкот не завршува тука; оваа суштинска хранлива материја ја поддржува и функцијата на мозокот, ги подобрува меморијата и учењето и го одржува здравјето на кожата со намалување на воспалението и забрзување на заздравувањето на акните и другите кожни проблеми.
Цинкот и здравјето на срцето
Дополнително, некои истражувања сугерираат дека цинкот може значително да помогне во намалувањето на систолниот крвен притисок, холестеролот и триглицеридите.
Со други зборови, се нагласува и неговото значење за кардиоваскуларното здравје.
Прегледот од 2021 година објавен во Frontiers in Nutrition посочува дека ниските нивоа на цинк се поврзани со зголемено воспаление, оксидативен стрес и оштетување на крвните садови, кои придонесуваат за срцеви заболувања.
Покрај тоа, во некои случаи, недостатокот на цинк може да биде ран предупредувачки знак за срцев удар или други сериозни здравствени проблеми.
Освен тоа, вообичаените фактори на ризик за болести на срцето, како што се дебелината, дијабетес тип 2 и висок крвен притисок, често се поврзуваат со недостаток на цинк.
Кој е изложен на ризик од недостаток на цинк?
Иако повеќето луѓе добиваат доволно од овој важен минерал преку нивната исхрана, вклучувајќи пилешко, црвено месо и житарки, одредени групи се поподложни, според клиниката Мајо, вклучувајќи доенчиња, постари лица и оние кои консумираат прекумерни количини алкохол.
Недостатокот на цинк може да предизвика симптоми како што се: дијареа, слаб апетит и бавно зараснување на раните.
Суперхрана богата со цинк
Покрај веќе наведените намирници, еден од најдобрите диететски извори на цинк е месото од ракови. Регистрираниот диететичар Ангел Лук наведува дека една шолја содржи повеќе од пет милиграми цинк, што е околу половина од препорачаната дневна доза. Раковите се исто така одличен извор на посни протеини. Лесен начин да уживате во месото од раковите, истакнува овој диететичар, е да го сварите на пареа и да го послужите со малку сок од лимон и сол.
За среќа, бидејќи кај нас баш и нема многу ракови, цинкот се наоѓа и во многу други намирници, вклучително говедско, свинско, мисиркино, морска храна, боровинки, брокула, јајца, млечни производи, грав, леќа, кикиритки, семки од тиква, ориз и интегрален леб.
Вегетаријанците и веганите можат да ги задоволат своите потреби за цинк со добро испланирана исхрана, а како што нивните тела се прилагодуваат на вегетаријанската исхрана, нивната способност да апсорбираат и задржуваат цинк се зголемува.
Ако имате недостаток на овој минерал, секогаш разговарајте со вашиот лекар или фармацевт пред да земете додаток. Имено, земањето премногу цинк може да предизвика несакани ефекти и да ја попречи апсорпцијата на другите неопходни хранливи материи како бакар и железо.