Зад различните бои на кората од јаболка – жолта, црвена или зелена – се кријат различни антивоспалителни и антиоксидантни материи.
Добро е познато дека пет порции овошје и зеленчук дневно го штитат организмот, се борат против стареењето на клетките, ја одржуваат телесната тежина под контрола и се одлични сојузници на имунолошкиот систем.
Овошјето и зеленчукот ја имаат оваа моќ благодарение на хранливите материи како што се јаглени хидрати, витамини, минерали, влакна, антиоксиданти и фитохемикалии со антитуморни својства.
Помеѓу овошјето, јаболката, кои се достапни во текот на целата година, заслужуваат посебно внимание. Едно свежо јаболко со лушпа и тежина од 150 грама обезбедува приближно 65 калории, 15 грама растворливи шеќери, 3,9 грама влакна, 0,3 грама протеини, 114 мг калиум и пет милиграми витамин Ц, со малку масти и натриум.
„Јаболкото е одличен сојузник во борбата за здрав кардиоваскуларен систем. Со антиинфламаторни и антиоксидантни својства и извор на растворливи влакна, вклучително и пектин, јаболката помагаат во регулирањето на цревната бактериска флора. Се препорачуваат и против запек и дијареа, бидејќи со помош на нерастворливи влакна ја поттикнуваат здравата цревна перисталтика“, вели нутриционистката Мајли Фиорентини.
Дополнително, забележува Фиорентини, јаболката помагаат во регулирањето на нивото на шеќер во крвта.
Како да ги вклучите јаболките во вашата секојдневна исхрана
Најдобро е да вклучите јаболка во вашиот појадок или да ги јадете како ужина, во комбинација со јогурт со малку маснотии.
„Може да се јадат и варени, со додаток на какао или цимет, како десерт. Тука е и добро познатата пита со јаболка, која одлично оди со кафе или чај. Исто така, освен ако вашиот лекар не нареди поинаку, јаболков оцет треба да се користи како прелив за салати. Овој оцет е извор на минерални соли, органски киселини, пектини и витамини и подобро го поднесуваат оние кои страдаат од гастроинтестинални проблеми во споредба со другите видови оцет.
Интересно е што зад различните бои на кората од јаболка – жолта, црвена или зелена – се кријат различни антивоспалителни и антиоксидантни материи.
„Зеленото јаболко како Granny Smith има малку шеќер и многу влакна, го намалува нивото на лошиот холестерол во крвта, ја подобрува функцијата на дебелото црево и го стабилизира нивото на шеќер во крвта.
„Покрај витамините А, Б и Ц, има значителна содржина на хлорофил (кој ѝ ја дава бојата на лушпата), моќен антиоксидант кој сè уште се проучува поради неговите антиинфламаторни и антитуморни ефекти“, објаснила нутриционистката.
Жолтото јаболко како златниот делишес , пак, е добар сојузник во борбата против заморот и стресот.
„Благодарение на содржината на витамин Ц и витамин Б1, тој дава сила и виталност, а како богат извор на растителни влакна, исто така се смета за корисен за контрола на холестеролот и шеќерот во крвта. Лутеинот што го содржи, со своите антиинфламаторни ефекти, позитивно влијае на здравјето на очите и когнитивната функција. „Бета каротенот, како антиоксидант, нуди бројни придобивки за кожата и коските, а има и антитуморно дејство“, додава Фиорентини.
Црвеното јаболко, чиј најпознат претставник е веројатно црвениот делишес се издвојува по содржината на пирувати, кој, како што истакнува нутриционистката, „го инхибира таложењето маснотии“.
Содржи антиоксиданти како кверцетинот, кој има антиинфламаторно и антиканцерогено дејство, како и витамин Ц чија важност за имунитетот е добро позната.
Инаку, за оние кои се прашуваат дали да го излупат јаболкото пред да го изедат или не, Фиорентини вели дека е подобро да се консумира целото овошје, за да се уживаат сите негови благодети, се разбира, со мерка на претпазливост, а тоа е, пред сѐ, добро да се измие јаболкото.