Бидејќи е богат со влакна и не содржи кофеин, рогачот е логичен избор за луѓето кои имаат проблеми со висок крвен притисок. Од друга страна, поради малата содржина на едноставни шеќери и масти, тој е одлична алтернатива за чоколадото.
Во последно време се почесто се зборува за рогачот како алтернатива на чоколадото. Имено, природната сладост на рогачот овозможува тој да биде одлична замена за какаото и производите од какао. Иако во индустриското производство се користи само неколку децении, рогачот не е прехранбена новина. Во не така далечното минато, пејачите џвакале рогач бидејќи се сметало дека ги чисти грлото и гласот.Рогачот (Ceratonia siliqua) е зимзелено дрво кое припаѓа на групата мешунки. Расте во медитеранската област каде што се одгледува најмалку 4000 години поради благиот и хранлив плод – мешунката. Тоа е растение кое сака суви услови, подалеку од штетници, па затоа му треба малку или воопшто не му треба прскање. Расте до 15 метри за 50 години. Иако првите 15 години не носи плодови, подоцна има богат род до старост. Големото дрво може да даде еден тон плодови во еден род, а цвета во септември и октомври. Како што се развива, мешунката од рогач има зелена боја, која на крајот добива темно кафеава боја. Внатре во мешунката има до 15 семки, кои наликуваат на семки од лубеница. Целиот плод од рогач, и мешунките и семките се јадат.
Историја на рогачот
Иако по потекло е од Медитеранот, рогачот сега се одгледува насекаде низ светот. Се споменува во белешките на Гркот Теофрат, каде што пишува дека неговите современици го нарекувале рогачот „египетска смоква“. Египќаните ги користеле лепливите својства на рогачот при мумификација, а во гробниците биле пронајдени мешунки и семиња. Римјаните ги јаделе мешунките зелени и свежи поради нивната природна сладост. Арапите ги засадиле во Северна Африка и Шпанија заедно со лимонот и маслинката. Шпанците го однеле во Мексико и Јужна Америка, а Британците во Јужна Африка, Индија и Австралија. Брзо се раширил бидејќи лесно се одгледува, не бара многу внимание и дава многу плодови. Се вели дека се користел и за мерење на злато.
Рогачот обично се преработува во земјата на потекло. Плодот се суши, се исплакнува со вода и се дроби за да се одвојат семките од мешунката.
После тоа, семките се преработуваат во леплива маса која се користи за желирање или како емулгатор на сладолед, а од мешунките се прави прашокот. Прашокот се добива со пржење на мешунките од рогач, кои потоа се мелат и се просејуваат за да не станат тврди и грутчести.
Нутритивен состав на рогачот
Јаглехидратите сочинуваат 80% од составот на рогачот. Содржи витамини А, Б2, Б3 и Д. Покрај тоа, има значителни количини на калциум, фосфор, калиум, магнезиум. Содржи мали количини на железо, манган, бариум и бакар. 100 грама рогач во прав има 228 kcal, а содржи: 4,7 g протеини, 91,5 g јаглени хидрати, 0,67 g масти и дури 41 g влакна.
Влијание врз здравјето
Додавањето на рогач во вообичаената исхрана обезбедува бројни здравствени придобивки. Бидејќи е богат со влакна и не содржи кофеин, рогачот е логичен избор за луѓето кои имаат проблеми со висок крвен притисок. Од друга страна, поради малата содржина на едноставни шеќери и масти, тој е одлична алтернатива за чоколадото.
Слично како какаото, рогачот може да се пофали со завидна содржина на полифеноли, антиоксиданти познати по нивното влијание врз намалувањето на ризикот од срцеви заболувања. Истражувањата покажуваат дека јадењето храна богата со полифеноли, како што е рогачот, може да го намали високиот холестерол во крвта.
Рогачот е пожелна храна за разни дигестивни проблеми. Имено, танините, растителни соединенија кои се наоѓаат во рогачот, се разликуваат од другите познати растителни танини. За разлика од обичните растителни танини, танините од рогач се нерастворливи во вода и помагаат да се елиминираат токсините од дигестивниот систем и да се спречи растот на штетните бактерии во цревата. Покрај тоа, природните шеќери во рогачот може да помогнат да се подобри конзистентноста на столицата. Така, истражувањата покажаа дека сокот од рогач може да биде безбедна и ефикасна помош при дијареа кај деца и возрасни.
Рогач во кујната
Брашното од рогач се користи во прехранбената индустрија како стабилизатор и средство за затемнување. Често се користи во домаќинството како замена за какао и кафе. Вкусни и здрави топли напитоци може да се направат од ситно мелено брашно или да се користи за да им се даде фина арома на разни пудинзи и колачи.
Освен што можете да го користите како замена за чоколадо во рецептите за колачи, со мелен рогач можете да направите и торта што изгледа и има вкус сличен на оревите. Можете да го понудите свежо на децата, како здрава ужина. Растопениот рогач не изгледа толку убаво како чоколадото бидејќи не содржи какао путер. За да добиете убав изглед дури и со стопен рогач, додадете обезмастено млеко разредено со топла вода.
Со оглед на неговиот богат состав и одличниот вкус, рогачот дефинитивно е намирница која треба да започнете редовно да ја консумирате!