Лесен и брз колач со овошје
Овој колач го направи нашата читателка Лихнида и секако, го послужи во Лихнидос, ама ни кажа дека рецептот го позајмила од Сузана Трајковска. Да нема кавги околу авторските права!
Овие колачи кои се прават брзо и со некое овошје по желба се секогаш лесни и за правење и за јадење. Ова второто им е и единствената маана.
Една тава си оди лесно и брзо и наместо десерт барем за 2 дена, останува празна тава уште истиот ден.
Состојки:
За тестото:
5 јајца
5 лажици шеќер
5 лажици брашно
5 лажици зејтин
1 прашок за пециво
За филот:
250 мл млеко
1/2 л вода
2 пудинга од ванила
1 кг овошје по желба (вишни)
3 лажици шеќер + 10 лажици шеќер
2 шлаг пени
Приготвување:
Се матат состојките за пандишпанот и се става смесата во подмачкано тавче да се пече на температура од 180 степени.
Додека се пече тестото се варат 250 мл млеко со 3 лажици шеќер. Кога ќе се испече пандишпанот се прелева со млекото
1 кг вишни или некое друго овошје по желба, се варат во 1/2 литар вода со 10 лажици шеќер. Само кратко да провријат, а потоа се вади овошјето и во истата вода се варат 2 пудинга од ванила.
Кога ќе се згусне пудингот се трга на страна и во него се враќа овошјето. Се прелива пандишпанот со пудингот со овошје и се остава да се олади и да се стврдне.
Откако ќе се олади, врз пудингот се мачкаат изматени 2 шлаг-пени.
После неколку часа може да се дегустира.