Познато е дека гравот е добар за вашето срце, а може да биде добар и за вашата линија и за половината, велат научниците.
Луѓето кои јаделе 40 грама отпорен скроб на ден, кој се наоѓа во гравот, наутот и леќата, изгубиле 3 килограми за осум недели, откриле кинеските истражувачи.
Јаглехидратите ги варат здравите бактерии во цревата кои ви помагаат да изгубите килограми, велат научниците.
Професорот Вајпинг Џиа, од Медицинскиот факултет на Универзитетот Џиао Тонг во Шангај, вели:
„Покажавме дека отпорниот скроб може да го олесни слабеењето. Придобивките од отпорниот скроб се поврзани со промените во составот на цревната флора“.
Отпорниот скроб е вид на влакна што не се вари во тенкото црево, туку станува гориво за здравите бактерии во долното црево.
Најдобри извори се целите зрна и мешунки, кои вклучуваат грав, леќа и грашок. Можете да го добиете и од компирите, иако тие мора да се изладат откако ќе ги сварите.
Претходните истражувања покажале дека повисоките нивоа на здрави цревни бактерии може да го олеснат губењето на маснотиите и килограмите, пишува The Sun.
Според Daily Mail, и покрај тоа што гравот од конзерва на тост со години се сметал за нездраво јадење, врвните нутриционисти го издвоиле како дел од здравата исхрана – иако и двете компоненти се технички ултра-обработена храна, според Британската фондација за исхрана (BNF).
Покрај житарките од цело зрно и овошните јогурти, BNF инсистирал на тоа дека гравот на тост е извор на „важни хранливи материи“, како и дека е „лесно достапен“.
Овој оброк е нискокалоричен, полн со влакна и богат со протеини, па има бројни здравствени придобивки.
Кога ќе се направи со две кришки интегрален леб и половина лименка грав, оброкот има околу 350 калории.
Ова е само 14 проценти од 2.500 препорачани дневни калории за мажи и 18 проценти од 2.000 за жени – количина што е потребна во просек дневно за одржување на тежината.
Покрај тоа, гравот на тост е полн со растителни влакна, со околу 13 грама по порција и е полн со протеини.
На возрасните им се советува да јадат 30 грама дневно, но NHS забележува дека повеќето луѓе добиваат само околу 20 г на ден.
Јадењето многу влакна е поврзано со помал ризик од срцеви заболувања, мозочен удар, дијабетес тип 2 и рак на дебелото црево.
Гравот на тост исто така содржи малку шеќер, од кои 11,9 грама е од природно потекло и 0,5 грама заситени масти.
Исто така, има многу витамини во само една конзерва грав, вклучувајќи железо, цинк, витамини од групата Б и калиум.
Железото помага во одржување на здрава крв, а цинкот помага да се создадат нови клетки и ензими. Витамините Б помагаат во одржување на здрав нервен систем, додека калиумот помага во контрола на балансот на течности во телото, според NHS.
Гравот на тост е поздравен од нутриционистите поради неговите здравствени придобивки.
„За многумина од нас кога ќе се вратиме дома после напорен ден, храната како конзерва грав, интегрален тост, рибини прсти или готови сосови за тестенини се достапен начин да се добие балансиран оброк на масата“, вели Бриџит Бенелам, портпарол на БНФ.