Од скромни состојки може да се направи фин оброк. Ова вариво од свежа зелка и црвена леќа е најдобар доказ за тоа тврдење.
Овој рецепт можете да го збогатите и да користите дополнителен зеленчук што го имате на располагање, како кромид, лук, пиперка.
Длабочината на вкусот, сепак, му ја даваат зачините, односно кари пастата. Можете сами да ја подготвите од ѓумбир, маточина, гарам масала, мелен ким и коријандер и други слични индиски зачини или да ја користите онаа од продавница.
Состојки:
1,5 л супа од зеленчук (или вода)
400 гр сечкани домати од конзерва
200 гр црвена леќа
1 мала главица зелка
1 морков
1 црвена пиперка
1 главица кромид
1-2 чешниња лук
1-2 лажици кари паста по желба
Подготовка:
Во поголемо тенџере загрејте масло по ваша желба и пропржете ги сечканиот кромид, морковот и пиперката. Пропржете го зеленчукот околу пет минути додека не омекне. Додадете ја сечканата зелка и пржете сè заедно уште околу пет минути.
Во тенџерето додадете го исечканиот лук – пржете го околу половина минута. Потоа додадете ја кари пастата и сè добро измешајте.
Прелијте го зеленчукот со супата од зеленчук или со вода и додадете ги сечканите домати од конзервата. Во тенџерето додадете ја и леќата која претходно сте ја исплакнале под млаз вода и сте ја исцедиле.
Кога ќе зоврие, намалете го огнот и динстајте со капак околу 20 минути додека леќата целосно да се свари и да се спојат вкусовите.
Зачинете со сол и бибер доколку е потребно и на крајот капнете малку сок од лимон.
Послужете топло со парче домашен леб.