Според бројни истражувања, чипсот е на врвот на листата на најнездрави намирници, а загрижувачки е неговиот негативен ефект врз организмот.
Во современиот начин на живот, преработената храна стана секојдневен дел од животот на многу луѓе. Грицките како чипсот се консумираат во огромни количини, често несвесно, додека гледате телевизија, работите или поминувате време со пријателите. Сепак, малкумина размислуваат за сериозните здравствени последици што може да ги има ваквата храна.
Сите понекогаш чувствуваме потреба за нешто солено или слатко – без разлика дали се работи за парче торта, крофни, переци или пуканки. Повременото консумирање на овие намирници не е проблематично, но кога грицките ќе станат редовен дел од исхраната, тоа може да има сериозни здравствени последици.
Според истражувањето на порталот EatThis, чипсот е прогласен за една од најнездравите намирници во светот. Причината за тоа лежи во неговиот состав – богат е со сол, вештачки бои и адитиви, а во исто време речиси и да не содржи влакна или хранливи материи. Со други зборови, тој обезбедува само празни калории, додека телото не добива никакви нутритивни придобивки.
Како чипсот влијае на здравјето?
Оваа ултра преработена храна може сериозно да го загрози здравјето, особено кардиоваскуларниот систем. Редовното консумирање чипс може да доведе до покачен холестерол, зголемување на телесната тежина и зголемен ризик од срцеви заболувања.
Исто така, многу адитиви кои се наоѓаат во чипсот се поврзани со зголемен ризик од рак. Она што е уште позагрижувачко е популарноста на чипсот кај младите, кои често го консумираат како ужина или замена за оброк.
Негативните ефекти од нездравата храна не се појавуваат дури многу години подоцна – истражувањата покажуваат дека крвните садови може да претрпат оштетувања веќе неколку часа по консумирањето. Зголеменото ниво на сол и транс-масти во телото предизвикува воспалителни процеси кои долгорочно може да доведат до сериозни здравствени проблеми.
Поздрави алтернативи
Ако често посегнувате по чипс и други грицки, размислете за поздрави алтернативи. Наместо преработени производи, изберете природни опции како јаткасти плодови (ореви, бадеми, лешници), семки од тиква или свежо овошје како банани и портокали.
Овие намирници не само што ја задоволуваат желбата за грицкање, туку носат и бројни здравствени придобивки.
Малите промени во исхраната можат значително да го подобрат квалитетот на животот. Со намалување на внесот на преработена храна и зголемување на потрошувачката на природна храна богата со хранливи материи, правите голем чекор кон поздраво тело и долговечност.