Морковите се одлични за кожата и видот: Имаме рецепт за еликсир од морков

За некои, морковите се ултимативна намирница кога станува збор за здравјето. Со генерации родителите им велеа на своите деца дека морковите ќе им помогнат да имаат подобар вид.

Памтам дека поради ова мое убедување, кога беше мал син ми целосно пожолте па дури се посомневавме дека добил жолтица се додека не отидовме кај педијатарката и таа не праша колку моркови на ден консумира.

Прочитајте дали се морковите навистина толку добри за видот и какви други придобивки имаат за здравјето.

Морковите се крцкави, вкусни и многу хранливи и имаат бројни здравствени придобивки. Иако денес се познати како светло портокалова култура, оригиналниот морков од Централна Азија имал виолетово-жолта боја. Денес, морковите се користат низ целиот свет и се многу популарна храна, веројатно поради претходно споменатата висока хранлива вредност, едноставноста кога станува збор за неговата обработка и подготовка и можноста траат со месеци, пренесува Carrot Museum.

Нутритивни вредности и здравствени придобивки

Покрај тоа што се богати со витамини, минерали и влакна, морковите се и добар извор на антиоксиданти. Само еден морков со средна големина, со тежина од околу 60 грама, содржи:

25 калории
5,8 грама јаглехидрати
1,7 грама влакна
0,9 грама протеини
калциум и калиум, лутеин, бета каротен
витамини Е и К, Ц и А.

Вашите родители веројатно ви кажале дека морковите се добри за видот. Недостатокот на витамин А, кој го содржат морковите, може да предизвика слепило кај децата.

Значи, вашите родители биле во право. Сепак, видот на повеќето луѓе нема да се промени откако ќе јадат само моркови, освен ако немаат сериозен недостаток на гореспоменатиот витамин.

Покрај витаминот А, морковите содржат и антиоксиданти лутеин и зеаксантин, а нивната комбинација може да спречи макуларна дегенерација, или жолти дамки. Затоа, неговата консумација е навистина важна, а покрај за видот, може да помогне и во борбата против:

рак на простата – антиоксидантните ефекти на диететските каротеноиди – жолти, портокалови и црвени органски пигменти присутни во морковите и другиот зеленчук – можат да го намалат ризикот од рак. Лутеинот и зеаксантинот се два примери за овие каротеноиди. Преглед на студии од 2015 година пронајде врска помеѓу исхраната богата со каротеноиди и помалиот ризик од рак на простата.
рак на кожа – истражувањата сугерираат дека одредени хранливи материи може да бидат важни за заштита на кожата од оштетување или дури и за помагање во поправка на оштетената кожа, со што се намалува ризикот од развој на рак на кожа.

Во клиничките испитувања, ефектите на бета-каротенот и антиоксидантните хранливи материи: витамини А, Ц, Е, селен и цинк се најмногу проучувани.
леукемија – во 2011 година, истражувачите пронајдоа докази дека хранливите материи во екстрактот од сок од морков можат да ги убијат клетките на леукемија и да го забават или спречат нивниот раст.
дијабетес – авторите на преглед на студии од 2018 година заклучија дека консумирањето храна богата со растителни влакна може да помогне во спречувањето на развојот на дијабетес тип 2. Понатаму, храната богата со растителни влакна може да им помогне на луѓето со дијабетес тип 2 да го контролираат нивото на шеќер во крвта.
висок крвен притисок – Американската асоцијација за срце (AHA) ги охрабрува луѓето да додаваат помалку сол или натриум во своите оброци и да јадат повеќе храна што содржи калиум, како што се морковите. Калиумот помага во опуштање на крвните садови, намалувајќи го ризикот од висок крвен притисок и други кардиоваскуларни проблеми, објавува Medical News Today.

Освежителен еликсир од морков и ѓумбир

Лиметата, морковите и ѓумбирот измешани заедно создаваат напиток кој не само што е освежителен, туку ќе го наполни вашето тело со витамини, минерали и други хранливи материи. Ќе го зајакне вашиот имунолошки систем и ќе ве освежи кога ви е најпотребен.

Состојки:
2 лажици сечкан излупен ѓумбир
250 мл свеж сок од морков
125 мл свеж сок од лимета
80 мл вода
Подготовка:
Во мало тенџере, на средна температура, ставете ги ѓумбирот и водата. Почекајте да зоврие и мешајте додека не зоврие.

Кога ќе зоврие, тргнете од оган и оставете ги 10 минути.
Процедете ја добиената течност во бокал и почекајте да се олади. Во изладениот сируп додадете го сокот од морков и лимета што претходно сте го направиле со соковник или цедалка за овошје. Добро измешајте и чувајте го во фрижидер. Сервирајте со мраз.