Аронијата има силно антиканцерогено дејство, го штити црниот дроб и ја поддржува тироидната жлезда
Ако ја внесувате во форма на сок, искористливоста на здравите состојки е подобра ако се консумира после јадење.
Се смета за супернамирница, дури и за најсилниот познат антиоксидант денес. Ова грмушесто растение е отпорно на студ и разни штетници и е се почест избор во домашните градини.
Неговите мали, темно сини бобинки зреат кон крајот на август и септември, но благодарение на способноста да се замрзнат, исушат или преработат во сокови, џемови и сирупи, тие се достапни во текот на целата година. Бобинките од аронија можеби нема да го воодушеват непцето на прв залак, но нутриционистите ги сметаат за еден од најмоќните природни сојузници за здравјето поради нивната исклучителна хранлива вредност.
Аронијата е богата со антиоксиданти, особено со антоцијани, поради што е рангирана меѓу најсилните познати природни антиоксиданти. Покрај тоа, содржи многу витамини Ц, К, А и Е и минерали како што се калиум, калциум, магнезиум и цинк, како и влакна кои промовираат здраво варење.
Свежата аронија е најдобро да се консумира во количина од 200 до 300 грама дневно, а одлично оди со јаболка, боровинки, со банана во смути или како додаток на житарки и јогурт.
Заштита од болести
Но, покрај тоа што го храни организмот одвнатре, аронијата има и силно превентивно дејство, а бројни истражувања, меѓу кои и ова, покажуваат дека има антиканцерогено дејство и помага во уништувањето на клетките на туморот, го штити црниот дроб, ја стимулира тироидната жлезда и го штити срцето.
Бидејќи е исклучително богата со антиоксиданти, ги штити здравите клетки во телото и крвната плазма од оксидативен стрес, забавувајќи го процесот на стареење на телото и спречувајќи развој на хронични заболувања. Ја стимулира тироидната жлезда, па особено се препорачува за лица со хипотироидизам.
Го спречува развојот на кардиоваскуларни заболувања, го намалува високиот крвен притисок и холестеролот и го стимулира производството на добар холестерол. Ја стимулира функцијата на црниот дроб, помага при жолчни камења и воспаление на жолчното кесе. Ги смирува грчевите и болките во цревата, го намалува воспалението на цревната обвивка и ја запира дијареата. Аронијата е корисна и при воспаление на уринарниот тракт.
100 грама сушени бобинки содржат 16 грама влакна, кои помагаат во одржување на нормалната функција на дигестивниот систем, што пак има корисен ефект врз имунолошкиот систем.
Пиење сок
За превенција и одржување на добро здравје се препорачува половина до децилитар сок дневно, две недели, во секоја сезона. Искористливоста на здравите состојки е подобра доколку се консумира после оброк. Исто така, високата содржина на пектини и овошни киселини може да предизвика мачнини кај луѓето со чувствителен желудник.