Домашна паста, домашен вкус

Не познавам некој што не сака тестенини во најразлични комбинации, а ми изгледа дека не ги јадат само оние кои се на диета па глумат дека, демек, не се по тестенините.

Секако, не е лесно да им се одолее ниту на купечките, а не пак на оние што ќе си ги направите дома сами со своја рака или пак ќе ви ги направи некој ваш најсакан со негова рака.

Нашиот рецепт е од Лихнида Дамовска која е толку голема гурманка што не ѝ е тешко да засука ракави и да си направи свежа паста само затоа што за ручек или вечера посакала да јаде тестенини направени од нејзина рака и ист таков домашен сос.

Вели дека за количина која е доволна за четворица се доволни 300 грама брашно. Бидејќи на 100 грама оди 1 јајце, можете да си ја прилагодувате количината според своите потреби.

Состојки за тестенините:

300 г брашно

3 јајца

сол по вкус (на 1 јајце оди прстофат сол)

Приготвување:

Замесете цврсто тесто и ставете го во платнена торба или само покријте го и оставете го да одмара 2 часа.

Потоа расукајте многу тенка кора и ставете одозгора повеќе брашно. Завиткајте ја во ролна и исечете тенки парчиња. Одвиткајте ги и варете ги во зовриена и посолена вода 10 минути.

За сосот ви требаат:

мали доматчиња

парче сирење

10 чешнињалук

маслиново масло

рузмарин и оригано.

Приготвување:

Сѐ заедно испечете во рерна и потоа згмечете со вилушка. Се разбира, откако ќе се испечат чешнињатра лук, треба да се излупат.

Прелијте го сосот врз сварените тестенини и уживајте во домашните вкуснотии.

Можете да си додадете и малку рендан пармезан и ако имате нешто кисело, како на пример, кисел ѓумбир (како на фотографијата).