Истражувачите откриле дека храната богата со мелатонин ги зголемува неговите нивоа во крвта, па затоа може да се избегне земање мелатонин преку додатоци во исхраната.
Мелатонинот е неопходен за добар сон. Овој уникатен хормон го произведува епифизата, која се наоѓа во средината на мозокот, и функционира во согласност со ритмите на сонцето. Повеќе мелатонин се произведува кога сонцето заоѓа, а помалку кога сонцето изгрева. Истражувачите велат дека додавањето мелатонин во вашата исхрана може да го подобри сонот.
Мелатонинот во форма на додаток во исхраната се препорачува за луѓе кои имаат проблеми со спиењето. Земањето мелатонин преку додатоци во исхраната се смета за безбедно, но во комбинација со некои лекови на рецепт може да предизвика несакани ефекти како што се главоболки, гадење, поспаност и вртоглавица.
Истражувачите откриле дека храната богата со мелатонин ги зголемува неговите нивоа во крвта, па затоа може да се избегне земање мелатонин преку додатоци во исхраната.
Зошто е потребен мелатонин?
Недостатокот на сон негативно влијае на здравјето. Го попречува учењето и ја зголемува инсулинската резистенција, што може да напредува до дијабетес. Исто така, може да ги наруши хормоните на глад, што значи дека би можеле да јадете повеќе од вообичаеното.
Научниците сè уште учат за важноста на мелатонинот. Иако е најпознат како средство за спиење, мелатонинот има голем број други потенцијални здравствени придобивки, наведува Nourish од WebMD:
Го подобрува сонот.
Постојат малку докази дека мелатонинот е ефикасен за хронична несоница. Но, ако имате jet lag, може да ви помогне да се вратите на нормален ритам на спиење. Исто така, може да им помогне на пациентите да спијат пред операција.
Придонесува за подобар сон кај деца со одредени состојби.
Мелатонинот може да им помогне и на деца со одредени состојби кои го попречуваат сонот, како што се астма, дерматитис, нарушување на вниманието и хиперактивност (ADHD) и нарушување од аутистичниот спектар. Бидејќи мелатонинот е хормон, децата не треба да го земаат без одобрение од лекар.
Промовира здравје на мозокот кај постари возрасни лица.
Нивоата на мелатонин природно се намалуваат со возраста. Неговото зголемување може да помогне во спречување на мозочни нарушувања подоцна во животот. Студиите врз животни и луѓе откриле дека мелатонинот може да го намали ризикот од невродегенеративни заболувања како што се Алцхајмеровата и Паркинсоновата болест.
Здравје на очите.
Мелатонинот извршува неколку вредни функции во човечкото око. Суплементацијата покажала придобивки за оние со макуларна дегенерација поврзана со возраста. Истражувачите веруваат дека пониските нивоа на мелатонин кај постарите возрасни лица може да придонесат за нарушувањето.
Храна што содржи мелатонин
Не постои препорачан дневен внес (RDA) за мелатонин. Кога станува збор за додатоци на мелатонин, некои експерти препорачуваат доза од околу 0,5 до 3 милиграми за проблеми поврзани со спиењето. Повисоките дози можат да предизвикаат дневна поспаност.
Повеќето бази на податоци за храна не ја наведуваат количината на мелатонин во храната, но според достапните истражувања, овие шест намирници се добри извори на мелатонин:
Вишни. Сокот од вишни е еден од најпознатите помагала за спиење. Истражувачите откриле дека ги зголемува нивоата на мелатонин во телото и го подобрува сонот. Имајте на ум дека сокот од вишни е богат со шеќер. Пиењето секоја вечер може значително да го зголеми внесот на калории. Јадењето вишни наместо пиење на нивниот сок е поздрав начин да го добиете вашиот мелатонин.
Гоџи бобинки. Произведени од растение по потекло од Кина, гоџи бобинките се фалени поради нивните ефекти против стареење. Тие се исто така богати со мелатонин и можат да го подобрат сонот.
Јајца. Меѓу животинските производи, јајцата се еден од најдобрите извори на мелатонин. Јајцата се исто така многу хранливи, содржат протеини и железо, меѓу другите есенцијални хранливи материи.
Млеко. Топлото млеко е традиционален лек за несоница, па затоа не е изненадување што е богато со мелатонин. Ова може да биде добра опција ако можете да толерирате млечни производи.
Риба. Рибата е подобар извор на мелатонин од другите меса. Најдобри опции се масните риби како лососот и сардината, кои исто така содржат вредни омега-3 масни киселини.
Јатки. Повеќето јаткасти плодови имаат добра количина на мелатонин. Ф’стаците и бадемите се меѓу најдобрите извори. Јаткастите плодови се исто така одличен извор на многу антиоксиданти, здрави омега-3 масти и минерали.