Јогуртот помага во превенција на дијабетес?

Американската агенција за храна и лекови (ФДА) посочи дека вклучувањето на јогурт во вашата исхрана може да помогне во спречување на дијабетес. Во март, здравствената агенција објави дека нема да го оспори тврдењето на Danone Северна Америка, производител на Dannon и други познати брендови на јогурт, дека редовното консумирање јогурт може да го намали ризикот од дијабетес тип 2.

ФДА планира да дозволи ова тврдење да се појави на етикетите на производите од јогурт, но само доколку тие се формулирани на начин што не ги доведува во заблуда потрошувачите и доколку се исполнети одредени критериуми.

„Врз основа на преглед на петицијата и други докази, ФДА утврди дека постојат некои релевантни докази за поддршка на поврзаноста помеѓу потрошувачката на јогурт и намалениот ризик од дијабетес тип 2, иако овие докази се ограничени“, изјавиле од ФДА, а пренесува Њујорк Пост.

Ова здравствено тврдење, наречено „квалификувано тврдење“, имплицира дека доказите не се силни или убедливи, туку укажуваат на корист за здравјето на луѓето. Диететичарката Шери Колман Колинс истакнува дека за редовно консумирање се сметаат две шолји (три оброци) јогурт неделно, минимална количина за ова тврдење.

Колинс нагласува дека е важно да се вклучи јогуртот како дел од урамнотежена исхрана која вклучува разновидна храна како овошје, зеленчук, цели зрна и протеини. Јогуртот со активни пробиотски култури може да биде особено корисен за здравјето на цревата, намалувајќи го ризикот од разни хронични болести, вклучително и дијабетес тип 2.

При изборот на јогурт, Колинс препорачува сорти со низок процент додаден шеќер, како обичниот грчки јогурт, кој е богат со протеини и калциум. Иако консумирањето на јогурт е корисно, Колинс истакнува дека нема дополнителна корист доколку почесто консумирате јогурт, поточно барем еднаш или повеќе пати дневно.