Мирисот кој се шири низ куќата додека се готват брокула, карфиол или некој сличен зеленчук, често се смета за непријатен, а тој се чувствува уште долго откако тие веќе ќе се изедат
Кељ, карфиол, брокула, зелка – овој супер разновиден и хранлив зеленчук е секогаш добро да го имаме на нашите трпези. Може да се користат во многу вкусни рецепти, но за жал сите тие имаат еден недостаток. Кога се готват, испуштаат многу продорен мирис кој се шири низ куќата и често се смета за непријатен.
Сепак, постојат неколку трикови кои можеме да ги искористиме за да го елиминираме (или барем да го ублажиме) непријатниот мирис што се шири од готвењето на овие зеленчуци.
Еве неколку:
Ловоров лист – Доволно е да додадете неколку ловорови листови во водата во која се готви брокула или зелка: својствата на ова ароматично растение ќе го неутрализираат непријатниот мирис на варен зеленчук. Како алтернатива, можете да ставите и стапче цимет директно во тенџерето.
Лимон – Додадете неколку парчиња лимон во водата за готвење и тие ќе го апсорбираат најголемиот дел од мирисот на зеленчукот. Лимонот исто така ќе помогне да се задржат светлите бои на брокулата.
Оцет – Дури и неколку капки оцет, додадени за време на готвењето, можат да го неутрализираат мирисот на зелка и брокула. Оцетот ефикасно ги впива и испарувањата кои излегуваат од тенџерето и се шират низ кујната: само ставете шолја оцет во близина на тенџерето.
Леб – Обидете се да ставите големо парче леб помеѓу капакот и тенџерето со зеленчук: уште подобро ако лебот е натопен во малку оцет или сок од лимон, ќе ја впие пареата и ќе делува како филтер против непријатните мириси. Може да се обидете да ставите и малку презли во тенџерето.
Сега, кога се ослободивте од непријатностите на „мирисот“ на брокулата, ви преостанува само да подготвите неколку сезонски рецепти со кои максимално ќе го искористите овој зеленчук.