Клучот за спречување на губењето на меморијата може да лежи во пармезанот и јогуртот
Научниците ја поврзаа консумацијата на пробиотици со промени во цревниот микробиом и, како резултат на тоа, подобрена меморија
Клучот за спречување на губење на меморијата во староста може да лежи во пробиотикот кој се наоѓа во пармезанот и јогуртот, сугерира истражувањето. Новите студии откриваат дека луѓето со благо когнитивно оштетување кои три месеци консумирале пробиотик Lactobacillus rhamnosus GG (LGG) забележале значителни подобрувања во нивните когнитивни резултати.
Подобрувањето било поврзано со промените во нивниот цревен микробиом. Во иднина овие откритија би можеле да доведат до нови сознанија и превентивни стратегии во борбата против губењето на меморијата – велат истражувачите од Универзитетот во Северна Каролина.
Пробиотикот LGG, кој е широко достапен во суплементи, го има и во храната како што се пармезанот, јогуртот и ферментираната храна како кимчи и кисела зелка.
Подобрување на состојбата на когнитивно оштетување
Научниците собрале 169 учесници на возраст од 52 до 75 години и ги поделиле во две групи во зависност од тоа дали имаат благо когнитивно оштетување или целосно здрав мозок. Во секоја група, учесниците во тримесечното тестирање добивале или LGG пробиотик или плацебо.
Анализата открила дека учесниците кои имале благо когнитивно оштетување имале повисоки нивоа на бактерија наречена Превотела (Prevotella) во нивните црева во споредба со оние кои имале нормална когнитивна функција. Истражувачите заклучиле дека ова откритие сугерира дека составот на цревниот микробиом може да послужи како ран показател за благо когнитивно оштетување, што овозможува претходни интервенции. Кај учесниците со благо когнитивно оштетување, по три месеци консумирање LGG пробиотици, количината на оваа бактерија се намалила.
Логичен заклучок е дека здравјето на мозокот кај постарите лица може да се подобри со редовно консумирање на пробиотици. Сепак, ова не важи за веќе напредни состојби како што се Алцхајмерова болест или деменција, кои се многу посложени. Затоа, интервенциите со пробиотици во фазата на благо когнитивно оштетување може да ја забават или спречат прогресијата кон потешки форми на деменција.