Кога ќе ставите една лажица мед во чаша вода, ако е вистински, медот ќе остане залепен за лажицата и ќе потоне на дното, додека лажниот мед брзо ќе се раствори во водата. Дознајте како уште можете да препознаете дали медот е вистински.
Пазарот е преплавен со лажен, фалсификуван мед кој содржи големи количини шеќер и како таков може да има здравствени последици.
Во минатото, кога само повисоките општествени класи можеле да си дозволат шеќер, медот бил главниот засладувач во Европа.
Но, со зголемената достапност на шеќерот во 18-тиот век, се свртело сè. Денес медот се користи поретко од шеќерот и покрај неговите лековити својства и посебниот вкус.
Не смеат да се додаваат адитиви во медот
Вистинскиот мед е производ на пчелите, создаден со собирање цветен нектар.
Во оваа категорија спаѓа и медунот, кој исто така е многу вреден и се создава со собирање други слатки растителни сокови или слатки секрети од инсекти кои се хранат со растителни сокови.
Во медот не треба да се додава ни најмала количина на адитиви или други состојки, ниту пак да се загрева на високи температури.
Медот што ги изгубил своите оригинални својства поради загревање на високи температури или филтрација треба да биде посебно означен – како „пекарски мед“ или „филтриран мед“.
Со оваа дефиниција и ограничувања, законската регулатива не дозволува продажба на помалку вредни производи под ознаката „мед“. Сепак, сомнежите за квалитетот и автентичноста на медот сѐ уште се присутни, а честа грижа на купувачите е т.н. експресен мед добиен со хранење на пчелите со овошни и шеќерни сирупи.
Боја и мирис
Со оглед на тоа дека само со лабораториски анализи можат да се отфрлат сомнежите за фалсификување на медот, на обичниот потрошувач му е тешко со целосна сигурност да ја утврди неговата автентичност.
Најдобар совет е, се разбира, да купите мед од докажани, сигурни производители.
Исто така, во зависност од потеклото на медот, неговата боја, конзистентноста и вкусот може многу да варираат, па затоа е од суштинско значење запознавањето со карактеристиките на различните видови мед.
Медот што се создава при хранењето на пчелите со шеќер нема да има својствен мирис, ќе биде без мирис или ќе мириса на восок. Некои видови мед се прилично светли, но никогаш не треба да бидат целосно безбојни. Од друга страна и темниот мед со вкус на карамела може да укаже на фалсификуван или лош производ.
Понатаму, медот не треба да биде целосно проѕирен, дури и кога е растворен во вода, и во таков раствор не треба да се создаваат талози.
Кристализација на медот
Помалку информираните потрошувачи често избегнуваат да купуваат кристализиран мед бидејќи се сомневаат во неговиот квалитет, но вистината е дека секој мед со текот на времето кристализира.
Медот главно (околу 75 проценти) се состои од мешавина од два едноставни шеќери, фруктоза и гликоза, а природно својство на гликозата во заситените раствори е кристализацијата.
Некои видови мед се кристализираат многу брзо (багрем и ливадски мед), а некои многу бавно, но важно е да се запамети дека кристализацијата не влијае на нивниот квалитет. Лажниот мед останува течен без разлика колку и каде стои.
На кристализацијата ѝ погодува чувањето на пониски температури и мешањето на медот, а кристализираниот мед е всушност многу практичен за употреба.
При производството на т.н кремаст мед, на пример, кристализацијата намерно се поттикнува под контролирани услови, таквиот мед е многу практичен како намаз, а има карактеристична бела боја и е непроѕирен.
Дополнителни совети
Иако не е неопходно да се декристализира медот, доколку сакате да го направите тоа, се препорачува постепено да се загрева медот до максимална температура од 40 °C.
За загревање најдобро е да користите топли водени бањи, а може да се користи и микробранова печка.
Кога ќе ставите една лажица мед во чаша вода, ако е вистински, медот ќе остане залепен за лажицата и ќе потоне на дното, додека лажниот мед брзо ќе се раствори во водата.
Медот треба да се чува на темно и суво место, на собна температура. Иако се вели дека медот има неодреден рок на траење, прекумерната изложеност на влага сепак може да предизвика негово расипување.