Новото истражување кое ги анализира податоците за внесот на храна и здравствените резултати на речиси половина милион жители на Велика Британија, открило дека префрлањето на здрава исхрана – и придржувањето до неа – може да додаде до 10 години на вашиот живот.
Секогаш кога ќе почувствуваме глад или желба, се соочуваме со избор: да консумираме храна која ни се препорачува како здрава или да бараме вкусна храна. Овие избори не се секогаш лесни или секогаш можни, но истражувањата покажуваат дека јадењето поздрава храна може да има значителни здравствени придобивки, особено на долг рок.
Новото истражување кое ги анализира податоците за внесот на храна и здравствените резултати на речиси половина милион жители на Велика Британија, открило дека префрлањето на здрава исхрана – и придржувањето до неа – може да додаде до 10 години на вашиот живот. Одлична вест! Ако можете да си го дозволите тоа.
Тимот, предводен од Ларс Фаднес, истражувач за јавно здравје на Универзитетот во Берген во Норвешка, го моделирал очекуваниот животен век на околу 467.354 луѓе кои ги документирале нивните навики во исхраната како дел од долгорочното истражување на UK Biobank, кое започна во 2006 година.
Истражувачите ги групирале учесниците врз основа на нивните навики во исхраната и следеле како тие навики се менуваат со текот на времето. Тие идентификувале просечни и нездрави јадачи, како и луѓе чиј внес на храна одговара на препораките на англискиот „Eatwell Guide“ и други кои консумираат исхрана која истражувачите ја нарекле „диета за долговечност“.
По прилагодувањата за пушењето, алкохолот и физичката активност, истражувачите откриле дека мажите и жените на возраст од 40 години кои долгорочно се префрлиле од нездрава исхрана на следење на препораките од „Eatwell Guide“, добиле околу 9 години животен век.
Оние кои ги замениле газираните пијалаци и преработеното месо за исхрана богата со интегрални житарки, јаткасти плодови, овошје, зеленчук и умерени количини риба (т.н. диета за долговечност) додале дополнителни 10 години на нивниот животен век.
Помали добивки во очекуваниот животен век се забележани кај луѓето кои веќе јаделе просечна исхрана или кај оние кои ги подобриле своите навики за јадење подоцна во животот.
„Колку се поголеми промените кон поздрави обрасци на исхрана, толку се поголеми очекуваните придобивки во очекуваниот животен век“, објаснува тимот во нивниот објавен труд.
„Не е изненадувачки, предвидените придобивки во очекуваниот животен век се помали кога промената на исхраната се иницира на постара возраст, но сепак се значајни.
Луѓето на возраст од 70 години сепак би можеле да го продолжат својот животен век за околу 4 до 5 години доколку се префрлат на долгорочна здрава исхрана, или во согласност со „Eatwell Guide“ или со „диетата за долговечност“, открија истражувачите.
Истражувањата пред ова покажале дека различните обрасци на здрава исхрана кои ги следат упатствата на надлежните за храна ги зголемуваат шансите за подолг живот кај граѓаните, пишува Science alert.
Истражувачите ја истакнуваат улогата на даноците и субвенциите за храна, кои имаат за цел да ја направат здравата храна подостапна отколку нездравите опции. Студија од 2017 година проценува дека таквите политики, оданочувањето на нездравите производи како газираните пијалаци, додека се субвенционираат здравите опции, може да спасат 60.000 животи секоја година.