Македонски шеф со светско искуство ги советува газдите: Намалете ги менијата

564

Под итно скратете ги вашите менија и наместо досегашните 50 и кусур ставки на менито сведете ги на минимум. Така ќе ги намалите и трошоците и отпадот од храна, а ќе го подобрите квалитетот, советува шеф Виктор Настески

Македонскиот шеф Виктор Настески кој веќе со години работи на брод, периодов е во Македонија, ужива со семејството и очигледно, се обидува да го сподели своето искуство од долгогодишната работа и да им помогне на домашните угостители да опстанат во ова време на економска криза и недостаток на квалификуван кадар, особено готвачи кои во летниот период масовно заминуваат на работа во Хрватска.

Можеби е постот малку долг но вреди да се прочита, а посебно е корисен за нашите угостители, пишува Виктор на својот профил на Фејсбук.

Неговите совети се однесуваат на тоа што смета тој дека може да им помогне на газдите, менаџерите и шефовите на кујна во угостителските објекти за да опстанат во оваа криза и при недостаток на квалитетни угостители, претежно готвачи.

„Под итно скратете ги вашите менија, и наместо досегашните 50+ ставки на менито, сведете го менито на миниум ставки. Фокусирајте се на квалитет, а не на квантитет!

Задржете ги јадењата кои најмногу ви се трошат и исфрлете ги оние кој најмалку се трошат. Со тоа кратење ѝ овозможувате на кујната да биде поефективна во својата работа и да се фокусира на тие неколку фантастични јадења. Верувајте дека со тоа ќе добиете на многу подобар квалитет и брзина на услугата, со самото тоа им помагате и на келнерите. А што е најбитно, со кратење на менијата ќе ги скратите и вашите трошоци, што моментално е најголемиот проблем во угостителството, а и воопшто.

Уште во старт имате за купување помалку намирници, а воедно ќе имате и помалку фрлање на храна при приготвувањето“, советува Виктор како да се подобри квалитетот на храната во угостителските објекти, но и да се намали отпадот од храна.

Истовремено, вели тој, ќе бидат поуредни и полесни за средување и за чистење и магацините и фрижидерите, а со самото тоа ќе станат и поорганизирани.

И ако сега имате прашање, а што ако на гостите им се здосади менито бидејќи е кратко, шеф Виктор советува: „Тогаш ќе си ги менувате менијата почесто, да речеме, на 6 месеци. Сами ќе процените како ви оди работата и колку е менито ефективно. Но со моето долгогодишно искуство ви гарантирам дека кратките менија секогаш имаат поголеми резултати од подолгите. Квалитет пред квантитет. Бидете креативни и извадете едно лесно ама убаво јадење еднаш неделно и нека го промовираат келнерите тоа јадење како специјалитет на денот или на неделата!“

Како битен момент на кој Настески мисли дека не се обрнува внимание кај нас, е тоа што готвачите пржат риба и се друго во истиот зејтин.

„Буквално го уништувате целиот ваш труд со тоа! Нема нешто поодвратно! Знам дека зејтинот е скап и сакате да заштедите, но тоа не е начин бидејки губите на квалитет и тоа ќе ви се врати како бумеранг. Доколку сакате да го избегнеге тој момент, а воедно и да заштедите, тогаш исфрлете ја пржената риба од менито. Можете да ставите на менито риба која се пече на скара. Нормално, треба да имате и посебна скара за риба. Има и други методи за да се избегне тој момент ако имате само една скара“, пишува тој.

Шеф Виктор вели дека иако е гневен на повеќето газди во Македонија заради сите неправди кон угостителите, а особено кон тие во кујна, неговите совети се искрени и од срце.