И покрај упорните совети на лаиците, научната заедница нема цврсти докази дека пиењето кафе на празен желудник е штетно. Всушност, консумирањето на кафе има ист ефект врз нашето тело без разлика дали го пиеме на гладно или после оброк. Важно е да го слушате своето тело кое ви испраќа јасни пораки ако нешто не му се допаѓа.
Ако сте од оние луѓе кои не можат да го започнат денот без својот миризлив ритуал, утринското кафе, веројатно сте чуле безброј пати дека пиењето кафе пред првиот утрински оброк не е препорачливо за вашиот желудник. Но, дали има вистина во ова и дали научната заедница се согласува со оваа теза, прочитајте подолу.
Кафето е еден од најпопуларните пијалаци низ целиот свет, веднаш по водата. Покрај мирисот на првото утринско кафе, неговите придобивки се многубројни.
Денес, кофеинот е социјално најприфатениот стимуланс, кој има многу позитивни ефекти врз нашето тело. На пример, кофеинот нè прави повнимателни и фокусирани, а исто така може да го зголеми нивото на енергија. Покрај тоа, научните истражувања покажаа дека кафето може да ги подобри другите когнитивни функции како што се меморија, расположение, будност, но и да го скрати времето на реакција.
Бидејќи кофеинот влијае на забрзување на метаболизмот, тој често се поврзува со полесна борба со вишокот килограми и врвни спортски перформанси. Со стимулирање на нервниот систем, кофеинот предизвикува зголемување на достапноста на масните резерви како извор на енергија, што резултира со извонредни спортски резултати, но и полесно губење на несаканите килограми.
Слично на тоа, студиите потврдуваат дека кофеинот штити од разни болести како што се дијабетес тип 2, Алцхајмерова болест, деменција, заболувања на црн дроб, срце и крвни садови.
Со толку многу придобивки, зошто повеќето луѓе мислат дека кафето на празен желудник може да биде штетно за нашето здравје?
Истражувањата покажуваат дека супстанциите што го прават кафето горчливо можат да стимулираат зголемено производство на желудочна киселина, поради што повеќето веруваат дека кафето ја иритира слузницата на желудникот, предизвикува киселини, гадење и може да ги влоши симптомите на разни болести и нарушувања на дигестивниот систем, како што е синдромот на нервозно дебело црево.
Поединци тврдат дека конзумирањето кафе на празен желудник е особено штетно бидејќи во него нема друга храна што би спречила дејство на киселината од кафето на слузницата на желудникот.
Меѓутоа, научниците сè уште не пронајдоа цврсти докази кои го поврзуваат консумирањето на кафе на празен желудник со пречките во варењето на храната.
Мал број луѓе се исклучително чувствителни и на најмали количини кафе, па затоа реагираат доста бурно. Симптомите вклучуваат киселини, болка во желудникот, па дури и повраќање. На ваквите лица им се советува да избегнуваат целосно консумирање кафе, бидејќи симптомите се исти без разлика дали кафето се пие на празен или на полн желудник. Најважно е да го слушате вашето тело и да обрнете внимание на тоа како реагира на одредена храна, вклучувајќи го и кафето. Ако почувствувате пречки во варењето при консумирањето кафе на празен желудник, но нема симптоми кога пиете кафе после појадок, слушнете ги сигналите што ви ги испраќа вашето тело и прилагодете се на нив.
Ефектот на кафето на нивото на „хормонот на стресот“
Еден од главните аргументи на противниците на консумирање кафе на празен желудник е како кафето влијае на нивото на „хормонот на стресот“ – кортизол.
На кортизолот му е даден епитетот „хормон на стресот“ поради зголеменото лачење во стресни ситуации. Бидејќи денес сите водат бурен и стресен начин на живот, не е изненадувачки што сè поголем број луѓе има трајно покачено ниво на кортизол што може да доведе до разни нарушувања и болести како што се проблеми со тироидната жлезда, дијабетес, висок крвен притисок или дебелина.
Интересно е што кафето го стимулира производството на кортизол, но неговата концентрација не се зголемува значително кај луѓето кои пијат кафе редовно.
Исто така, недоволно студии потврдуваат дека пиењето кафе после оброк може да има ефект врз намалување на излачувањето на кортизол. Ако пиете кафе ретко или повремено, секое зголемување на нивото на кортизол е краткотрајно и нема долгорочно негативно влијание врз здравјето.
Потенцијални негативни последици од пиењето кафе
Без разлика дали пиете кафе на празен желудник или само кога јадете нешто, кафето има и свои негативни страни. Познато е дека кофеинот создава зависност, а некои луѓе може да бидат особено чувствителни. Таквата реакција е предизвикана од влијанието на кафето врз промената во хемијата на мозокот, за што сепак се потребни поголеми количини на кафе.
Консумирањето прекумерни количини кафе исто така може да придонесе за чувство на вознемиреност, немир, забрзано чукање на срцето, главоболки, а исто така може да има ефект и на покачување на крвниот притисок. Сепак, сè уште нема научни докази дека пиењето кафе на празен желудник ја зголемува зачестеноста или сериозноста на овие несакани ефекти.
Со оглед на горенаведеното, експертите сметаат дека внесувањето кофеин треба да биде ограничено на максимум 400 мг, што е еквивалентно на 4-5 шолји кафе. Исто така, последното кафе во денот не треба да се конзумира подоцна во попладневните часови поради ефектите на кофеинот што може да траат до 7 часа по консумирањето.
Важно е да се напомене дека кофеинот поминува низ плацентата и може да дејствува до 16 часа по консумирањето на кафе. Затоа, на бремените жени им се препорачува да го намалат внесувањето на пијалоци со кофеин до 200 мг или една до две шолјички.
И конечно, кога е време за првото кафе?
Многу луѓе сакаат да го започнат денот со голема шолја кафе. И покрај упорните совети на лаиците, научната заедница нема цврсти докази дека пиењето кафе на празен желудник е штетно. Всушност, консумирањето на кафе има ист ефект врз нашето тело без разлика дали го пиеме на празен желудник или после оброк.
Важно е да го слушате вашето тело, кое ви испраќа јасни пораки ако нешто не му се допаѓа. Затоа, ако имате пречки со варењето при консумирањето кафе на празен желудник, обидете се со воведување на утрински оброк пред омилениот ритуал.